Nyau-Lay-Byin Nu Maria a Labau Lam ( daw 10 ) 14 April, 2020

Nyau-Lay-Byin Nu Maria a Labau Lam   ( daw 10 )

           Nu wa hpu nau ni, Nau Nyau Bin na Nu Maria Lung Pu hpe Mr. D. Silva kaw nna, sumla soi nna gaw gap ya nhtawm me, Missa Hkungga nawng jau ai Nawku tawn hpe gaw, Hpawng-daw-ti na, wanleng daru up Alu jaw bang ya ai lam ai lam chye lu ai. Gaw gap la lu sai Nu Maria Lung Pu nnan hta shawng ningnan Missa hkungga hpe ap nawng ya sai wa gaw, Wa Saradaw Sagrada rai nga ai. Dai hpang, Wa Jau Lanfranconi gaw, No 2 Missa Hkungga nawng jau ya sai lam lai sai lamang hta na la lu saga ai rai nga ai. Missa Hkungga hta Jau gaw, Num ma hkra hta nang alu ndai” ngu ai akyu hpyi ga a lam hpe atsawm sha tsun hkai dan nu ai. Shingrai, yawng gaw, Nu Maria hpe manu shadan nawku hkungga shakawn let, kam hpa manoi manat nga masai. Missa hkungga ngut ai hte sa du shang lawm sai myit su kanu kawa, Du gyi salang ni yawng hpe chyeju dum ai lam tsun shana sai. Dai hpang, anhte Myanmar mungdan Nyau Lay Bin mare de, ya na zawn Lourds Nu Maria sumla hpe lu la ai hte nawku shakawn akyu hpyi la lu ga ai majaw, Lourds Nu Maria shawng ningnan dan pru dan ai, Francs hte Italy mungdan ni a ntsa hta Nu Maria a shaman chyeju lu la mu ga hte, ndai Mungdan lahkawng a matut mahkai grau grau nna mahkri shawn wa mu ga, hkrum hkra wa na nhkru nkaja ai, agung alau lam ma hkra hkoi mat uga akyu hpyi ya dat ai lam ndau shana let, Missa Hkungga hpe shangut la masai.

          Dai hpang, Wa Saradaw gaw, Karen myusha marai (75) hpe n gun shaja Sakramentu hpe jaw ya let, du sa shawa masha ni yawng hte rau, masat sumla ni gayet la ma ai. Dai shana na yup tung Missa ngut nna, akyu sa hpyi ai poi sa masha ni yawng, shi shara hte shi, shi buga hte buga, wa mat ai lam daini na ten marit shingran rai nga ai lam hpaw tsun da ma ai. Ndai gaw, Nyau Lay Bin Nu Maria Poi hpe shawng ningnan galaw lai wa sai mabyin rai nga mali ai nu wa ni. Dai shani kaw nna, ya daini du hkra, shaning shagu Nu Maria poi hpe wu wu di di galaw nga ga ai gaw, nang ngai anhte yawng mu mada lu nga sai hte maren rai nga ai. Shawng ningnan na Nu Maria poi de sa ai ni hta na, lak lai ai langai gaw, Maw-la-myaing mare na asak (80) ning rai sai wa di dingla langai a lam rai nga ai. Asak kaba tim grai zet tsang ai lam chye lu ai. Shi a kashu ni hpe shi hkum nan lit la woi sa ai da e. Ndai asak prat du hkra hkam kaja ai majaw Nu Maria hpe chyeju sa dum ai re, nga nna hpaw tsun da nga ai.

