Nu Maria, Sumsing Lamu de Woi Shalun La Hkrum ai Poi (August 15) 15 August 2023

Nu Maria, Sumsing Lamu de Woi Shalun La Hkrum ai Poi (August 15)

Ginding ga asak htum ai hpang, Nu Maria gaw Sumsing lamu ja mungdan de hkum hkrang hte wenyi nawng shalun la, shagrau ya hkrum ai nga nna kamsham ga ai. Ndai tengman ai lam hpe moi kaw nna sharin shaga hkrat wa sai; dai hpe Wa Sarabyin Pius (12) gaw shi a sharin shaga laika Buk; “Munificetissimus Deus: hta makam masham zawn kam ai sharin shaga lam, as a dogma of faith” nga nna 1950 ning hta masat shagrin shabra dat sai rai nga ai.

Nu Maria hpe Ephesus mare kaw Kasa Yawhan e yu gawn nga ai hpe ja chyum mungga ni hta anhte hpang jahtum mu lu ga ai. Nawku Hpung gaw, Nu Maria nsa hti ai, shing n rai yup pyaw mat ai, nga nna n ginhka dan ai. Nu Maria a hkum hkrang gaw, n hten n run ai sha, masha yawng bai hkrung rawt na nhtoi a shawng lam tai nna, lamu ja mungdan de shalun la ai hkrum ai re, nga nna kamsham ga ai. Nu Maria gaw, Karai Kasang Wa e alak mi rai shagrau ya ai lak san ahkaw ahkang lu ai jan mung rai nga ai.

Assumption: “Lamu Shalun La Hkrum ai” sharin shaga lam gaw, Nawku Hpung matut ding yang madi shadaw hkrat wa ai hte Shingran Laika hta e mung madi madun da ya nga ai. “Sumsing lamu kata e mau hpa amu kaba dan pru ai gaw: ajan lawai nna, shata kabye ai hte, shagan shi lahkawng kap ai ja janmau gup tawn ai numsha langai mi dan pru ai.” nga nna mu hti lu nga ga ai re. (Shingran Laika 12:1)

Daini Nawku Hpun gaw, Nu Maria hpe Lamu De Woi Shalun La ai Poi Nhtoi shani hta alak mi rai nna, Nu Maria gaw, anhte kashu kasha ni a ra rawng ai lam hpe Karai Kasang Wa hpang de hpyi htinglu htinglai ya u ga matu, Rosary hti akyu hpyi la nga ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)