Poissy Mare na, San Pra ai Louis (9) a Poi Nhtoi (August 25) 25 August 2023

Poissy Mare na, San Pra ai Louis (9) a Poi Nhtoi (August 25)

San Pra ai Louis (9) gaw, 1214 ning hta Poissy Mare kaw, shangai chyinghkai wa ai Hkawhkam rai nga ai. Shi a Kanu gaw, shi hpe ningbaw ningla kaja hte jet ai Hkristan masha tai wa na matu, kaji ai ten kaw nna sharin shaman da ya ai. Kanu gaw, shi a kasha hpe “Nu a tsawra ai kasha e, Nu gaw, kanu langai mi hku nna ma hpe tsawra dik ai re lu yaw. Raitimung, Nu a tsawra ai ma e, ma nang shut hpyit mara kaba galaw ai hpe mu gwi na malai, nu a lagaw nhpang kaw nan ma nang si taleng wa na hpe she mu gwi ai yaw.” (I love you my dear child as much a mother can love her child, but I would rather see you dead at my feet than that, you should ever commit a mortal sin.) nga nna tsun ai.

Louis gaw, Shi a asak (19) ning du ai shaloi, Hkawhkam Shayi Margret hte dinghku de nna kashu kasha (11) lu ma ai. Shawa uphkang atsam hta ning tawn ai majaw, asak (22) sha naw rai yang, Hkawhkam shatai hkrum nu ai. Shi galaw ai bungli shagu hpe Karai Kasang a hpung shing kang a matu hte mung masha ni a galu kaba rawt jat lam a matu hkrai yaw shada wu ai. Shi gaw, Matsan masha ni hpe makawp maga ya ai; ladu lai amyat sha ai bungli ni tsep kawp ahkang n jaw ai; kaga masha ni a n kaja ai lam hpe shi n tsun ai. San Pra ai Hkawhkam Louis gaw, ru yak jam jau hkam ai hta shadawn n lu ai hte Nawku Hpung hpe grai tsawra ai San Pra ai masha mung rai nga ai.

San Pra ai Hkawhkam Louis (9) gaw, tai hpyen hpe mung, matsan dum ai myit grai rawng ai. Kalang mi na, Kawa a ga madat nna rawt malan ai hkawhkam kasha langai mi hpe sat shamyit kau na matu shawa masha ni hpe shadut ai shaloi; “Kasha ngu ai gaw, Kawa a ga hpe n dang kau lu ai.” nga nna masha ni hpe tsun shadum wu ai.

1250 ning hta shi Majan je sa ai kaw rim la kau hkrum sai. Shi hpe Htawng kaw sharawng da hkrum ai aten hta, shani shagu Jau ni hpyi ai “Divine Office” akyu hpyi wu ai. Htawng kaw na bai shalawt hkrum ai hpang Fransik mungdan de garai n nhtang wa shi yang, Chyoi Pra ai Buga (Holy Land) de makam masham hkrun lam hkawm sa kau da wu ai.

San Pra ai Hkawhkam Louis gaw, 1270 Ning hta, Majan pa de bai sa ang ai shaloi, machyi nna Cathage mare makau kaw, Madu hta yup pyaw ban sa mat wa sai rai nga ai.  

San Pra ai Hkawhkam Louis gaw, “Ngai tsawra dik ai ma ni e, shut hpyit mara kaba galaw na matu na a hkum hpe nang ahkang jaw na malai, na a hkum hpe ru yak jam jau hpe hkam sha na ahkang chyawm jaw u.” nga nna shi laika ka kau da ai.

Shi n nga mat ai hpang, Nawku Hpung gaw, Shi hpe San Pra ai Masha dang dat let, Shi a Poi Nhtoi hpe mung, August shata (25) ya shani masat shagrau dat ya sai rai nga ai.

Daini Nawku hpung gaw, Poissy Mare na, San Pra ai Louis a Poi a Poi Nhtoi galaw nga ai hte maren, anhte a Prat hta mung, Kaning re ai mayak mahkak ru yak lam ni hte hkrum katut wa ai raitim, Karai Kasang Wa hta manoi manat let, jahtum aten du hkra hkawmsa lu ai byin tai hkra shakut nga ga law.

By;

Sister Rose Angline Maran Nang Doi (SFX)

RVA-Kachin Service (Myitkyina)