 Saradaw kaba gaw, bat langai ya shani shagu, Wa Sarabyin a matu Missa Hkungga hpe nawng jau ya ai, Missa ngut ai hpang Chyoi Pra Hkum gawan ai lam mung galaw ya ai. Law la ai akyu hpyi sa masha ni law law hta hta, hpaw mi num sha ma (2) mung shanhte a hkam sha lam, Nu Maria kaw akyu hpyi ai a marang e, chyeju hkam la lu ai lam hpaw tsun sak se hkam ai lam chye lu ai. Dai gaw hpa ta nga jang, machyi sawng nna si maw ai kawn bai mai hkam kaja wa ai hte, hkrit kajawng hpa kap ana kawn lawt, mai tsai wa ai majaw, Nu Maria lung pu nga ai Nyau Lay Bin mare de du sa wa ai re  lam rai nga ai. Dai ahkying aten ni hta, Nyau Lay Bin mare de sa na matu, hkrun lam grai yak ai ten mung rai nga ai. Wanleng hte she madung sa ra ai shara ngu jang nshut na re. Dai majaw, wan leng manu laja ai raitim, yawng gaw, Nu Maria kaw akyu ara hpyi la mayu ai re majaw, yak hkrak ai lapran hta shakut sa ai lam chye lu ai. Gade yak hkak jam jau tim, akyu hpyi sa ai masha gaw, yawm wa ai lam n nga, laning hte laning grau grau nna she law jat wa ai hpe mu lu ai. Dai gaw, Nu Marai hpe kam sham, kam hpa ai myit a majaw rai nga ai. Kaja wa mung, Nu Maria kaw sa du akyu hpyi la ai ni yawng akyu hkam sha ai hpe chye lu ai.

          Shingrai, ya na zawn akyu hpyi masha grau grau law wa ai re majaw, Madu a shaning (1922) ning kawn Nu Maria a poi hpe Shaning shagu February Shata 10, 11, 12 ya nhtoi shani hta masat galaw nga sai rai nga ai. Nu Maria hpe kam sham ai masha gaw, maning na hta grau law ai hpe mu mada lu ai. Ndai poi de Kahtawlik makam masham nre ai, kaga makam masham de na hpu nau ni, (3500) jan sa du shang lawm akyu hpyi la ma ai lam labau shang rai nga sai. Dai shaning na February Shata (10) ya bat manga ya shani Nu Maria dawng hkawn hpe sharawt mara nna, Nawku Jawng wang hpe shing grup, Rosary hti akyu hpyi nhtawm me, Chyoi Pra Hkum gawan akyu hpyi shaman hkam la masai. February (11)  ya, bat (6) ya shani gaw, jahpawt jau jau kaw nna, akyu hpyi ai lamang ni galaw ai, dai hpang Missa Hkungga nawng jau ai, Alu kumhpa ap jaw ai lamang ni galaw ai hte Rosary hti ai lamang ni hpe galaw ma ai. Sa du akyu hpyi ai masha yawng gaw, Nawku Jawng hkan, Nu Maria Lung pu hkan lahput hput di nhtawm me, chyeju akyu ara ni hpe hpyi la nga ai gaw, daini du hkra labau shang rai nga  sai re. Mungkan ting hta mung, ndai February shata hta, Nu Maria hpe Hkungga shakawn, Rosahti akyu hpyi nga ma ai gaw, anhte yawng chye chyalu rai nga ai. Nu wa ni, Chyoi Pra ai Kahtawlik Nawku Hpung gaw, dan hkung nga mali ai re. Hpa majaw nga jang, ya daini na ten, Mungkan ting hta, Kahtawlik hpung masha ni sha nre, kaga hpu nau ni mung, Nu Maria Lung Pu nga ai de sa nna, akyu ara chyeju ni hpyi la nga ga ai hpe mu lu nga mali ai. Yawng gaw, Nu Maria kawn nna, sumsing lamu na Kawa Karai Kasang hpang de myit masin langai sha hte nsen langai sha hte akyu chyeju ni hpyi la nga ai, rai nga ai ngu, gam garan ya let ngam nga ai daw hpe du na lamang hta bai hkap madat la nga ga.

Ka lajang ai;    Mama Rose Angeline Maran Nang Doi

                          RVC, Ginjaw Rung, Aung Nan

                          Myitkyina.