Montepulciano Mare na San Pra ai Agnes a Poi Nhtoi (April 20)

Montepulciano Mare na San Pra ai Agnes gaw, Italy Mungdan, Tuscany Mare kaw, lai wa sai 1268 ning, January shata (28) ya shani, shangai chyinghkai wa ai rai nga ai. Shi gaw, ma kaji prat ten kaw nna akyu hpyi shaja ai, shawa man n pru hkawm ai myit jasat rawng ai. Montepulciano Mare kaw na Mama Jawng de shang mat ai hpang kade nna yang, Procena Mare kaw na Mama Jawng de bai du mat wa ai. Dai shara kaw Shi akyu hpyi shaja ai hte asim sha nga chye ai myit jasat hpe mu lu nna masha law law Mama Jawng de Karai Kasang a Magam gun sa tai mat ma ai. Shi a asak (15) ning sha naw rai yang, dai jawng na Mama Kaba lit shatsam ya ai hkrum nu ai.

San Pra ai Mama Agnes gaw, hka hte hkaulan mam rau galaw ai (Bread_Paung Muk) chyu sha ai. Penep n lawm ai ga ntsa nlung bumhkum hkum nna yup ai. Montepulciano Mare masha ni hpyi shatsang ai majaw, San Pra ai Agnes gaw, dai mare de bai htawt nga mat ra nu ai. Shi a matu mare masha ni nga shara jawng langai mi gap ya ma ai. Dai jawng kaw nga nhtawm, shanhte Mama Magam Gun Wuhpung a ningbaw lit shatsam ya ai hkrum nu ai. Shi chyawm gaw, Dominican Jau ni hpe shanhte a Mama Magam Gun Wuhpung a lam Woi ning shawng shatai wu ai. San Pra ai Mama Agnes hpe masha ni shingran mu lu ai, A-ga hte Lamu lapran hpat wat kaw tsap dan ai, lamik kumla madun ai shaman chyeju atsam lu ai san Pra ai masha re nga nna masha ni tsun tsun rai ma ai.

Mama Agnes gaw, aten grai na hkra machyi makaw kaba hkam sha lai wa sai raitimung, shi a hkam sharang ai myit hte asim sha tara shadik nga ai hpe mu lu ai masha ni law law gaw, shi hte arau Karai Kasang kaw shanhte a hkum hkrang hte n gun atsam hpe ap kau ma ai.

Montepulciano Mare na Mama Agnes gaw, 1317 ning, April shata (20) ya shani, shi a asak (49) ning hta, Madu kaw yup pyaw ban sa mat wa sai rai nga ai.

Shi n nga mat ai hpang, 1726 ning hta, dai aten na, Wa Sarabyin Benedict (13) kawn, Shi hpe San Pra ai Masha dang dat let, Shi a Poi Nhtoi hpe mung, April shata (20) ya shani ngu masat shagrau dat ya sai rai nga ai.

Daini Nawku Hpung gaw, Montepulciano Mare na San Pra ai Agnes a Poi hpe galaw nga ga ai aten hta, anhte mung, Mama Agnes zawn tinang sak hkrung hkawm sa ai lam hta, Karai Kasang Wa hpang de akyu hpyi shaja ai hte azim sha nga let myit sumru chye ai byin tai lu hkra shakut sa wa ga ngu, n gun jaw dat lu n ngai law.

By;

Sister Rose Angeline Maran Nang Doi (SFX)

RVA-Kachin Service (Myitkyina)