Nursia Mare na, San Pra ai Benedict a Poi Nhtoi (July 11) 11 July 2023

Nursia Mare na, San Pra ai Benedict a Poi Nhtoi (July 11)

San Pra ai Benedict gaw, Sinna Dan na Tawra Jau, Westen Monks ni a kaji mung daju rai nga ai. Shi gaw, lai wa sai A.D (480) ning, March shata praw (2) ya shani hta Italy Mungdan, Nursia Mare kaw shangai chyinghkai wa ai rai nga ai.

Roma mare kaw shi hte rau nga ai jawngma ni a mazut la dik ai sat lawat ni hpe yu kajawng mat ai majaw, shi a asak (20) ning hta Subiaco Bum de sa nga mat wu ai. Lani mi na nhtoi hta satan gaw, Benedict hpe shi shawng de mu ga sai grai tsawm la ai shayi sha langai mi a nsam hte shingran madun dan wu ai shaloi Benedict mung dai tsawm la ai shayi sha hpe grai nan tsawra myit a kajawng sha hkam sha wa nu ai. Dai shaloi jang shi gaw, buhpun palawng ni raw kau nhtawm, ju sumwum kata de taleng shang wa ai. Ndai zawn hkum hkrang kaw hkam sha ai nma ni gaw, shi a wenyi kaw hkam sha nga ai nma ni hpe tsi shamai kau ya lu mat ai.

Benedict gaw, Subiaco Bum Ntsa e, San Pra ai Romanus hpaji jaw matsun ai hte maren, akyu hpyi shaja, jam jau hkam sharang let tara shakut nga wu ai. Shi a San Seng San Pra ai myit jasat ni hpe mu nna masha law law shi  hpang de du wa ma ai. shanhte nga na matu nta ni gaw gap ya nhtawm, hkansa tara hkrang masat, Prescribed Rule hte nan woi nga wu ai. Shi masat da ai dai hkan sa tara hkrang ni gaw, shi nsa hti mat ai hpang mung, Sinna Dan na Sasana Magam Gun Wuhpung ni a matu, npawt nhpang hkan sa tara madung tai wa sai rai nga ai. Monte Cassino Tawra Jawng kaba, Abbey hpe mung shi gaw de hpang da ya sai; Dai jawng gaw, Uropa Dan Sasana Magam Gun Wuhpung (Religious Congregations) ni a Ginjaw tai wa sai.

Ora et Labora “Akyu Hpyi hte Bungli Galaw” ngu ai ga malai hte maren, shi a Tawra Jau ni gaw, lani mi hta nari hkying hkum matsat akyu hpyi, Hkying hkum matsat yup, hkying hkum matsat bungli galaw, makam masham laika hti, matsan dum lama ai magam bungli galaw nna nga ma ai.

Goths (Fransik) Hkawhkam Totila gaw, Italy mungdan hpe shang gasat ai aten hta shi a du up daju langai mi hpe shi a hkawhkam buhpun jahpum nhtawm, Benedict hpe chyam ai hku nna shi hpang de sa shangun ai. Benedict gaw, mu ai hte hkawhkam n re ai lam hpe chye ai  majaw, Totila Hkawhkam mahtang Benedict hpe hkungga sa jaw shagrau wu ai.

Benedict gaw, Jau garai n tai, Brother sha naw rai shi yang,A.D (547) ning, March shata (21) ya shani, Monte Cassino Tawra Jawng kaw sha, Madu hta yup pyaw ban sa mat wa sai rai nga ai.

Shi n nga mat ai hpang, 1220 ning hta, dai aten na, Wa Sarabyin Honorius (3) kawn, Shi hpe San Pra ai Masha dang dat let, Shi a Poi Nhtoi hpe mung, July shata (11) ya shani masat shagrau dat ya sai rai nga ai.

San Pra ai Benedict hpe “Uropa Dan a Kam Shamyet ai San Pra ai Masha” (Patron of Europe) nga nna masat shagrau da nga ai. Shi a hpang hkan, Benedictine Tawra Jau Wuhpung gaw, Nawku Hpung a matu, Sarabyin ni marai (50), Saradaw ni marai (7,000) hte San Pra ai Masha marai (40,000) hpe shalat dat ya sai rai nga ai.

Daini Nawku Hpung gaw, Nursia Mare na, San Pra ai Benedict a Poi Nhtoi hpe galaw nga ai aten hta, anhte Hpung Masha ni mung, dinghta ga a nkaja ai nat satan a agung alau ni hte hkrum kadup wa ai raitim, Karai Kasang Wa hta manoi manat let, mai kaja ai sak prat hte hkawmsa lu ai ni byin tai lu hkra shakut sa wa nga ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)