Pietrelcina Mare San Pra ai Wa Jau Pio a Poi Nhtoi (September 23) 23 September 2022

Pietrelcina Mare San Pra ai Wa Jau Pio a Poi Nhtoi (September 23)

San Pra ai Wa Jau Pio gaw, 1877 ning, May shata (25) ya shani hta Italy Mungdan, Pietrelcina Mare kaw, Grazia hte Maria yan kaw nna shangai chyinghkai wa ai rai nga ai.  Shannau ni yawng rai yang marai (7) ting rai nga ai. Dai hte kaw na marai (2) gaw ma kaji aten naw rai yang n nga mat wa masai. Ngam nga ai marai (5) hpe shani shagu Rosary hti akyu hpyi woi ai, Missa Hkungga woi sa ai, Makam Masham hta htep lahti hkan nang hkansa na matu Kanu yan Kawa lam woi matsun lai wa sai.

Wa Jau Pio a kaji yang na mying gaw, Francesco rai nga ai. Shi a asak (10) ram aten hta Capuchin Franciscan Ramma langai a kasi hpe yu la nna shi mung dai zawn rai nna, Franciscan Wuhpung de shang na matu Kanu yan Kawa hpe tsun dan ai. 

Kanu yan Kawa mung, shi a hpaji hkrun lam a matu ja gumhpraw ni madi shadaw ya rai let, hpang jahtum shi myit hkut da ai hte maren Franciscan Jau Wuhpung de shang mat wa sai rai nga ai. 

1903 ning, January shata (22) ya shani hta, Francesco gaw, shawng nnan ngu na Franciscan Jau Wuhpung a Ga sadi hpe hkamla nu ai. Shi gaw, Wa Sarabyin Pio (5) a amying hpe la nna, shi a mying hpe mung Pius (Pio) ngu hkam la sai rai nga ai. Shi a hkum hkrang hta Madu Yesu a Wunma ni zawn kap wa ai (4) ning na ai hpang 1910 ning, ginhtawng aten Jau tai aya hpe hkam la lai wa sai. 

Wa Jau Pio gaw, shi a hkum hkrang hta byin nga ai Wunma Manga a majaw grai machyi hkrum ai raitim, Jau tai ai hpang (6) ning tup Franciscan Jau manang ni hte arau magam gun lai wa sai. Dai hpang 1916 ning hta gaw, San Giovanni Rotondo de htawt sit magam gun nna, shi a asak htum ai aten du hkra dai shara hta sha magam gun lai wa ai. Shi gaw, dai shara hta Wenyi hpa-awn hku nna magam gun lai wa sai rai nga ai. 

Wa Jau Pio gaw, gau ngwi ngwi hte mying kaba dan hkung wa ai majaw, masha law law wa, shi kaw sa du hpawng ai lam ni byin pru wa ai majaw, Nawku Hpung kaw nna pyi 1931 ning hta shi hpe magam lit kaw na gan gyin htim da hkrum wu ai. Raitimung, (2) ning na ai hpang Wa Sarabyin Piu (11) gaw, shi hpe pat gyin htim da ai lam ni yawng hpe bai hpaw kau ya sai rai nga ai. 

Wa Jau Pio gaw, Madu Yesu a Wunma hpe hkam sha ra ai raitim, akyu hpyi shakut shaja ai majaw, shi kaw mara sa raw, akyu sa hpyi ai ni, machyi makaw hkrum ai ni du hkra sa du akyu hpyi shaman hkam la lai wa ma ai. 

Ndai zawn rai nna Wa Jau Pio gaw, shi a hkum hkrang hta Madu Yesu a Wunma hkang (5) byin pru wa nna, kade mi machyi hkamsha lam ni hkrum sha taw ai raitim, hkam sharang let Karai Magam gun nga ai ten, 1968 ning, September (23) ya shani, shi a asak (81) ning hta shi magam gun nga ai Shara kaw sha, Madu hta yup pyaw ban sa mat wa sai rai nga ai. 

Wa Jau Pio n nga mat ai hpang, 1999 ning hta, May shara praw (2) ya shani, dai aten na, San Pra ai Wa Sarabyin Yawhan Pawlu (2) kawn, Shi hpe A lu ai Masha hku nna masat shagrau dat sai rai nga ai. 

Dai zawn Wa Jau Pio hpe A lu ai masha masat dat ai (3) ning na ai hpang, Wa Sarabyin Yawhan Pawlu (II) kaw nna sha, Shi hpe San Pra ai Masha hku nna, 2002 ning, June shata (16) ya shani masat dang dat nna, Shi a Poi Nhtoi hpe mung, September shata (23) ya shani masat shagrau dat ya sai rai nga ai. 

Daini Nawku Hpung gaw, San Pra ai Wa Jau Pio a Poi Nhtoi hpe myit dum galaw ya nga ai shaloi, tinang a prat hta kade mi myit ru myit tsang, machyi makaw hkrum wa ai raitim, Wa Jau Pio zawn, hkam sharang lu na, hkam jan lu na atsam hpe jaw ya rit ga matu, Madu kaw akyu hpyi let sak hkrung hkawmsa nga ga law. 

By; 

Sister Rose Angeline Maran Nang Doi (SFX)

RVA-Kachin Service (Myitkyina)