Nyau-Lay-Byin Nu Maria a Labau Lam ( daw 12 ) 28 April, 2020

Nyau-Lay-Byin Nu Maria a Labau Lam   ( daw 12 )

         Nu wa hpu nau ni, lai sai lamang hta, Nyau Lay bin Nu Maria Lung Pu hta bang da ai Nu Maria a sumla hpe bawnu nau nhpring ai masha wa, gabai agraup jahten kau ya ai majaw Jau hte rau nawku hpung masha ni yawng grai myit yawn nga ai lam na la lu saga ai. Shingrai, Nawku hpung masha ni, mara dan hkam la ai hku nna, Nu Maria lung pu shawng kaw Rosary hti akyu hpyi, mahkawn mangwi shakawn let hpyi nem tawng ban ai lam chye lu ai. Lai sai lamang ni hta na la lu sai hte maren, Wa Jau Mee Nyo mung Sagu hpung masha ni hpe woi awn nga let, shaning ten ni na wa magang nga sai hte rau, hkamja lam hta ning ra wa nna, shi a hkamja lam a matu, Yangon tsi rung kaba de sa nna tsi tsi hkam la na matu tang shawn nu ai. Shingrai, sarawun langai hte yangon de sa wa masai. Jau gaw, hkamja wa ai lam n nga ai sha, grau grau nna she sawng wa ai lam Jau hkum nan chye kau nu ai. Dai majaw, Jau gaw, Nyau Lay Bin mare na nawku hpung masha ni hpe ndai poi hte seng nna, Shabyin shatai Comity langai ninghtan da na matu, shadum n gun jaw nu ai. Lai sai poi lamang shagu hta, Wa Jau shi langai hkrai sha lit la woi awn galaw mat wa sai rai nga ai. Jau hkamja lam sawng wa sai majaw, shawng ningnan hpaw ninghtan la lu sai shabyin shatai comity kawn nna, hten agrawp mat sai Nu Maria sumla a malai, kaga langai mi lawan ladan galaw la lu na matu shakut manu ai.

Shingrai, Maw-la-myaing sasana hta magam gun nga ai Wa Jau Chavallier gaw, Hpa-do Nawku Jawng a matu mari da ai Nu Maria sumla hpe jaw nu ai. Mau hpa gaw, hten mat sai Nu Maria sumla hte dai sumla gaw, maren sha re majaw, Nyau lay Bin Maria Lung Pu a matu hkrak sha rai mat sai. Dai Nu Maria sumla hpe mying ntsun shangun ai Alu madu marai (2) jawm pawng nna Alu jaw bang ya sai rai nga ai. Shingrai, Nu Maria sumla hpe shaman nna, Lung Pu hta bang da let, yawng gaw apyaw sha akyu ara hkam la lu sai. Nmyit mada ai sha Madu a shaning (1942) ning hta Japan ni shang wa nna, Nu Maria nga ai Jawng wang hpe hpyen dap shatai kau ya sai lam yawn hpa labau rai mat sai. Nu Maria sumla hpe jahkrat nna, lata daw kau nhtawm me, lung pu a shingdu na wut bilat hte galaw da ai hka lawng hta kabai bang kau ya ma ai da. Madu a shaning (1949) ning hta Wa Jau Mahte gaw dai hka lawng kaw na Nu Maria sumla hpe bai shaw la nhtawm me, Wa Jau Aloysius kaw nna, Yangon mare de la sa nna, atsawm sha bai shatsawm la rai, Nyau Lay Bin de bai la mat wa nu ai.

Shaning ten ladaw ni na wa sai hte rau, France mungdan na Sasana Jau ni sa du magam gun ai zawn, San Pra ai Clara Mama Wuhpung ni mung Myanmar mungdan de du shang nna sasana magam gunhpai hpang wa sai. Ndai (Poor Clare Monastery) Mama Wuhpung ni gaw, shinggan masha ni hte nau n hkrum shaga ai sha, Jawng wang kata kaw nga nna, tara shadik ai Mama wuhpung rai nga ai. Grau nna, sasana magam hta shakut nga ai Jau ni a matu lak san akyu hpyi ya ai Mama wuhpung ngu yang mung nshut na re. Shingrai, Myanmar mungdan hta magam gun nga ai Jau ni hte Nawku hpung masha ni a lapran, mahkri shawn, lam shagu hta rawt jat galu kaba, maden jat, zing hka wa na matu, lak san akyu hpyi ya nga ma ai lam chye lu ai. Shingrai Wa Jau Mee Nyo, Pa-gu mare na, Ta-Nat-Pin lam makau kaw Lamu ga Eka 0.770 hte dai shara kaw gaw gap ya sai Nawku Jawng hte bungli garum ai ni nga na nta hpe mung gaw gap ya lu nu ai. Dai lamu ga shara hpe Pa-gu Hkawhkam a lak htak hta, Hkristian hkring mang ni Nawku daw jau akyu hpyi lu na matu, alu jaw bang ya sai re lam labau shang rai nga sai. Dai Jawng wang a loi man hkrum re ai shara hta, Laika sharin jawng langai mi mung nga ai. Dai laika sharin jawng gaw ya daini, Ma kaji ni hte kanu num ni hpe makawp maga ai tsi rung re, nga ma ai.

Dai shara hte Lik-Pya-Kan lapran na, American myusha num langai mi madu da ai, lamu ga masat (193), lamu ga dam (5. 730 ) Eka hpe Wa Jau Mee Nyo a mying hte saradaw kaba Provost hkum nan mari la nhtawm me, Nyau Lay Bin sasana ngu masat ya sai. Ndai American num sha gaw, lamu ga daw mi hpe dut nna, daw mi hpe alu jaw bang ya ai lam rai nga ai. Madu a shaning (1932) ning January Shata (17) ya shani dai lamu ga shara hpe mari la nna, Se-hkam mama ni a matu mai gan mungdan na hkyik hkam dik ai dum nta zawn gap ya nna, ap jaw sai lam labau shang rai nga ai. Shingrai, dai nta gaw Pa-gu mare hta kaba dik hte hkyik hkam dik ai dum nta re majaw, yawng a matu mau hpa, arawng la hpa rai nga ai. Maga mi de mung, English Asuya hte kaga makam masham hpung ni a matu manawn hpa tai wa ai zawn rai nga ai. Ndai zawn hkrit tsang ra ai lapran hta Jau gaw, Nyau Lay Bin mare kaw nna, sa nhtawm me, hkyik hkam ai dum nta hpe ngut hkra gaw gap ya sai lam chye lu ai. Dai hpang, France mungdan na mama ni marai (7) hpe Myanmar mungdan de shaga la nu ai. Shingrai, dai mama ni marai (7) gaw, dai shaning na May Shata (14) ya shani France mungdan kawn rawt wa sai. June shata (8) ya shani Yangon mare de du shang wa sai lam gam garan ya let ngam nga ai daw hpe du na lamang hta bai hkap madat la nga ga.

Ka lajang ai;    Mama Rose Angeline Maran Nang Doi

                          RVC, Ginjaw Rung, Aung Nan

                          Myitkyina.