Paola Mare na, San Pra ai Francis a Poi Nhtoi (April 2) 02 April 2023

Paola Mare na, San Pra ai Francis a Poi Nhtoi (April 2)

San Pra ai Francis gaw, Italy Mungdan, Paola Mare kaw, lai wa sai Madu a shaning 1416 ning hta shangai chyinghkai wa ai rai nga ai. Shi gaw, “Manim Friars” ngu ai kaji htum Tawra Magam Gun Wuhpung de hpang ai San Pra ai Masha mung rai nga ai. Shi a kanu yan kawa gaw, ma n lu ai shaning law law nga lai wa ma ai. Jahtum e, ma lu na matu, Asisi mare na, San Pra ai Francis kaw garum akyu hpyi ma ai.

Shi kaw garum akyu hpyi ai hpang, kasha shangai la lu ai majaw, kanu yan kawa gaw, shan a ma hpe chyeju dum masat shingteng amying hpe Francis ngu nna shamying ya ma ai. Francis gaw, shi a asak (16) ning sha naw rai shi yang, Panglai makau na lungpu hku langai mi kaw tara shadik let sa nga mat ai.

Francis a sat lawat hpe yu sharawng ai majaw, shi a manang law law mung shi kaw hkan sa wa ma ai. Shaning law jat wa nna, Mini Wuhpung a Npawt Madung Wuhpung byin tai wa sai. Order of Minim ngu ai gaw, shanhte hkum hpe Karai Kasang a Nawku Hpung hta Kaji Htum ngu shamying la mayu nna, shanhte hkum nan laksan lata shamying la ai rai nga ai. Shanhte gaw, shawa hpawng de pru hkawm ai lam tsep kawp n galaw ai, chyahtai panep n tawn ai aga majing malang ntsa yup ai, prat tup shan n sha ai sha tara shadik let nga ai ni rai nga ma ai.

San Pra ai Francis gaw, shi a manang ni hpe “Nye a tsawra ai hpunau ni e, nanhte a wenyi a matu akyu pru ai hpe galaw na matu ngai shadut ai. Si ai lam gaw kaja teng byin na sha re; anhte a asak ngu ai gaw, kadun la nga ai; wan hkut zawn hkring mi na laman hkoi mat ai baw re.” nga nna galoi mung  shadum ya ai.

San Pra ai Francis gaw, Madu a shaning 1481 ning hta Hkawhkam Louis (11) saw shaga ai majaw, Fransik (Ya na Pyin-Thit) Mungdan de sa du ai. Dai ten Hkawhkam Louis gaw, si wa maw taw sai rai nga ai, shi hpe san Pra ai Francis gaw, “Hkawhkam Hkawseng ni a asak mung, Karai Kasang a lata kaw sha nga nga ai; dai asak ni mung daw dan masat da ai hkrai rai nga ai.” nga nna tsun shadum ya ai. Hkawhkam Louis gaw, hkamja lam bai n kaja wa timung, San Pra ai Francis shadum ya ai majaw, Ngwi pyaw ai hte n sa hti mat wa sai rai nga ai.

Hkawhkam Louis (11) a hkang galai ai Hkawhkam Charles (8) gaw, San Pra ai Francis hpe shi a Hpaji jaw lit hkam shatai nna, shi a matu, Fransik Mung hte Italy Mungdan kaw Jau tai jawng law law gap da ya sai rai nga ai.

Paola mare na, San Pra ai Francis gaw, Madu a shaning 1507 ning, shi a asak (91) ning hta Madu kaw yup pyaw ban sa mat wa sai rai nga ai. 

Shi n nga mat ai hpang, 1518 ning, November shata praw (1) ya shani, Nawku hpung kawn Shi hpe A Lu ai masha dang dat sai rai nga ai.

Dai hpang, 1519 ning, May shata praw (1) ya shani, dai aten na Wa Sarabyin Leo (10) kawn, Shi hpe San Pra ai Masha dang dat let, Shi a Poi Nhtoi hpe mung, April shata praw (2) ya shani masat shagrau dat ya sai rai nga ai.

Daini Nawku Hpung gaw, Paola Mare na, San Pra ai Francis a Poi Nhtoi hpe galaw nga ga ai aten hta, anhte marai hkum shagu mung, San Pra ai Francis zawn, anhte a sak prat hkrun lam hta shagrit shanem ai myit hte Karai Kasang Wa ra sharawng ai hku nna sak hkrung hkawm sa lu ai ni byin tai lu hkra shakut sa wa ga ngu, n gun jaw dat lu n ngai law.

By;

Sister Rose Angeline Maran Nang Doi (SFX)

RVA-Kachin Service (Myitkyina)

Video Link: https://www.youtube.com/watch?v=8SL_wCW_Srs