Nyau-Lay-Byin Nu Maria a Labau Lam ( daw 3 ) 25 February, 2020

Nyau-Lay-Byin Nu Maria a Labau Lam   ( daw 3 )

         Nu wa hpu nau ni, lai sai lamang hta, Nu Maria hpe Bernedette hpang jahtum na lang mu lu ai lam rai nga ai, Ya na zawn mabyin shiga ndai gaw, lani hte lani grau grau nna, chyam bra wa sai re majaw, shara shagu de na masha ni sa du akyu hpyi wa masai lam na la lu saga ai rai nga ai. Bernedette mahkyit nna pru wa ai hka mung, gau ngwi ngwi hka shi kasha tai wa sai. Dai hka a da-go atsam gaw, hpa rai ta nga jang, Lourdes mare na, nlung dup ai masha langai mi gaw, bungli galaw nga ai ten nmyit mada ai sha, nlung kasha, myi de kahtan shang mat nna, myi nmu na zawn byin wa nu ai. Tsi sarawun ni mung tsep kawp nmai tsi lajang la sai lam tsun dat nu ai. Shing rai, dai masha wa grai myit ru myit kaji nga sai. Hpang jahtum ganing nchye di nna, Lung pu makau de sa nna, akyu hpyi let, dai kaw lwi nga ai hka hte shi a myi hpe kashin ya ai hte myi kata de hka hpe kahte bang bang di nu ai. Kam sham myit a atsam gaw, dai shaloi jang mai mat nhtawm me, makret makrat machyi ai ni yawng mai mat nu ai. Yawng gaw mau nma rai mat masai. Tsi sarawun mung, mau mat ai hte kaja wa nan, Nu Maria hpung da-go atsam nan rai sai, nga nna, sak se hkam tsun dan sai rai nga ai. Bai nna, hpang kalang mi mung, ma langai mi, htan magyi wa wa re ai baw ana byin hkrum nna, si wa hkyen ai ma hpe kanu gaw, Nu Maria lung pu de woi sa nna, lwi nga ai hka de jahkring mi tsing da nu ai. Gade nna yang, ma dai mau na zawn rai mai mat ai hpe mu lu manu ai.

          Ya na zawn mau hpa lamik kumla ni mu mada wa sai re majaw, Madu a shaning (1894) ning hta Nu Maria dan pru dan ai ndai shara hta, Nu Maria sumla langai mi tawn da nhtawm me, akyu hpyi ginra tai wa sai rai nga ai. Dai kawn nna, Nawku Jawng langai mi mung gaw gap la lu masai. Dai aten kawn nna, Lourdes Nu Maria lung pu de masha ni nsim nsa sa du nna, akyu hpyi la nga masai. Hpang jahtum akyu hpyi ginra zawn, Nu Maria sumla hpai gayin hkawm let, akyu hpyi nga sai majaw, Nu Maria a ra sharawng ai lam hpring tsup wa magang sai rai nga ai. Shingrai, Lorudes Mare na Nu Maria a mau hpa atsam ni hpe mungkan mungdan shagu ngu na ram chye wa sai majaw, shaning tup, gadai mung, tinang rau ai aten hta hkan nna, sa du akyu hpyi nga sai lam gaw daini du hkra rai nga ai. Ya na zawn Lourdes Nu Maria chyeju atsam ni gaw shara shagu hta chyam bra wa nga sai. Anhte Myanmar mungdan hta mung, nang, ngai anhte yawng chye ai, Nyau-lay-byin mare na Lourdes Nu Maria mung grai nan hpung da-go chyeju atsam nga ai hpe hkam sha lu nga ga ai re. Rai yang, ndai Nyau-lay-byin mare na Lourdes Nu Maria Lung pu byin pru wa ai lam hpe mung bai madat yu ga.

          Nu wa ni, lai wa sai shaning (126) ning aten, Madu a shaning (1892) ning ram hta, Pe-gu mare a dingdung maga hte Thaung-ngu mare a dingda maga hkan Kahtawlik Nawku Hpung masha ni langai pi nnga ai shi ai. Pe-gu mare kaw chyawm, Nawku Jawng kaji langai mi nga ai lam chye lu ai. Shata mi hta she kalang mi, yangon mare kaba na Jau ni sa nhtawm me, Missa Hkungga nawng jau ya ai, nga ma ai. Shingrai, ndai ginra de, grau nna, Pe-gu mare a dingdung maga na, Nyau-lay-byin mare kahtawng de, Sasana majen je na grai nan ra ahkyak sai lam, wa saradaw Bigandet shingran mu sai hte rau, Wa Jau Perroy hpe sasana majen je na matu Pe-gu de shatsam dat nu ai. Grau nna, dai ginra ni hta Kareen myusha ni nga ai re majaw, dai kareen myusha ni hpang de sasana majen je na matu rai nga ai. Shawng nnan, Wa Jau Perroy gaw Jau Andreas ngu ai kareen myusha Jau hte rau, dai ginra de gawan hkawm manu ai. Dai kawn nna, Jau yen gaw, Shew-chyin mare de sa na matu, Pa-zun-myaung ngu ai de hkawm sa wa ai lam kaw, Muk-hka-mu ngu ai mare kaw Slg. Pu-Lu hte Jan Oh Tsa yen hte hkrum nna, dai yen a nta kaw manam masai. Dai Slg. Pu –Lu yen gaw Jau yen hpe atsawm sha hkalum la nga ma ai.

          Shingrai, Jau yen gaw, dai mayan de gawan gatsan ngut  nna, Yangon de bai wa mat masai. Dai hpang gade nna yang, Pin-tit Jau rai nga ai Wa Jau Micheal Mee- Nyo hpe Jau yen gawan lai wa sai shara de lit magam shatsam shangun dat manu ai. Jau Mee-nyo dai ginra de du ai shaloi, Jau hpe hkaptau hkalum la na, garum shingtau la na gadai mung nnga ai lam chye lu ai. Jau gaw, mai gan sasana Jau re majaw, dai shara ginra ni hta makin jinghku hkum tsun sa, hku hkau manang pi nnga, rai nga ai. Dai majaw, Wa Jau Mee-nyo manan na shara nlu ai majaw, Wan leng daru makau na, manam jarawp kaw jahkring mi hkring sa la nhtawm me, Jau gaw, shi nga na matu, ginsum kasha langai mi shachyaw la nna, nga nga sai. Shingrai, jau gaw, dai ginsum kaw nga let, kahtawng mayan de sa gawan wan rai nga ai. Ya na zawn gawan gatsan ai ten, Slg. Pu-Lu hte Jan Oh Tsa yen hte hkrum nu ai. Dai yen la gaw, Jau a Mungga hpe madat hkam la nna, teng man ai makam masham de sit shang wa let, Kashin kamun Sakramentu hpe hkam la rai, Kahtawlik makam masham de hpung shang wa sai lam gaw labau shang rai nga mali ai re. Ndai Kareen myusha yen la gaw, myit masin grai san seng ai hte makam masham hpe hkap la ai shaning gaw, Madu a shaning ( 1892 ) ning August Shata (3) ya shani re lam Nyau-Lay-byin mare  Nu Maria Lung Pu a labau hta ka matsing da ai hpe mu lu nga mali ai lam gam garan ya let, ngam nga ai daw hpe du na lamang hta bai gam garan ya na nngai law.

Ka lajang ai;    Mama Rose Angeline Maran Nang Doi

                          RVC, Ginjaw Rung, Aung Nan

                          Myitkyina.