May Shata Hta Rosari Hti Akyu Hpyi Ai Lam (14 May, 2019)

May shata hta Rosary hti ai lam

          Nawku hpung a labau lam hpe hkap madat la na ten bai du wa magang nga sai hte rau daini na lamang hta, May shata hta Rosary hti akyu hpyi ai lam hte seng nna, gam garan ya mayu nngai.

          Nu wa hpu nau ni, ndai May Shata gaw, anhte a nawku hpung kaw nna, masat da ya ai Rosary hti ai shata rai nga ai. Shingrai, daini na nawku hpung labau shana ya na aten hta, Chyoi pra ai Nu Maria hta kam shamyet let, Rosary akyu hpyi ai lam hpe lak lai shakut ai a marang e, karai kasang kaw na chyeju ntaw ntsang hkam la lu hkra shakut hkan sa mai ai lam ni hpe madat la lu na rai nga ai. Chyoi pra ai Nu Maria kaw Rosary hti akyu hpyi ai lam hpe, lak lai shakut ai ndai May shata laman hta,  anhte yawng gaw, mungkan ga na shinggyim kanu ni yawng hta grau ai, hkungga tsawra kam hpa ging ai, Chyoi pra ai Nu Maria hpe  anhte gade daram tsawra ai lam, kam hpa ai lam, chyeju dum ai kumla ni hpe tsun, hpaw dan lu hkra, shakut na kaja mai nga ga ai.

          Mungkan ntsa hta sak hkrung nga ai Chyoi pra ai Nu Maria a kashu kasha ni yawng gaw, Chyoi pra ai Nu Maria hpe myit dum nna, amyu n ging hka matsan lu su n lata ai yawng jawm hpawng let, tinang a matu, nta masha ni yawng a matu, mungdan a matu, karai kasang hpang de Chyoi pra Nu Maria htinglu htinglai akyu hpyi ya mi ga, Rosahti akyu hpyi ai lam hpe shakut nga ga. Hpa majaw nga jang, anhte a makam masham hta, Chyoi pra ai Nu Maria a lata hku nna karai kasang hpang de hpyi ai akyu ga ni yawng hpe karai kasang hkap madat ya na hpe anhte kam ga ai re. Bai, ndai May shata laman hta, shawoi na aten hta grau nna, Chyoi pra ai Nu Maria kaw, Shi hpang de tsawra hkungga kam shamyet ai lam nga ai kashu kasha ni myit malai let, Chyoi Pra ai Nu Maria hpang de sit shang ai ni hpe karai kasang kaw na makawp maga ya ai chyeju hpyi ya nga ai.

          Dai majaw anhte yawng a matu ndai May shata gaw, ra sharawng manu shadan ging ai shata mung rai nga mali ai re. Chyoi Pra ai Nu Maria a lata hku nna, karai kasang kaw na,  lak san chyeju ni hkam la lu ai shata mung rai nga ai. Ndai May shata ting Chyoi Pra ai Nu Maria hpe kam hpa ai lam hta, myit masin n gup a ga, lai akyang ni hte rau karai kasang hpe tsawra ai lam, mara hpe matsat ai, nra sharawng ai lam ni hpe Nu Maria a man kaw, Ga sadi la nna akyu hpyi shakut mai nga ga ai.

Ndai shata tup hta Chyoi pra ai Nu Maria a Lung Pu nga ai shara de sa nna, Rosary hti akyu hpyi ai, mahkawn mangwi hte shakawn kungdawn ai lam ni galaw nga ga. Daizawn galaw ai a marang e ra ai chyeju ni hpe kaja wa Chyoi pra ai nu maria gaw, karai kasang kaw na hpyi htinglu htinglai ya na re hpe mung kam nga ga. Tsawra ai nu wa hpu nau ni, anhte a shut hpyit mara raw dat hkyem sa hkrum na matu, Chyoi Pra ai Nu Maria makawp maga akyu hpyi ya na nra ai ngu, lama shadu ai rai jang, Chyoi pra ai Nu Maria a kashu kasha ni  rai ga ai ngu, ntsun mai na re. Chyoi Pra ai Nu Maria gaw, karai kasang nre ai majaw, shi kaw akyu hpyi nra ai ngu shadu ai ni mung shut na re.

Hpa majaw nga jang, karai kasang a chyeju lwi hkrat wa ai sing-kang hte bung ai kam hpa shara gaw, Chyoi Pra ai Nu Maria nan rai nga mali ai re. Anhte chyeju lu la nna, shut hpyit mara ni hpe koi yen kau lu hkra, shakut lu na ahkyak ai kam hpa shara mung, Chyoi Pra ai Nu Maria nan rai nga ai. Shut hpyit mara kawn lawt lu mi ga, akyu hpyi ai shaloi, myit masin san seng ra ai. shut ai mara a matu kup tsup ai myit malai lu ra nga ga ai. Ndai mungkan ga ntsa nga ai aten hta, nat tsa dan a agung alau kaw na lawt lu ai masha ngu ai n nga ai. Dai majaw Chyoi pra ai Nu Maria kaw nna, makawp maga ai chyeju lu la hkra, akyu hpyi let mara raw ai chyeju kumla hkam la nna, karai kasang kaw na chyeju hkam la nga ga. Chyoi pra ai Nu Maria hpang de sa nna, agung alau hpe dang kau lu na matu, makawp maga ai chyeju lu na matu, karai kasang a kanu kaw galoi mung sit shang nga ga, Grau nna ndai May shata ting hta, ja ja akyu hpyi shakut mai nga ga ai.

Ndai daram ahkayk ai chyehkyang la ai lam hpe tang du hkra gunhpai lu na matu, myit mang hpaji ra ai hte maren, ndai May shata ting, anhte marai hkum shagu gaw, chyoi pra ai Nu Maria hpang de kam hpa shamyet shanat ai lam hta, myit masin hkum hkrang yawng, myit lawm let shang lawm ga, Hpaji byeng nya hte hpring ai chyoi pra ai Nu Maria re majaw, wenyi hpe gasat gala ai agung alau hpe dang kau lu nna, ngwi pyaw ai hte si wa lu na matu, chyoi pra ai nu maria kaw ja ja akyu hpyi n gun la nga ga. Shut hpyit mara kaw nna lawt lu na matu, Nu Maria hpang de manoi manat kam hpa let, Nu Maria kaw tinang a myit  masin hkum hkrang yawng hpe ap nawng da nga ga.

Nu wa ni, grau nna gaw, agung alau hkrum ai aten ni hta mung, chyoi pra ai Nu Maria garum ya mi ga, akyu hpyi nga ga. Anhte a wenyi hte hkum hkrang yawng hpe up hkang makawp maga ya nga ai Chyoi pra ai Nu Maria hpang de myit lawm awng sharawng ai hte galoi mung Rosary hti akyu hpyi nga ga. Chyoi Pra ai Nu Maria hpe shakawn kungdawn ai akyu hpyi ga ni hpe tsun sumru ai lam ni hpe mung, hkan sa shakut let, chyoi pra ai Nu Maria a lata hku nna, karai kasang kaw na, anhte hta ra ai chyeju ni law law hpe myit dik hkra, myit krem hkra hpyi la nga ga ngu nna, n gun jaw dat lu n ngai law.

Ka lajang ai;    Mama Rose Angeline Maran Nang Doi

                          RVC, Ginjaw Rung, Aung Nan

                          Myitkyina.