Potoise Mare na San Pra ai Walter a Poi Nhtoi (April 8)

Saint Walter of Potoise (April 8)

Potoise Mare na San Pra ai Walter gaw, tsaban (11) hta Fransik mungdan Picardy mare kaw shangai chyinghkai wa ai rai nga ai. Gautier Walter mying ai htinggaw kaw na rai nga ai. Shi gaw, hpaji madang grai tsaw ai myit sawn hpaji “Philosophy” hte ga shaga hpaji “Oration” hta grai ningtawn ai hpaji ninghkring mung rai nga ai. Shi gaw, asak ram wa ai hte rau Rebais-en-brie mare kaw na Benedictine Tawra Jau Jawng de shang mat wa ai. Jau tai wa ai hpang, Pontoise mare na jawng nnan kaw jawng up Jau tai wa sai.

Shi a hpaji kung zet ai shiga gaw, shara shagu de chyam bra mat wa nu ai. Shi hpe Jau kaba lit shatsam ya ai Hkawhkam Philip (I) hte Sarabyin George (VII) gaw, shi ra sharawng ai n dan n dawng rai asim sha tara shatup let nga na matu ahkang n jaw ma ai. Shi hpe masha hpawng kaw azet azang rai sasana magam gun na matu, shadut lai wa ma ai. Dai dai majaw, Shan a ga hpe madat nna Pontoise mare kaw shawa a matu lit kaba gun hpai ya sai.

Nden ja la ai San Pra ai Walter gaw, Chyoipra ai arai dut sha ai lam hte sasana magam gun ni a n shawp ai myit jasat ni hte seng nna, grai shadum ya ai majaw, gayet hkrum ai hte hpang jahtum e htawng sharawng da ai hkrum lai wa sai. Raitimung, shi a Karai Kasang hpe kamhpa ai myit gaw, nang kang wa magang rai nga nu ai. Shi a Jau aya hpe mung sharawng dik ai rai nga ai; shi a prat hta akyu hpyi ai hte ru yak jam jau jam hkau hkrum,. hkam sharang nna nga lai wa ai. Shana tup akyu hpyi nna mung law law lang shi nga lai wa sai.

San Pra ai Walter gaw, htawng kaw nna lawt pru wa ai hpang, Bertaucourt mare kaw Nu Maria hpe hkungga shakawn shagrau ai hku nna Mama jawng langai mi hpe mung, hpaw da ya lai wa sai.

Shi gaw, 1095 ning, Chyoipra ai Manga Ya Shani, Madu hta yup pyaw ban sa mat wa sai rai nga ai.

Shi n nga mat ai hpang, 1153 ning hta, Rouen Saradaw ginwang a Saradaw kaba Hugh de Boves hkum nan San Pra ai masha hku nna dang dat let, Shi a Poi Nhtoi hpe mung, April shata (8) ya shani ngu masat shagrau dat ya sai rai nga ai.

Daini Nawku gaw, Potoise Mare na San Pra ai Walter a Poi hpe galaw nga ai aten hta, anhte marai hkum shagu mung, tinang hta kaba ai ni, woi awn ai ni a ga madat nna, man ang ai lit magam ni hpe gun hpai hkawmsa lu na chyeju atsam ni hpe jaw ya rit ga matu, lak san akyu hpyi la nga ga law.

 

By;

Sister Rose Angeline Maran Nang Doi (SFX)

RVA-Kachin Service (Myitkyina)

Add new comment

11 + 2 =