Nyau-Lay-Byin Nu Maria a Labau Lam ( daw 11 ) 21 April, 2020

Nyau-Lay-Byin Nu Maria a Labau Lam   ( daw 11 )

          Nu wa hpu nu ni, lai sai lamang hta, Madu a shaning (1922) ning kawn Nu Maria a poi hpe Shaning shagu February Shata 10, 11, 12 ya nhtoi shani hta masat galaw nga sai hte kaga hpu nau makam masham de na ni mung Nu Maria kaw asharawng ashara rai sa du akyu ara hpyi la nga masai lam na la lu saga ai rai nga ai. Ndai Nu Maria poi de sa du ai ni yawng gaw, tinang a htunghkring bu hpun palawng ni hpun nna shang lawm ai hpe mu lu ai. Bai nna, n kau kahtawng buga ni gaw, nhtoi 4,5 ya ram lagaw lam hkawm nna sa ai lam chye lu ai. Indian myusha ni mung shanhte a htunghkring pawlawng ni hpun nna sa du akyu hpyi ma ai. Missa Hkungga hpe shani tup ( Hkinghkum mi hta kalang ) nawng jau ya ai. Ndai Nyau Lay Bin mare mayan hte lawu myenmung de gaw Karen myusha ni malawng nga ai re majaw, shanhte yawng chye na ai, Myen myusha ga hku Missa Hkungga nawng jau ya nna, Mungga hpe mung mai byin ai made myen hku hkaw tsun ya ai lam tsun da nga ai. Myen myusha ga hte Missa hkungga hpe Wa Jau J.B Penna kawn woi awn nhtawm me, sen hkum mahkawn mangoi hpe Mr. Leo Mahthtew woi awn la sai lam labau hta matsing da ai hpe mu lu nga mali ai re.

          Nu wa ni, ndai Nyau Lay Bin de Nu Maria kaw sa du akyu hpyi na matu sinpraw, sinna, dingdung, dingda kawn, wan leng hte sa ai ni mung, wan leng ntsa Rosary hti, mahkawn mangoi shakawn rai, sa wa ma ai. Daizawn wan leng ntsa akyu hpyi, mahkawn hkawn ai hpe wan leng lam gade nde hkan na, hkau na hkan bungli galaw nga ai masha ni, Dumsu, Nga Uloi kawn hkawt bungli hkring mat nna, shanhte hpe yu kabu ma ai da e, Tsun mayu ai gaw, ya na zawn Rosary akyu hpyi mahkawn mangoi ai hpe grai ra sharawng ai lam rai nga ai. Nyau Lay Bin mare de Nu Maria kaw akyu hpyi sa ai gaw, Kahtawlik Nawku hpung masha ni sha nre, kaga hpu nau hpung masha ni, mai gan hkan na akyu hpyi hkawm masha ni hte Sasana magam gun Jau ni, Mama ni, Bro ni, Tarahkaw Sara/num ni mung sa du shang lawm ai lam anhte yawng chye chyalu rai nga ga ai. Nu Maria poi nhtoi ten hta jai lang ai, mahkawn mangoi laika buk hpe, Mr. C. Anhtony of Josepn’s Press Rangon kaw nna, alu jaw gam garan ya sai rai nga ai. Sa du akyu hpyi ai ni a matu, myit dik hpa langai gaw, Chyoi Pra Hkum Sakramentu hpe shana tup Nawku tawn kaw tawn da ya ai lam rai nga ai.

