Nonantola Mare na San Pra ai Anselm a Poi Nhtoi (March 3)

Saint Anselm of Nonantola (March 3)

San Pra ai Anselm gaw, Lusu ai Hkawhkam kasha langai mi rai nga ai; Shi gaw, Italy Mungdan, Friuli ginwang up hkang du tai wa sai. Langabord hkawhkam Aistulf a hpyen dap kaw na bungli hpe grai tang du hkra galaw ya ai. Hkristian makam masham lam hta grai ngang kang ai wa re. Tsirung langai mi hte Jau jawng (2) hpe mung gaw gap da ya sai.

Shi gaw, A.D 753 ning hta Benedictine Jau Magam Gun Wuhpung kaw Jau tai wa sai. Dai hpang shi gaw, hkawhkam Aistulf grai garum jaw da ai, Nonantola mare kaw na Benedictine Jau jawng hta Jau kaba lit shatsam da ai hpe hkrum ai.

Hkawhkam Aistulf n nga mat ai hpang shi a hpang galai ai hkawhkam Desiderius gaw, Jau Anselm myit kaja ai hte galaw ai amu ni hpe lachyum htai la shut ai majaw, Jau Anselm hpe Monte Cassino de shabai kau wu ai. Ndai zawn shi galaw ai amu kaja ni a majaw, dingbai dingna jaw hkrum timung, San Pra ai Anselm gaw, shi galaw ra ai magam bungli ni hpe matut ding yang galaw ai. Monte Cassino kaw sanit ning tup kabai tawn da ai hkrum sai. Hkawhkam Desederius a hpang Hkawhkam bai tai wa ai Charlemage gaw, Jau Anselm hpe Nonantola de bai shaga la sai.

San Pra ai Jau Anselm gaw, (50) ning tup Jau magam gun ngut ai hpang, A.D 803 ning hta Madu kaw yup pyaw ban sa mat wa sai rai nga ai.

San Pra ai Jau Anslem n nga mat ai hpang, Nawku Hpung gaw, shi hpe San Pra ai masha dang dat let, shi a Poi Nhtoi hpe mung, March shata praw (3) ya shani masat shagrau dat sai rai nga ai.

Daini Nawku Hpung gaw, San Pra ai Jau Anselm a Poi Nhtoi hpe galaw nga ai aten hta, anhte hpung masha ni mung, kaning re ai aten, kaning re ai mayak mahkak jam jau lam ni hkrum wa ai raitim, myit n daw n hten ai sha, Madu Karai Kasang Wa shi ra sharawng ai magam lam ni hta matut gun hpai hkawmsa lu hkra shakut nga ga law.

 

By;

Sister Rose Angeline Maran Nang Doi (SFX)

RVA-Kachin Service (Myitkyina)

Add new comment

9 + 2 =