Portugal Mungdan Na San Pra ai Elizabeth a Poi Nhtoi (July 4) 04 July 2023

Portugal Mungdan Na San Pra ai Elizabeth a Poi Nhtoi (July 4)

San Pra ai Elizabeth gaw, Spain Mungdan, Aragon Mare na, Hkawhkam a kasha rai nga ai. Shi gaw, Spain Mungdan, Saragossa mare hta e, lai wa sai Madu a shaning 1271 ning, January shata praw (4) ya shani hta shangai chyinghkai wa ai rai nga ai. Hpang daw de Shi gaw, Portugal Mungdan na Hkawhkam Denis hte kun dinghku de nhtawm, kasha Alfonso hte Constance yan hpe shangai shaprat la lu ma ai.

Hkawhkam Jan Elizabeth a akyu hpyi shaja ai, myit galu ai shaman chyeju ni a majaw, mara a nsin kata kaw sak hkrung hkawmsa nga ai, Shi a ning rum ning tau wa gaw, makam masham de gale shang wa lu sai rai nga ai. San Pra ai Hkawhkam Jan Elizabeth gaw, buhpun palawng ni hpe sari mi arawng rai nna bu hpun chye ai, sumnung shingdi shagrit shanem rai nna ga shaga chye ai, masha ni hpe mung tsawra matsan dum myit kaba la ai jan rai nga ai. Dai hta n-ga, Shi gaw, makam masham hte seng nna, Akyu hpyi hkrun lam hkawm ai “Pilgrims” ni hpe hkring sa shara ni lajang ya ai, Shi a Mungdan kaw na matsan ai shayi sha ni hpe Hkungran sharung “Dowries” ni hpe lajang ya ya rai wu ai.

San Pra ai Hkawhkam Jan Elizabeth gaw, Ga li ga law mang hkang ni hpe jasim ya ai majaw, Simsa Lam hpe shabyin ya ai jan, “Peace Maker” nga nna shamying shagrau ya hkrum wu ai.

Shi a Ning rum ning tau wa Hkawhkam Denis n nga mat ai hpang, Elizabeth gaw, Order of St. Francis de shang mat wa nhtawm, Poor Clare Mama Jawng kaw tara shadik let sa nga mat wu ai.

1336 ning, July shata praw (4) ya shani hta, Hkawhkam Jan Elizabeth gaw, nta langai mi a dinghku mang hkang sa hparan ya na matu, Estremoz mare de sa wa ai hkrun lam ntsa kaw, shi a asak (65) ning hta, Madu kaw yup pyaw ban sa mat wa sai rai nga ai.

San Pra ai Elizabeth n nga mat ai hpang, 1625 Ning, June shata (24) ya shani, Dai aten na, Wa Sarabyin Urban (3) kawn, Shi hpe e, San Pra ai Masha hku nna masat dang dat let, Shi a Poi Nhtoi hpe mung July shata praw (4) ya shani, masat shagrau dat ya sai rai nga ai.

Daini Nawku Hpung gaw, Portugal Mungdan Na San Pra ai Elizabeth a Poi Nhtoi hpe galaw nga ai aten hta, anhte Hpung Masha ni mung, San Pra ai Elizabeth zawn, tinang dum nta masha ni a matu, makau grup yin a matu, Makam Masham a Nhtoi kaja tai lu ai ni byin tai lu hkra shakut sa wa nga ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)