Nyau-Lay-Byin Nu Maria a Labau Lam ( daw 1 ) 04 February, 2020

Nyau-Lay-Byin Nu Maria a Labau Lam   ( daw 1 )

          Nu wa hpu nau ni, Shawng nnan, Pin-tit Mungdan Lourdes Nu Chyoi Pra ai Maria dan pru dan ai hte mau hpa lamik kumla byin wa ai labau lam hpe shawng madat yu ga. Ndai Lourdes mare gaw, Pyin-tit mungdan a dingda maga na tsaw dik ai Bum lagaw kaw nga ai mare rai nga ai. Madu a shaning (1858) ning February Shata (11) ya shani Bernedette hte rau, kanau Mary hte htingbu kasha James ni, marai (3) gaw, nam de hpun hta na matu sa wa ma ai. Shanhte marai (3) gaw, hpun law law lu na re ngu myit mada ai Lung pu nga ai de, sa wa masai. Dai lung pu shawng kaw hka shi kasha langai mi mung loi nga ai. Dai hka shi kasha hpe rap nna she, lung pu de du ai rai nga ai. Dai hka shi hka gaw mala la katsi ai lam chye lu ai. Dai hka shi hpe rap jang, shanhte marai (3) hte hkyep din, maw za ni raw nna she rap ra ai rai nga ai. Shingrai, Mary hte James yen, shan a hkyep din, maw za ni raw nna rap mat wa sai. Bernedette chyawm gaw, mala la katsi ai dan hpe n lu hkam nna, hka hkin gau hkan nga ai nlung tawng ni hpe hta la nna, hka de gabai bang nhtawm me, dai nlung tawng ni hta gabye nna, rap na hku lajang taw nga sai. Raitim, dai hka shi kasha gaw, hka hpun la grai ja ai re majaw, nlu rap byin taw nga sai. Hpang jahtum Bernedette gaw shi a mawza hpe raw nna, hka madi hkam nhtawm me, rap na hkyen nga yang, nmyit mada ai sha, hpung tsi wa gayet ai zawn nga nna, hkam sha dat nna, jahkring mau mat nu ai.

          Bernedette gaw, makau hkan nga ai tsing du ni hpun ni hpe yu dat ai shaloi, hpa mung nshamu ai sha zim rai taw ai hpe mu nna, mau taw sai. Tim, Bernedette gaw, kalang mi bai rap na matu hkyen dat ai hte, mi na zawn sha, nbung katsi aja wa bung wa ai hpe hkam sha dat nu ai. Shingrai, Bernedette gaw, lung pu de gayin yu dat nu ai. Dai shaloi, sumpan ahpraw lawai nna, mawn sumli da ai, grai nan tsawm ai num sha ma langai mi hpe mu dat ai majaw, kajawng ai hte mau mat sai. Bernedette mu dat ai num sha ma gaw, asak (16) ning daram sha naw re ai, grai hkalung tsawm ai, san tsawm ai myi man nsam hpe mu dat nu ai. Dai num sha ma gaw, hpaw tsawm ai sum pan ahpraw hpe bu hpun da nhtawm me, nshang kaw lamu kap nsam shingkyit hpe kyit da ai hpe mu lu nu ai. Bai, baw kaw mung, ja nsam sumri kaw ahpraw nsam rosary kachyi langai, mawn tawn da ai hpe mu lu ai. Shingrai, Bernedette gaw, shi lang da ai Rosary hte Wudang masat galaw ai shaloi, dai num sha ma mung, wudang masat hpe galaw dan nu ai.

          Bai nna, Bernedette lahput hput di nna, Rosary hti akyu hpyi ai shaloi, dai num sha mung lahput hput di Rosary hti akyu hpyi nga sai. Dai num sha ma gaw, Rosary hpe langai hpang langai hti taw ai hpe Bernedette mu taw nga sai. Raitim, n gup galem shamu ai gaw nmu ai da. N gup galem shamu ai hpe nmu lu tim, Rosary daw mi hti ngut shagu, Bernedette hte rau, wudang masat galaw ai gaw mu taw nga ai. Rosary hti ngut ai shaloi, Bernedette hpe lata awak nna, shaga taw nga ai. Dai hpe mu ai Berneette nsa gwi, hkrit taw nga ai ten dai num sha mat mat sai rai nga ai. Ndai zawn byin ai mabyin hpe Bernedette gaw nta de wa nna, kanu kawa dum nta masha ni hpe tsun dan nu ai. Bernedette a kanu gaw dai lam hpe na nna, kasha hpe myit pawt let, kayet da nu ai. Bernedette gaw, lahkawng ya din ai hpang, myit hta dai num sha hpe grai bai mu mayu wa ai re majaw, shi a manaw manang ni hte rau, Nawku Jawng na shaman ntsin hpe la rai, dai lung pu de bai sa wa masai. Dai lung pu kaw du ai hte yawng lahput hput di let Rosary hti akyu hpyi nga ma ai. Shawng na Rosary daw mi hti ngut ai hte, Bernedette gaw, htaw gaw htaw gaw, ngai hpe mani dan nga ai, ngu kajawng kaja marawn dat nu ai. Bernedette a myi man nsam mung, lang ta kabu pyaw ai nsam hte tsawm taw nga sai.

          Bernedette gaw, dai num sha a makau de sit sa wa nna, “lama na, Karai Kasang kaw nna sa wa ai teng jang, shawng de lagaw lahkam mi sit sa wa rit, nrai jang gaw, nhtang mat wa u” ngu tsun dat ai hte, dai num sha shawng de sit wa nna, Berneette hpe grai tsawra ai myi man nsam hte mani sum sai myi man madun dan nu ai. Dai majaw Bernedette a kraw salum hta mung katsi pyaw ai hte asan nga, pyaw mat ai sha n ga, mani sum sai myi man hte zim rai yu tsap taw nga sai rai nga ai. Nu wa ni, ya na zawn lung pu hta mu lu ai num sha gaw, Chyoi Pra ai Nu Maria re ai gaw, mau hpa lamik kumla ni hta adan sha rai nga ai. Bernedette gaw hpang kalang num hpaw mi (2) hpe saw shaga nna, Nu Maria nga ai lung pu de bai sa wa masai. Lung pu de du ai hte Bernedette gaw, “htaw gaw, ngai tsun dan ai Num sha du taw nga sai,” ngu tsun let lahput hput du nhtawm me, Rosary hti akyu hpyi taw nga masai. Daizawn shanhte akyu hpyi nga ai ten, Bernedette hte hkan sa ai hpaw mi num sha (2) gaw, Bernedette hpe laika pa hte mahkret shingna jaw nna, ra sharawng ai lam hpe ndai laika pa kaw ka ya rit, ngu Bernedette hpe tsun shangun manu ai. Bernedette mung, Nu Maria kaw sit shang wa nna, “ nang kanu a amying hte ngai kasha hpe shangun rit, nang kanu byin mayu ai lam hpe ka ya rit “ ngu hpyi shawn nu ai. Nu Maria mung sumsai myi man hte sit sa wa nna, ngai a ra sharawng lam hpe ndai kaw ka nra ai, nang kasha mahtang ndai shara de (15) ya tup sa wa rit ngu htet dat sai lam gam garan ya let, Lourdes Nu Maria lung pu byin pru wa ai lam hte chyeju atsam ni a lam ngam nga ai daw hpe du na lamang hta bai hkap madat la nga ga.

Ka lajang ai;    Mama Rose Angeline Maran Nang Doi

                          RVC, Ginjaw Rung, Aung Nan

                          Myitkyina.