Poitiers Mare na San Pra ai Hilary a Poi Nhtoi (January 13)

San Pra ai Hilary gaw, Fransik Mungdan (Ya na, Pyintit), Poitiers mare kaw, A.D 310 ning hta shangai wa ai rai nna, lusu ai kasha mung rai nga ai. Shi gaw, tsa ban (4) laman na makam masham hte seng nna magrau grang ai, Leading theologian langai mi mung rai nga ai.

Ma prat hta shi gaw, makam masham n nga ai wuhpung kata kaw nga kaba wa ai. Dinghku de nna, Apra mying ai kasha shayi sha langai mi lu ngut ai hpang, shi gaw hpara shalaw nna sak hkrung nga sa lam hpe n hkap la mayu wa ai. Shi a myit hta, nga yawng nga pra a ntsa kaw langai mi sha mai nga na re, nga nna myit wa wu ai. Ndai zawn myit ung ang taw nga yang, Ja Chyuym Laika kaw na mahtai lu la nu ai. Dai hpang, shi gaw Chyoipra ai Nawku Hpung de gale shang wa nhtawm, Kashin Kamun Sacramentu hpe hkam la nu ai.

Shi a makam masham myit ja ai hpe shawa hpung masha ni mu lu ma ai. Dai majaw, yu manya hpung masha langai ni sha naw rai nga ai Hilary hpe Poitiers mare kaw na Saradaw lit hpe hkam la na matu shadut ma ai. Raitimung, shi gaw shagrit shanem ai myit hte kaning re ai ahkang aya hpe mung n hkap la na; yu manya hpung masha langai mi hku nna sha sak hkrung shakut nga sa wa na lam mahtai jaw yaw u ai. Dai zawn shi a shagrit shanem ai myit hpe mu chye magang, shawa hpung masha ni gaw, shi hpe lit shatsam mayu ai myit jat law wa magang rai wa masai. Dai majaw, A.D 353 ning hta Saradaw aya hpe n ning dang lu nna hkap la ra mat nu ai.

Aria a shut shai sharin lam kaba rai nga ai, “Yesu gaw Karai Kasang n re” nga ai sharin shaga ai lam hpe Saradaw Hailary ninghkap ya ai hte shading sharai yaw u ai. Madu Yesu gaw, Kararai Kasang majing rai nga ai rai nna, masha ni hpe chye na hkra sharin shaga let ning hkap kau ya wu ai. Ndai zawn Aria a sharin shaga ai hpe ning hkap ya ai majaw, shi hpe hkawhkam Constantius gaw, Fransik mungdan kaw nna gawt shapraw kau nu ai.

Ndai zawn, htawt kau ya hkrum ai laman hta, “Karai Kasang Langai hta Marai Masum” nga ai lam laika ka nna aten hpe manu shadawn akyu jashawn lai wa sai. A.D 361 ning hta Saradaw Hilary gaw, Poitiers mare de bai du wa lu sai. Dai mare de bai du wa ai nhtoi kaw nna, Saradaw Hilary gaw, Kahtawlik Makam Masham lam hpe n hkrit n tsang ai sha n den ja ja rai nna hkaw tsun sakse hkam, lam woi awn ningshaw tai lai wa ai gaw, shi a asak hpang jahtum nhtoi A.D 367 ning du hkra rai nga ai.

Shi gaw, shagrit shanem myit kaba ai hte shawa masha ni kaw nna tsawra myit kaba hkap la lu ai wa rai nga timung, makam masham hte seng wa ai shaloi, shut shai ai sharin shaga lam woi awn ai ni hpe gaw, n hkrit n tsang ai sha ninghkap shingdang sharai ya lu ai, ningbaw kaba langai mi mung rai nga ai.

Shi n nga mat ai hpang, Nawku Hpung gaw, shi hpe San Pra ai masha hku nna dang dat let, shi a Poi Nhtoi hpe mung January shata (13) ya shani ngu nna masat dat shagrau dat sai rai nga ai.

Daini Nawku hpung gaw, San Pra ai Hilary a Poi Nhtoi hpe galaw nga ai ten, anhte hpung masha ni mung, tinang lu da sai makam masham hpe gwi gwi sakse hkam lu na matu hte n jaw n teng ai lam ni hpe gaw, galoi mung ning hkap lu na atsam hpe jaw ya rit ga matu, lak san akyu hpyi la nga ga law.

 

By;

Sister Rose Angeline Maran Nang Doi (SFX)

RVA-Kachin Service (Myitkyina)

Add new comment

1 + 1 =