Newminster Mare na San Pra ai Robert a Poi Nhtoi (June 7) 07 June 2023

Newminster Mare na San Pra ai Robert a Poi Nhtoi (June 7)

San Pra ai Robert gaw, England Mugndan, Gargrave mare kaw shangai chyinghkai wa nna, Northumberland Ginwang, Newminster Tawra Jau jawng hpe gaw de hpang ai Jau kaba langai mi rai nga ai. Shi gaw, Tsa ban (12) grup yin e, Paris mare na Dakkasu kaw hpaji sharin hkam la lai wa sai rai nga ai. Shi gaw, Gargrave mare na ginwang up Jau tai wa ai; dai hpang Whitby Ginwang na Benedictine Order shang hte Fountains ginwang na Cistercian Wunhpang hta mung lit magam gun hpai lai wa sai rai nga ai.

Shi gaw, Tawra Jau jawng ni law law gap ya ai; shi a mai kaja ai myit jasat hte tara shakut ai lam gaw, kasi kamang kaja tai wa sai. Ramma ni law law shi a kasi hpe mu la nna shi de da ai Magam Gun Wuhpung Shang masha ni tai wa masai. San Pra ai Jau Robert gaw, n kaja ai nat ni zingri hkrum ai masha ni hpe shamai shatsai ya ai shaman chyeju lu ai wa mung rai nga ai. Shi a Sumla ni hta e, Shi a lata hta shanhte a Jau manang ni yawng shada da lata Jum sharawt tawn nhtawm, nat ni hpe si mani wa na matu daru sharin shaga taw nga ai hpe mu lu nga ga ai re.

Shi gaw, 1159 ning, June shata (7) ya shani hta e, shi a manang Finchale mare na Godric a makau kaw, Madu hta yup pyaw ban sa mat wa sai rai nga ai. Godric gaw, “San Pra ai Robert a wenyi sumsing lamu de wan gumdin zawn lung wa ai hpe ngai mu lu ai.” nga nna sakse hkam da nga ai.

San Pra ai Jau Robert n nga mat ai hpang, Nawku Hpung gaw, Shi hpe San Pra ai Masha dang dat let, Shi a Poi Nhtoi hpe mung, June shata (7) ya shani ngu masat shagrau dat ya sai rai nga ai.

Daini Nawku Hpung gaw, Newminster Mare na, San Pra ai Robert a Poi Nhtoi hpe galaw nga ga ai aten hta, anhte Hpung masha ni mung, Wa Jau Robert zawn, Karai Kasang Wa jaw ya ai, anhte hta lu la da sai chyeju atsam ni hpe tinang a manaw manang ni hpe gam garan ya lu ai ni, shamai shatsai ya lu ai ni byin tai lu hkra shakut sa wa nga ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)