Nu Maria a Yawn Hkyen Lam Ni (Our Lady of Sorrows)_(September 15)

           Nu Maria a Yawn Hkyen Lam ni hpe myit dum ai lamang hpe daini Nawku Hpung galaw nga ga ai. Maria gaw wenyi hte seng nna mung, Madu Yesu a nni nkri yubak hkam ai lam ni hte seng nna mung, yawn hkyen grai hkrum lai wa sai. Myit dum masat hkrat wa ai Nu Maria alak mi rai hkam sha lai wa sai yawn hkyen sanit gaw:

1). Nawku htingnu kata Simeon tsun ai myihtoi ga

2). Egypt mung de hprawng yen mat ra ai

3). Nawku ngut ai hpang Ma Yesu mat taw ai

4). Kalawari Kawng ntsa de Madu Yesu Wudang hpai lung wa ai

5). Wudang ntsa Madu Yesu jen noi sat hkrum ai

6). Wudang ntsa kaw na Yesu a moi mang hpe jahkrat la ai

7). Madu Yesu hpe makoi mayang ai mabyin hte mahkrum madup ni rai nga ai.

          Ndai Nu Maria a Yawn Hkyen Lam ni hpe 1668 ning kaw nna, "Maria a Magam Gun" wuhpung ni, Servants of Mary, nhtoi masat nna galaw hpang ai rai nga ai. Dai hpang 1814 ning hta Wa Sarabyin Pius (VII) gaw Nawku Hpung ting a matu masat shagrin ya ai. Ndai hkungga shagrau ai poi lamang hpe Wudang a shingkang shingwang shagrau poi galaw ai September (14) ya a hpang shani, September shata (15) ya hta galaw ga ai. Madu Yesu a Wudang Awng Padang Poi nhtoi hte seng nna, Shi a nni nkri yubak hkam ai hta Nu Maria hkan hkam sha lawm ai lam myit shadum ya na matu rai nga rai nga ai.

          Yawn Hkyen Sanit hta Chyoi pra ai Kru Ya shani, Madu Yesu lup kata kaw makoi mayang tawn ai mabyin hpe, Nu Maria hkrai sha kamsham myit hte hkam sharang nna mada mu ai lam hpe shadum ya na matu, Laban Kru ya shani Nu Maria hpe laksan hkungga myit dum ai nhtoi ngu nna masat da ai rai nga ai.

          Daini, Nu Maria a Yawn Hkyen Lam Ni hpe myit dum sumru galaw nga ai aten hta, anhte hpung masha ni mung, myit yawn myit malai let, Nu Maria hte rau, Madu Yesu a nni nkri Wudang hkrun lam hpe myit dum sumru nna, anhte Wenyi lam hpe bai shading sharai la nga ga law.

 

By;

Sister Rose Angeline Maran Nang Doi (SFX)

RVA-Kachin Service (Myitkyina)

Add new comment

3 + 5 =