Nyau-Lay-Byin Nu Maria a Labau Lam ( daw 8 ) 31 March, 2020

Nyau-Lay-Byin Nu Maria a Labau Lam   ( daw 8 )

         Nu wa hpu nau ni, Madu a shaning, (1936) ning August shata (15) ya shani hta lai sai ten Nyau Lay Byin sasana a ningtau jau rai nga ai Wa Jau X. Boulanger Maw Lamyaing San Patrick Jawng  wang hta nhtu hte galun hkrum nna, Yangon tsi rung kaba hta si mat wa sai lam lai sai lamang hta na la lu saga ai rai nga ai. Wa Jau Mee Nyo mung baw de ningma hkra da hkang re majaw, myi maga mi n mu mat rai nga ai. Gade nna ai sha ngam ai maga mi de bai nmu mat nu ai. Jau gaw, gumhpraw hkoi shap ai magam bungli hpe shazim kau sai re majaw, sun hkau na galaw sha ai buga masha ni gaw, gumhpraw a-to: grau jaw ra ai de hkoi shap hpang wa masai. A to: gumhpraw grau law wa jang bai nlu jaw ai majaw, shanhte lu tawn ai hkau na ni hpe jaw kau ra ai madang de rai mat sai. Dai aten ladaw hta, mung masa mung galai shai ai ten re majaw, Asuya madu ai sun hkau na ni rai mat ai lam chye lu ai. Shingrai, sasana madu ai sun hkau na ni malawng maga de zing la kau ya sai lam labau hta matsing da nga mali re. Sasana kawn madu ai sun hkau na ngam nkau mi hpe Nawku hpung masha ni hpe matut galaw sha shangun sai. Wa Jau Mee Nyo gaw myi lahkawng yen nmu mat ai rai tim, Jawng dung Jau lit magam hpe galaw let, nawku hpung lam, sasana a magam lam, hpaji hparat lam hte laika sharin jawng ni hpe Jawng up lit magam hku nna yu woi awn lajang ya nga ding yang rai nga ai.

          Myi nmu tim, shani shagu Missa Hkungga nawng jau ya ai, Chyoi Pra Hkum hpe hkan jaw ai hte jawng ma ni hpe mung shani shagu Karai Kasang a tara lam ni hpe lani mi pi nhprai ai sha, sharin ya nga nu ai. Mau hpa langai gaw, myi nmu tim, Missa Hkungga Nawng Jau ai shaloi Chyum laika ni hpe A-lut lu tsun lu hti ai lam rai nga ai. Nu wa Ni, Jau gaw Chyum Laika hpe gade ram du hkra hti hka ja ai ngu ai gaw, adan sha rai nga ai. Jau myi nmu ai re majaw, Chyoi Pra ai hkum jaw ai ten, ga de n hkrat mat na matu, tara tau kawn makau kaw nga let, garum la lam chye lu ai. Shingrai, myi nmu ai Jau kawn Chyoi Pra Hkum jaw nna, ga de hkrat mat ai, jahkaw kau ai, ngu ai, lang mi pi n nga ai nga nna buga masha ni hpaw tsun da nga ma ai. Bai nna, Jau Mee Nyo gaw, Nawku Hpung a poi kaba nhtoi shani hta Missa hkungga jaw ai shaloi, shi a Mungga hpe Myen, English hte Karen myusha ga ni hku nna matut manoi hkaw tsun ai lam labau hta matsing da ma ai.

          Myi nmu ai Jau Mee Nyo gade ram du hkra sasana magam hta shakut shaja let, nawku hpung masha ni hpe tsaw ra ai i nga jang, lani mi na ten, shi hte rau magam gun nga ai Jau ni, Bum lung hpung gawan ai ten, nmyit mada ai sha jawng wang kaw garum ya nga ai num sha langai kajawng kaja machyi kaba hkrum nna, si wa hkyen ai shaloi, Jau gaw, myi nmu tim dai num sha nga ai shara de du hkra sa nna, Nam Man chya ya let, akyu hpyi ya nu ai. Bu ga masha ni tsun ai hta, Jau gaw, baw nu nyan marai grai kaja ai da e. Ga shadawn sawn hpan zawn re ai hpe sawn ai ten hta mung, lang ta hkren hkren, hkrak hkrak sawn htai lu ai lam rai nga ai. Masha ni laika pa kaw ka nna, sawn taw ai ten, Jau gaw shi a baw nu hte lang ta sawn hpan kau nna, Jau shawng mahtai lu jaw ai da. Dai ram du hkra Jau gaw baw nu nyan marai grai kaja, grai ningtawn ai rai nga ai. Rung magam hte seng ai laika gadun galu yawng ma hkra Jau sha lit la ka lajang ya ai mung nga ma ai. Myi nmu mat ai hpang gaw, Jau hkum nan tsun ya nna, makau kaw marai langai ngai hpe ka shangun ai da, ngut jang yawng bai hti dan rai nna, sharai ra ai kaw sharai di nna, Jau hkum nan masat sen htu rai nga ai. Myi nmu let htu ai rai tim, myi mu ai ni htu ai zawn sha grai tsawm hkra sen htu ai lam tsun da ma ai.

          Jau gaw, sak kaba wa sai hte rau, Madu a shaning (1937) ning July Shata htum wa maga de, hkam ja lam hta ning ra wa sai rai nga ai. Shingrai, Nayu Lay Byin mare na tsi rung kaba kaw tsi tsi hkam la nga sai, Jau hpe sarawun marai (3) tsi gawn lajang ai rai tim, mai wa ai lam n nga ai majaw, Yangon tsi rung kaba de shalai dat masai. Ya na zawn Yangon tsi rung kaba kaw tsi tsi hkam la nga ai ten Madu a shaning (1937) ning August shata (12) ya shani Madu woi la hkrum sai rai nga ai. Nyau Lay Byin na Nawku hpung masha ni, saradaw kaba hpe ahkang hpyi nna, Jau a moi mang hpe Nayu Lay Byin de woi wa masai. Pa-gu kaw jahkring mi shang nna, Nyau Lay Byin de matut woi wa sai. Jau Mee Nyo shi gaw gap da ai Nawku jawng hta lana mi tawn nna, hpang shani shana de (3:00)pm ten hta, Nawku Jawng a sumpraw maga na ginra nta npu kaw lup makoi da sai lam daini du hkra labau shang rai nga sai nu wa ni. Jau n nga mat ai gade nna yang, Japan ni Myanmar mungdan de shang wa ai ten rai nga ai. Dai majaw, Jawng wang kaw nga ai jau ni, mama ni hte hpung masha kaji kaba yawng sanat, bawm, amyawk zawn re hkrit hpa kawn lawt lu na matu kaga shara ni de htawt sit hprawng nga masai. Shingrai, nhkru nkaja myit rawng ai ni gaw, Jau a lup kata de manu dan ai sut gan arung arai ni rawng ai shadu nna, htu shap alai ma ai da. Jau a nrut nra ni hpe mung hkrup mara gabai ayai kau da ya ai lam chye lu ai. Ndai mabyin hpe Chaung-zawk mare kaw magam gun nga ai Wa Jau Mahte chye kau ai re majaw, Nyau Lay Byin mare de sa nna, Jau Mee Nyo a ayai taw ai nrut nra ni hpe hta la nna, mare shinggan na lup wa de bai sa lup makoi da sai lam labau shang rai nga sai ngu, gam garan ya let, ngam nga ai daw hpe du na lamang hta bai hkap madat la nga ga.