Piacenza Mare na San Pra ai Conrad a Poi Nhtoi (February 19)

St. Conrad of Piacenza (February 19)

San Pra ai Conrad gaw, lai wa sai 1290 ning hta Italy Mungdan, Piacenza mare kaw e, lusu ai kun dinghku kawn shangai chyinghkai wa ai rai nga ai. Shi la ai num mung, lusu kasha rai nga ai.

San Pra ai Conrad shanla dinghku de nna kade nna yang mabyin langai mi a majaw shanhte gaw, myit malai lu nna, jamjau jamhkau hkam sahrang ai hpe lata mat wa ai rai nga ma ai. Lani mi hta Corad gaw, nam shan shachyut sa nna sumwum langai mi hpe wan nat da tai. Dai Wan gaw yi wa langa mi ting hte makau grup na maling ting wan kaw lawm mat ai. Conrad hte shi a manang jau gawng ni gaw mu jang rim hkrup na tsang ai majaw, mare de hprawng mat wa ma ai. Shanhte galaw ai mara a majaw, mara n lu ai masha langai mi hpe mara shagun nna sat kau na matu daw dan ai hpe Conrad na chye lu ai shaloi, shi galaw ai she re, nga nna shi a mara hpe yin hkam la nu ai. Shi hte shi a madu jan gaw shan a ja sutgan hte hka wa kau ya ra mat ma ai. Ndai mabyin gaw, shan hpe akyu hpyi let jamjau hkam, masha kaga ni a matu akyu tam ai amu galaw na maka de gale ya sai rai nga ai.

Dai zawn rai nna, Shi a asak (25) ning du ai shaloi, Third Order Franciscan Tawra magam gun wuhpung de shang mat wa ai. Madu jan mung, Poor Clare Mama Magam Gun Wuhpung de shang mat wa nu ai. Grau simsa ai shara tam nna Sicily Mungdan, Noto hkaraw kaw na Tawra Jawng e, shi a prat tup tara sa shakut nga mat wu ai. Shi a sak hkrung ten malawng maga hpe Tawra jawng makau na tsirung machyi masha ni hpe yu lajang ai amu hte shama kau nu ai.

San Pra ai Conrad gaw, 1353 ning, shi a asak (31) ning hta Madu kaw yup pyaw ban sa mat wa sai rai nga ai.  

San Pra ai Conrad n nga mat ai hpang, 1515 ning hta, dai aten na Wa Sarabyin Leo (X) kawn shi hpe A lu ai masha ngu masat shagrau dat sai rai nga ai.

Dai hpang 1625 ning, June shata praw (2) ya shani gaw, dai aten na Wa Sarabyin Urban (VIII) kawn, shi hpe San Pra ai masha dang dat let, shi a Poi Nhtoi hpe mung, February shata (19) ya shani masat shagrau dat ya sai rai nga ai.

Daini Nawku Hpung gaw, San Pra ai Conrad a Poi Nhtoi hpe galaw nga ga ai hte maren, anhte mung, Karai Kasang Wa a shaga la ai nsen hpe kaning re ai prat hta mi hkawmsa nga ai raitim, na lu ai hte kalang lata hkan sa shatup lu ai ni byin tai lu hkra shakut nga ga law.

 

By;

Sister Rose Angeline Maran Nang Doi (SFX)

RVA-Kachin Service

Add new comment

2 + 0 =