Nyau-Lay-Byin Lourds Nu Maria a Labau Lam ( Daw 19 ) 16 June, 2020

Nyau-Lay-Byin Nu Maria a Labau Lam    ( daw 19 )

          Nu wa hpu nau ni, lai sai lamang hta, Nyau Lay Byin mare na Chyun:-htik ngu ai kahtawng hta, shawng ningnan lang galaw ai, Chyoi Pra Hkum Poi kaba hta, Masha marai (100) jan Chyoi Pra Hkum hpe nnan hkam la lu sai re majaw, yawng gaw grai kabu myit dik nga masai lam na la lu saga ai rai nga ai. Matut nna Nyau Lay Byin Sasana a labau lam bai madat yu ga. Madu a shaning (1955) ning hta Saradaw kaba Victor Bazin gaw, dai shaning hta sha Wa Jau Wee hpe Nyau Lay byin sasana bai gaw gap na matu ap ya nu ai. Bai nna, majan a majaw shaning law law kau da sai Nyau Lay Byin mare buga kahtawng shagu de na Chyoi Pra Hkum lu sai hpung masha ni hpe n gun shaja sakramentu jaw na matu Jau hpe shadum n gun jaw dat nu ai. Shingrai, Jau hpe garum na matu, Pahtein sasana na, San Francis Xavier Brohter (2) hte Mama Marai (3) hpe garum hpyi dat nu ai. Gade nna ai sha dai Brohter (2) hte mama ni (3) gaw, Nyau Lay Byin mare de du shang wa sai rai nga ai. Dai hpang Jawng dung Jau Wee hte rau, Brohter yen hte mama ni Hpa-do ngu ai mare de mawdaw hte rawt sa wa  masai. Dai mare kaw lani mi yup hkring sa la nna, hpang jahpawt hta Bro yen hkawng hpe Chaung –zawk mare de matut sa shangun nna, Nawku hpung masha ni hpe tara laika sharin ya na matu shatsam dat sai rai nga ai.

          Nu wa ni, Hpa-do mare de Wa Saradaw du ai ten, N gun shaja Sakramentu hpe jaw na matu shana da sai hte maren, Chaung-zawk na Bro hte n gun shaja hkam na masha ni yawng Hpa-do mare de  dum su leng hte sa wa masai. Hpang jahpawt, du sa ai Nawku hpung masha ni yawng zuphpawng nna, Wa saradaw hpe hkap tau la na matu ala nga masai. Gade nna yang, Wa saradaw Nawku Jawng wang de du shang wa ai hte, Nawku Jawng na dingsi dum shangoi ai hte hpung masha ni yawng mahkawn mangwi hte kabu gara hkap tau la ma ai lam labau shang rai nga sai. Wa saradaw mung, shi a sagu hpung masha ni ya na zawn hkaptau hkalum shakram la ai hpe kabu nma, myit pyaw nga sai. Du ai shana gaw, sagu hpung masha ni hte shaga let, buga na num hpung, la hpung, ram hpung hte ma kaji ni kawn ka manawt, mahkawn mangwi hte shangwi shapyaw la sai rai nga ai. Wa Saradaw a matsing buk hta, ya na zawn buga na sagu hpung masha ni hpe mu lu ai majaw hte kabu gara hkap tau la ai hte, ndai nlaw hte mi Nawku Hpung masha ni hpe mu lu ai majaw, grai myit dik kabu ai, nga nna matsing da ai hpe mu lu ai. 

          Nu wa ni, majan hkoi mat ai hpang gade ram yak hkak jam jau ai lapran hta, shakut shaja let, ya na zawn nawku hpung masha ni, mare buga masha ni, myit ndaw ai sha, Karai Kasang hpe kam hpa let, Nu Maria kaw manoi manat akyu hpyi ai lam a, apu asi ni re hpe Wa saradaw mu mada nna, shawng lam sasana grau nna rawt jat wa na matu, buga na Jau ni hte matut shakut nga sai rai nga ai. Hpang jahpawt hta, Wa Saradaw kaw nna, du sa ai shawa masha hpe Misa Hkungga Nawng Jau ya let, n gun shaja Sakramentu hpe jaw ya sai lam Nyau Lay Byin ginwang up Wa Jau Wee, shi a labau hta ka matsing da nga mali ai re. Dai sasana hta sa garum la sai Bro yen hte Mama ni a shakut shaja ai a majaw, N gun shaja hkam la sai ni marai (45), Chyoi Pra Hkum nnan hkam la ai ni marai ( 25), Kashin kamun hkam la ai ni marai ( 7), shaning hkun ning jan, nawku jawng mung nsa, chyoi pra hkum mung nhkam, mara mung nraw re ai masha marai (4), dai shani na Misa Hkungga hta shang lawm let, Sakramentu ni hpe hkam la lu shajang sai lam malap nlu labau shang tai nga sai re. Misa Hkungga Nawku daw jau ai lamang ngut ai hte shana de daw hta, Wa saradaw kaw nna, Nyau Lay Byin Jau ginwang a shawng lam masing masa ni hpe bawng ban jahkrup let, masing jahkrat da ya lu nu ai.

          Jau ginwang ting na nawku hpung masha ni yawng mung, shawoi na htan grau shakut shaja na matu, n gun atsam nnan ni jat bang la lu masai. Shanhte a myit n gun lu ai hpe Wa saradaw mu lu ai majaw, ndai jau ginwang, mare kahtawng buga gaw, lawan rawt jat wa na re, nga nna wa saradaw hpaw tsun da ai hpe chye lu ai. Saradaw gaw, hpawng jahpawt hkying 10:00 Am aten ram hta, Chaun-zawk mare de dumsu leng hte matut hpung gawan mat wa nu ai. Dai shana de, dai mare na nawku hpung masha ni sha n ga, hpu nau bukda makam masham de na ni mung sa du nna, Wa saradaw hpe sa du shakram, hkungga jaw, sa shaga ma ai lam labau hta matsing da ai hpe mu lu ai. Hpang jahpawt manap ten hta, Wa saradaw kawn Misa Hkungga nawng ya ai, Dai nawku daw jau lamang hta, masha marai (25) n gun shaja Sakramentu hpe hkam la lu sai rai nga ai. Dai sa garum Bro. yen a shakut shaja ai a majaw, shaning (15) ning tup nawku jawng hte tsan gang mat wa sai hpung masha marai (4) gaw, Nawku Jawng de bai gayin wa nna, kaja ai Hkristian masha bai tai wa sai lam gaw, mau hpa chyeju nan rai nga mali ai re. Bai, Chyoi Pra Hkum hpe nnan hkam la ai masha marai (15) hte, hkungran ga shaka hkam la ai marai (4) rai nga ai. Nu wa ni, ndai gaw, Nawku hpung a matu apu asi nnan ni rai nga mali ai re. Wa saradaw gaw, dai kahtawng kaw mung, hpung masha ni hpe shawng lam masing masa ni tsun, hpaw hpang da ya nna, dai shana de Ginwang up Wa Jau Wee hte Nyau Lay Byin mare de nhtang wa sai. Wa saradaw gaw, yangon mare de garai nwa shi yang, Jau ginwang ting na Wa La ni hpe shaga nna (2) ya, sharin dabang gadun hpe galaw ya sai, dai dabang hta marai (14) sa lung la sai lam labau hta matsing da ai hpe gam garan ya let ngam nga ai daw hpe du na lamang hta bai madat la nga ga.

Ka lajang ai;    Mama Rose Angeline Maran Nang Doi

                          RVC, Ginjaw Rung, Aung Nan

                          Myitkyina.