Nu Maria a Yawn Hkyen Lam Ni (September 15) 15 Sept 2023

online image

Nu Maria a Yawn Hkyen Lam Ni (September 15)

Nu Maria a Yawn Hkyen Lam Ni hpe myit dum ai lamang hpe daini Nawku Hpung galaw nga ga ai re. Maria gaw, Wenyi hte seng nna mung, Madu Yesu a nni nkri yubak hkam ai lam ni hte seng nna mung, yawn hkyen grai hkrum lai wa sai.

Myit dum masat hkrat wa ai Nu Maria a alak mi rai hkam sha lai wa sai yawn hkyen lam ni gaw : (1). Nawku Htingnu kata Simeon tsun ai myihtoi ga, (2). Egypt Mungdan de hprawng yen mat ra ai, (3). Nawku ngut ai hpang Ma Yesu hpe shamat kau ai, (4). Kalawari Kawng ntsa de Madu Yesu Wudang hpai lung wa ai, (5). Wudang ntsa Madu Yesu jen noi sat hkrum ai, (6). Wudang ntsa kaw na Madu Yesu a moi mang hpe jahkrat la ai hte (7). Madu Yesu hpe makoi mayang ai mabyin hte mahkrum madup ni rai nga ai.

Nu Maria a Yawn Hkyen Lamang hpe lai wa sai 1668 ning kaw nna, “Maria Magam Gun Wuhpung ni” (Servants of Mary) kawn nhtoi masat galaw hpang dat rai nga ai. Dai hpang 1814 ning hta gaw, dai aten na Wa Sarabyin Pius (7) kawn Nawku Hpung ting a matu masat shagrin ya sai. Ndai Nu Maria a Yawn Hkyen Lam hpe myit dum shagrau ai lamang hpe Wudang a shingkang shingwang shagrau poi galaw ai September (14) ya a hpang shani September (15) ya shani hta galaw ai rai nga ai. Madu Yesu Wudang a Awng Padang Poi Nhtoi hte seng nna, shi a nni nkri hkam ai hta Nu Maria hkan hkam sha lawm ai lam hpe myit dum ya na matu, rai nga ai.

Nu Maria a Yawn Hkyen Lam (7) hta Chyoi Pra ai Kru Ya Shani, Madu Yesu lup kata kaw makoi mayang tawn ai mabyin hpe, Nu Maria hkrai sha kam sham myit hte hkam sharang nna mada mu ai lam hpe shadum ya na matu hte Laban (6) ya shani Nu Maria hpe laksan hkungga myit dum ai nhtoi ngu nna masat da ai lam rai nga ai.

Daini Nawku Hpung gaw, Nu Maria a Yawn Hkyen Lam Ni hpe Myit dum sumru yu ai lamang hpe galaw nga ga ai aten hta, anhte Hpung Masha ni mung, Nu Maria hte arau shi hkam sha lai wa sai nni nhkri lam ni hpe myit dum sumru ai lam ni hpe jawm galaw nga ga law.

 

By;

Sister Rose Angeline Maran Nang Doi (SFX)

RVA-Kachin Service (Myitkyina)

         

 

Add new comment

3 + 14 =