Npawt Shut Hpyit Mara N Kap ai Sha, Na-um Na-sin wa ai Nu Maria a Poi Nhtoi (December 8)

“Shing gyim masha ni a Hkye La Madu rai nga ai, Madu Yesu Hkristu a matu, mahkra dang chye ai Kawa Karai Kasang gaw, lak san shaman chyeju hte ahkaw ahkang jaw ai majaw, Kanu a hkritung kaw Masha sa tai hpang ai aten kaw nna nan, Chyoi Pra ai Hkawnsek Maria gaw, npawt shut hpyit mara kaw nna tsep kawp lawt ai jan rai nga ai.” ngu nna Nawku Hpung gawk am let hkap la hkrat wa ai rai nga ai.

Lahta kaw na, Nawku Hpung a makam masham ga yan gaw, 1854 ning, December shata (8) ya shani, Wa Sarabyin Pius (IX) a matsun maroi laika “Ineffabilis Deus (Shing N rai) N shut n shai lu ai Karai Kasang” hta Ja Chyum Mungga hte Nawku Hpung hkan shatup hkrat wa ai masing (Based on Bible and Tradition of the Church) hpe madung tawn nna masat da ya ai gay an rai nga ai.

Chyoi Pra ai Hkawnsek Nu Maria hte satan matse wa gaw gara hku nna mung shadawn n lu nga ai. Ndai lam hpe (Npawt Nhpang Laika 3:15) hta: “Nang hte dai num a lapran, sahda hpyen shatai ya na we ai.” Bai nna Lamu Kasa Gabriel gaw, Nu Maria hpe ga sa shana ai shaloi: “Ave, Maria, chyeju hte hpring nga ndai; Madu gaw nang hte arau nga nga ai.” (Luka 1:28) nga ai ga hte jahkum shatsup shadik ya sai rai nga ai. Lahta na Lamu Kasa a ga hpe “Num mahkra hta nang ga a-lu htum rai nga ndai.” (Luka 1:42) nga nna San Pra ai Elizabeth, Nu Maria hpe hkap shakram ai ga hte madi shadaw da ya nga sai.

Tsa ban ka-ang lapran ni hta “Nu Maria npawt shut hpyit mara n kap ai sha na-um na-sin wa nna shangai wa ai” ngu ai makam masham ga baw hte seng nna, Nawku Hpung kata tsun jahta htai lai hkat ai lam kaba nga lai wa sai. Dominican Jau ni hte Karai Kasang hte seng ai machye machyang hta kung kyang sai Theologian nkau, Ga Shadawn – Bernard hte Aquinas ni gaw: “Nu Maria gaw, Kanu a hkritung kaw Na-um na-sin wa nna npawt shut hpyit mara hta shangai wa ai.” nga nna hkap la ma ai.

Shanhte hkap la ai masing hpe Franciscan Jau ni hte Duns Scoto gaw n hkap la ma ai. Karai Kasang rai nga ai Madu Yesu a Kanu gaw, tsep kawp mara n kap ai sha shangai wa ai. Maria gaw, kaning re ai mara hte mung shangai na n rai, teng sha n mai byin ai, nga nna shanhte bai mahtai jaw ma ai. Ndai zawn tsun jahta htai lai ndang hkat ai lam hpe 1854 ning hta Wa Sarabyin Pius (IX) jahkring jasim kau ya sai rai nga ai.

Wa Sarabyin a matsun ga hta: “Shing gyim masha nga yawng nga pra hpe hkyen la na Madu a Kanu shatai na matu Nu Maria hpe, shi a kanu a hkritung hta masha asak sa la ai, na-um na-sin ten kaw nna tau hkrau Karai Kasang gaw, shi hpe npawt shut hpyit mara kaw na tsep kawp shalawt da ya na sha rai nga ai.” nga ai.

Ndai Wa Sarabyin a sharin matsun ai makam masham tara masing, Dogma hpe anhte Hpung masha ni kabu gara arawng la nna hkap la nga ga ai re. Nawku hpung a ningbaw Wa Sarabyin sharin matsun ai lam hpe 1585 ning hta Nau Maria gaw, Bernadette kaw sa dan pru nna sakse sa hkam ya ai hpe Nawku Hpung lu la ai.

1858 ning hta, Nu Maria gaw, Bernadette hpe Lourdes mare makau kaw sa dan pru ai shaloi, Bernadette gaw, Nu Maria hpe: “Na a mying kaning nga ai rai ta?” ngu san ai. Nu Maria gaw, “Ngai gaw npawt shut hpyit mara n kap ai sha na-um na-sin wa nna shangai wa ai wa rai nga n ngai.” (I am hte Immaculate Conception) nga nna bai htan ya ai. Ndai sakse mabyin hpe yu nna Nawku Hpung a sharin shaga ai gaw, Karai Kasang hkum nan a sharin shaga ai lam re, ngu nna sakse hkam mai nga ai.

Daini Npawt Shut Hpyit Mara N Kap ai Sha, Na-um Na-sin wa ai Nu Maria a Poi Nhtoi hpe galaw nga ga ai aten hta, anhte a mungdan kata byin nga ai, Mungdan Dinghku Majan lawan zim mat u ga, (COVID-19) Ana Zinli mung lawan hkoi san mat u ga, Tinang a Dum nta buga, dum nta hpe tawn kau da let, hpyen yen dabang hkan matsan mayan rai nna, shanu machyu nga ai, anhte a Hpunau ni matu, lak san akyu hpyi garum ya nga ga law.

By;
Sister Rose Angeline Maran Nang Doi (SFX)
RVA-Kachin Service (Myitkyina)