          Bai nna, akyu hpyi sa masha ni nlagawn na matu, Lourds Mare kaw Nu Maria dan pru dan ai sumla hpe shana tup madun ya ma ai da. Dai sumla a lachyum ni hpe Wa Jau Michael kawn nna, lachyum bran dan, tsun dan, hkai dan ai lam chye lu ai. Ya na zawn sumla madun, tsun hkai dan, lachyum byan dan ai majaw, akyu hpyi sa masha ni yawng grai ra sharawng ma ai da e. ( 1922) ning hta galaw ai Nyau Lay Bin, Nu Maria Poi gaw malap nlu ai kyu hpyi poi lamang byin tai wa sai lam labau shang matsing da ma ai. Dai shaning na poi hta, Mr.  Anhtony kawn shi a ningrum ningtau jan a myi machyi ai ana kawn lawan mai tsai wa na matu yaw shada let, Hpri hka lawng hta hka paik ni hpe alu jaw bang ya sai. Poi galaw nga ai ten jai lang na matu Hka hpe Hpu nau Bukda makam masham kaw na, SLg Maung Lun Maung A.T.M Mam htu jak madu kawn alu jaw bang ya sai rai nga ai. Bai nna, akyu hpyi sa ai shawa daw sa sha na matu, Coffee hte muk hpe Mr. Barry hte jan Cornelius, Hutton ni kawn nna alu jaw bang ya sai. Hpyu: mare na shadang Ba- Oug, M.L.C hte Mr. Flukes yen kaw nna, kyuhpyi shawa masha ni sha na matu n gu buk (13) jaw bang ya sai lam labau hta daini du hkra mu mada lu nga mali ai nu wa ni. Ndai gaw, Madu a shaning (1922) ning hta galaw ai Nyau Lay Bin mare na Nu Maria Poi a mabyin lam ni rai na mali ai re.

          Myit npyaw hpa langai gaw, Nu Maria poi galaw ngut ai hpang gade nna yang, Nu Maria sumla daw hten agrawp taw ai hpe mu lu ai lam rai nga ai. Mabyin gaw ndai hku re, ( 1929 ) ning shaning nnan du hkyen ai ten shana (11:00) pm ten hta, Nu Maria lung pu hta bang da ai sumla grai tsawm htap let nga taw ai. Nmyit mada ai sha hkying (12:00) pm ten Jawng sarama ni hte Jawng ma ni shaning nnan hpe hkap tau ai hku nna, Nawku Jawng dingsi dum na matu, nawku jawng de sa wa ai shaloi, ya na zawn Nu Maria sumla daw agrawp taw ai hpe mu nna, hkrit gajawng let, myit yawn nga masai. Nu Maria lung pu hta shakap da ai mi hprap wan pu ni gaw, hten ga mat ai lam nnga, mi na raw sha nga taw ai da. Dai majaw, ndai mabyin hpe bai sagawn yu ai shaloi, bawnu nau nhpring ai masha langai, Maria lung pu de lung nna, Nu Maria sumla hpe gabai jahkrat kau ai re lam chye lu masai. Dai shana hta, Wa jau Mee Nyo mung, Pa-gu mare de hpung gawan taw ai ten rai nga ai. Jau bai du wa ai shaloi, ya na zawn yawn hpa mabyin hpe na lu, mu lu ai majaw, Jau mung grai myit npyaw byin nga sai. Hpang shani gaw laban nhtoi mung ang ai re majaw, Jau gaw, Missa Hkungga hta ndai mabyin hpe tsun dan nu ai. Dai majaw, Nawku hpung masha ni, Jau gade ram myit npyaw mat ai hpe sawn lu masai. Chyoi Pra ai san seng ai rai hpe ya na zawn jahten kau ya ai majaw, myit yawn myit malai na matu, hpyi nem tawng ban na matu, akyu hpyi ga ni tsun, htap htuk manu ai mahkawn mangwi ni hte shakawn na matu, lit nga sai lam Jau shadum nu ai. Shingrai, Jau a matsun hte maren, akyu hpyi let mahkawn mangwi shakawn sai lam gam garan ya let, ngam nga ai daw hpe du na lamang hta bai hkap madat la nga ga.

Ka lajang ai;    Mama Rose Angeline Maran Nang Doi

                          RVC, Ginjaw Rung, Aung Nan

                          Myitkyina.