Padua Mare na, San Pra ai Anthony a Poi Nhtoi (June 13) 13 June 2023

Padua Mare na, San Pra ai Anthony a Poi Nhtoi (June 13)

Padua Mare na, San Pra ai Anthony gaw, 1195 ning, August (15) ya shani hta Portugal Mungdan, Lisbon Mare kaw shangai chyinghkai wa ai rai nga ai. Shi asak (15) ning du ai shaloi, Coimbra Mare na, Augustinian Jau Jawng kaw sa nga ai. Shi gaw, Morocco mare na Makam Masham a majaw, si hkam hkrum ai Franciscan Jau Manga a labau hpe chye mat ai shaloi shanhte zawn byin tai mayu ai myit rawng wa nu ai. Dai majaw, Shi gaw, Franciscan Jau Wuhpung de shang mat ai hpang, Africa Mungdan na, Muslim ni hpe tara jahprang ya na matu lit shatsam hkrum nu ai.

Dai lit gun ai garai nna shi yang, machyi kaba hkrum ai majaw, Portugal Mugndan de bai nhtang wa ra mat nu ai.  Shi jawn wa ai sanghpaw li gaw, nbung laru kaba hte hkrum nna, Sicily Zinlawng de du mat wa nu ai. Dai zinlawng kaw nna, Assisi mare de du mat wa ai shaloi, San Pra ai Francis Assisi hte hkrum nu ai.

Dai shara kaw, Shi hpe Katsi Katsang nga ai Tawra Jawng langai kaw lit shatsam ya ma ai. Kade nna yang, Shi a ga shaga atsam hpe mu chye lu ai majaw, Shi a Jau Kaba ni gaw, shi hpe Italy hte Fransik Mungdan ni hkan tara hkaw hkawm na lit shatsam ya ma ai. Shi du mat wa ai shara shagu de masha wunawng hkan du wa ma ai; tara maigan masha ni mung shi a si mani ai myit jasat hte Ja Chyum Mungga lam hta ning tawn ai majaw, makam masham de gale shang wa ma ai.

San Pra ai Anthony gaw, Padua Mare kaw shi a hpang jahtum shaning ni bungli gun hpai kau da nhtawm, 1231 ning, June (13) ya shani shi a asak (36) ning sha naw rai yang, Madu kaw yup pyaw ban sa mat wa sai rai nga ai.

Padua Mare na, San Pra ai Anthony n nga mat ai hpang shaning 1232 ning, May shata (30) ya shani, dai aten na, Wa Sarabyin Gregory (9) kawn, Shi hpe San Pra ai Masha dang dat let, Shi a Poi Nhtoi hpe mung, June shata (13) ya shani ngu masat shagrau dat ya sai rai nga ai.

Shi a Sumla hpe, Ma Yesu hpe pawn nga ai sumla hte rai madun tawn da nga ai. Kalang mi Ma Yesu hpe shi pawn nga ai hpe masha ni mu yu ma ai majaw, ndai zawn Sumla madun da ai rai nga ai. Bai nna, Shi a Ja Chyum Mungga lam hta ning tawn ai majaw, Shi hpe Laika buk langai mi jum tawn ai sumla hte mung mu lu nga ai re. Dai hta n-ga, Shi a sumla hpe, myit masa san seng hpraw tsawm ai majaw, Hka law pan (shing n rai) Lily hte rai nna mung mu lu nga ai re.

San Pra ai Anthony hpe arung arai shamat ai shaloi bai mu la na matu garum akyu hpyi ya ai San Pra ai Masha hku nna mung kam shamyet nga ga ai re. Galang mi, lagut langai mi shi a Shakawng Kungdawn Laika, Psalter lagu nna hpawng mat wa ai shaloi, bai lu la na matu, shi akyu hpyi ai. Dai shaloi, teng sha dai lagut gaw, shi lagu mat wa ai Laika buk hpe bai nhtang jaw ra na shing ran mu nna, bai sa jaw kau ai mabyin langai mi mung nga lai wa sai rai nga ai. 

Daini Nawku Hpung gaw, Padua Mare na, San Pra ai Anthony a Poi Nhtoi hpe galaw nga ai aten hta, anhte Hpung Masha ni mung, anhte a prat hta tinang a arung arai lama ma mat ai shaloi, San Pra ai Anthony hpang de akyu hpyi kam shamyet nga ga, bai nna, anhte a makam masham hpe mung, bai shangang shakang la nga ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)