Mantua Mare na, A Lu ai Osanna a Poi Nhtoi (June 20) 20 June 2022

Mantua Mare na, A Lu ai Osanna a Poi Nhtoi (June 20)

A Lu ai Osanna gaw, Italy Mungdan, Mantua Mare kaw, lai wa sai 1449 ning, January shata (17) ya shani hta shangai chyinghkai wa ai rai nga ai. Shi gaw, Lusu ai kun dinghku kaw na raitimung, Karai Kasang Wa a ntsa shi a tsawra myit kaba ai majaw, Shi a asak (17) ning kawn Dominican Tertiary Mama Magam Gun Wuhpung de shang mat wa nu ai. Kanu yan Kawa n nga mat ai majaw, ngam nga ai shi a kanau ni hpe yu gawn na lit shi kaw ang mat ai majaw, Mama Jawng shang nna (37) ning na ai hpang she, Mama tai Ga Sadi tawn nna, Mama tai wa nu ai.

Shi gaw, Kanu yan Kawa kaw na lu la ai ja, sutgan ni hpe machyi masha ni, ruyak hkrum ai ni a matu asung jashawn jai lang ai; wenyi lam matsun ya ra ai ni hpe mung shi shadum matsun ya ai.

A Lu ai Osanna gaw, ma kaji ten kaw nna shingran law law mu ga wu ai. Shi asak (5) ning hta prat dingsa nga pyaw lu ai Sumsing Mungdan hpe shingran mu yu ai nga nna shi a labau hta ka matsing da nga ai. Madu Yesu a baw hta ju jan mau shagup ya ai “Crowning of the Thorns” hte Wudang Ntsa Jen Noi ai “Crucifixion” wunma ni hpe mung shi hkam sha lai wa yu sai rai nga ai. Nu Maria hte Madu Yesu hpe shingran law law lang mung mu ga ai nga ai.

A Lu ai Osanna gaw, 1505 ning, June shata (18) ya shani hta Madu kaw yup pyaw ban sa mat wa sai rai nga ai.

Shi n nga mat ai hpang, Roma Mare de sa du nga ai Marchesa Isabella d’Este a hpyi shawn ai hte maren, A Lu ai Osanna a Poi hpe, 1515 ning, January shata (8) ya shani, dai aten na Wa Sarabyin Leo (10) kawn, shi a dai daw buga rai nga ai Mantua mare kaw galaw ya lai wa sai.

1694 ning, November shata (24) ya shani, dai aten na Wa Sarabyin Innocent (12) kawn, Shi hpe A Lu ai Masha ngu shagrau dat let, Shi a Poi Nhtoi hpe mung, June shata (20) ya shani ngu masat shagrau dat ya sai rai nga ai.

Hpang daw de, Mama Osanna ni a Mama Wuhpung hpe Wa Sarabyin Leo (9) hte Wa Sarabyin (14) yan mung, tara shang madi shadaw da ya sai rai nga ai.

Daini Nawku Hpung gaw, Mantua Mare na, A Lu ai Mama Osanna a Poi Nhtoi hpe galaw nga ga ai aten hta, anhte a Prat hta Mung, dinghta ga a mayak mang hkang lam ni kade mi hkrum hkra wa ai raitimung, Mama Osanna zawn, Madu a shaga ai nsen hpe na lu jang, aten ahkying ngu ai kade mi na tim, Shi Madu a magam hta shang tsap gun hpai lu ai ni byin tai lu hkra shakut sa wa ga law. 

By;

Sister Rose Angeline Maran Nang Doi (SFX)

RVA-Kachin Service (Myitkyina)