Penyafort Mare na San Pra ai Raymond (January 7)

San Pra ai Raymond gaw, lai wa sai 1175 ning hta, Italy mungdan, Penyafort mare kaw shangai chyinghkai wa ai rai nga ai. Shi a kanu yan kawa gaw, lusu ai masha ni rai ma ai. Shi gaw, kaji ai aten kaw na laika hpaji grai byin ai wa re majaw, shi a asak (20) ning sha naw rai nga ai ten kaw na, Barcelona mare kaw, myit sawn hpaji (Philosophy) hpe sharin la lu nu ai.

Shi a asak (30) ning du ai shaloi, Bologna mare de sa nhtawm, Nawku Hpung a Hkansa Tara ngu ai (Canon Law), bai nna Shawa hte Seng ai Hpaji (Civil Law) ni hpe Hpaji Ninghkring Janmau (Doctorate) hpe gup la lu nu ai. Matsan mayan ni a ntsa sadi dung let, myit galu tawn nna shakut shaja ai myit jasat rawng ai majaw, 1219 ning hta Barcelona mare kaba kaw na, Saradaw kaba hpe garum jaw na Ningtau aya rai nga ai, Archdeacon aya dang ai hpe hkrum wu ai.

Dai hpang masum ning na ai shaloi, Dominican Magam Gun Wuhpung de shang nna, Yuda amyu sha ni teng ai makam masham de bai nhtang gale na matu atsam dat shakut lai wa nu ai.

Shi gaw, San pra ai Peter Nolasco hte rau “Hkye Maga ya ai Kanu” ngu ai (Order of Our Laday of Ransom) Magam Gun Wuhpung langai mi hpe mung hpang da ya sai. Dai magam gun wuhpung a lit magam gaw, Muslim ni a lata kaw nna bawng masha ni hpe hkye la na matu rai nga ai. San Pra ai Raymond gaw, “Five Decretals” ngu shamying ai Nawku Hpung hkan shatup ra ai rit kawp hkansa tara rai nga ai Canon Law hte seng ai laika mung ka da sai rai nga ai.

Sarabyin Gregory (X) gaw, Jau Raymond hpe shi a “Mara raw Jau (Confessor) shatai wu ai. Jau Raymond gaw, Sarabyin hpe mara a matu, matsan mayan re ai ni hpyi shagu jaw na matu, myit jahkut daw dan tawn na shadum ya wu ai.

1230 ning hta Jau Raymond gaw, Dominican Jau ni a masum ngu na ningbaw lit shatsam ya ai hkrum nu ai. Shi lit la ai wuhpung hpe lagaw lam hku hkan gawan nhtawm ahkying aten hpe hkungga chye na matu, hpaji hparat hpe tam sawk ai lam hta sharawng na matu hte kasa amu myit jasat hpe madung tawn na matu sharin matsun ya ai.

Shi a jahtum daw na shaning ni hta makam masham hte seng nna, shut shai mat wa ai lam ni hpe bai shading sharai ya nna, Italy Mungdan na, Muslim ni tengman ai makam masham de bai galai shai wa na matu madung tawn nna shakut lai wa sai rai nga ai.

Ndai zawn sasana magam hta shakut nga ai aten, Jau Raymond gaw, 1275 ning, January shata (6) ya shani hta Madu kaw yup pyaw ban sa mat wa sai rai nga ai.

Jau Raymond n nga mat ai hpang, 1542 ning hta dai aten na Wa Sarabyin Pawlu (III) gaw shi hpe A lu ai masha masat shagrau dat ya sai.

Dai hpag 1601 ning, April shata (29) ya shani hta gaw, dai aten na Wa Sarabyin Clement (VIII) kawn shi hpe San Pra ai masha dang dat let, shi a Poi Nhtoi hpe mung, January shata (7) ya shani ngu masat dat ya sai rai nga ai.

Daini Nawku hpung gaw, Penyafort mare na San Pra ai Wa Jau Raymond a Poi Nhtoi hpe galaw nga ai aten hta, anhte a myit masin hta mung, Karai Kasang Wa a magam lam ni hta kaning re ai magam hta raitim, teng man kang ka sadi dung let gun hpai lu na atsam hpe jaw ya myit ga matu, lak san akyu hpyi la nga ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)