Polotsk Mare na San Pra ai Euphrosyne a Poi Nhtoi (May 23) 23 May 2023

online image

Polotsk Mare na San Pra ai Euphrosyne a Poi Nhtoi (May 23)

San Pra ai  Euphrosyne gaw, Rusia Mungdan, Polotsk Mare hta lai wa sai 1104 ning daram hta shangai chyinghkai wa ai San Pra ai Masha rai nga ai. Shi gaw, san seng san pra lam hte matsan masha ni a ntsa matsan dum myit grai kaba ai San Pra ai Hkawnseik langai mi mung rai nga ai. Shi gaw, USSR (Rusia) Mungdan, Polotsk ginwang na Hkawhkam kasha a shayi sha rai nga ai. Dai majaw, shi gaw, mungkan ntsa na mungkan pyaw lam hta ra n rawng hkra sak hkrung nga lu ai raitimung, ma kaji ten kaw nna shi a hkum hpe Karai Kasang Wa kaw ap jaw kau nu ai. Shi gaw, Shi a mare na Mama Jawng de asim sha sa nga nna tara shadik mat wu ai. Shi a lu da ai aten malawng laga hpe Laika Buk ni kaw Copy galaw la ai amu hte aten shama wu ai. Shi gaw, asim sha rai tara shakut ai zawn shara shagu hkan sa du gawan htawm nhtawm Wenyi lam hkaw tsun hkawm hkawm rai wu ai. Euphrosyne gaw, Constantinople mare du ai shaloi Seltse ngu ai shara kaw Mama Jawng Langai mi sa gap da ya sai rai nga ai. Shi hpe Emperor Hkawhkam Kaba Manuel (I) hte Saradaw Kaba Michael (3) _shing n rai_Patriarch Michael (3) gaw, kabu gara rai hkap tau hkalum la ma ai. Madu Yesu a Chyoi Pra ai Daidaw Buga Yesusalem mare hte Panglai Si a lapran na Mar Saba Tawra Jawng kaba de mung San Pra ai Euphrosyne sa du kau da wu ai.

San Pra ai  Euphrosyne gaw, 1167 ning hta Yerusalem mare kaw, Madu hta yup pyaw ban sa mat wa sai rai nga ai. Raitimung, shi a Moimang hpe Rusia Mungdan, Kiev mare de htawt la ma ai. San Pra ai Euphrosyne hpe Rusia, Lithuania hte Ruthenia mungdan na mungdan masha ni gaw, shi hpe lak san kam hpa let hkungga shagrau ya nga ma ai.

Shi n nga mat ai hpang, Nawku Hpung gaw, Shi hpe San Pra ai Masha dang dat let, Shi a Poi Nhtoi hpe mung, May shata (23) ya shani masat shagrau dat ya sai rai nga ai.

Daini Nawku Hpung gaw, Polotsk Mare na San Pra ai  Euphrosyne a Poi Nhtoi hpe galaw nga ai aten hta, anhte Hpung Masha ni mung, San Pra ai  Euphrosyne zawn, kadun la ai dinhta prat hta, mungkan a pyaw hpa lam ni hta aten n shama ai sha, Mai Kaja ai hte sak hkrung hkawmsa lu ai ni byin tai lu hkra, shakut sa wa ga law.

 

By;

Sister Rose Angeline Maran Nang Doi (SFX)

RVA-Kachin Service (Myitkyina)

 

Add new comment

2 + 8 =