Madu Yesu a San Pra ai Teresa a Poi Nhtoi (October 1)

Madu Yesu a San Pra ai Teresa a Poi Nhtoi (October 1)

“Madu Yesu a San Pra ai Teresa” St. Teresa of Child Jesus nga nna shagrau hkrum ai San Pra ai Hkawnsek gaw Francis mungdan, Alecon mare hta 1873 ning, January shata praw (2) ya shani hta shangai chyinghkai wa ai rai nga ai. San Pra ai Teresa hpe “Sasana Magam Gun Hpung Ni a laksan kamhpa ai San Pra ai Masha” (Patroness of Missionaries) nga nna masat shagrau ai rai nga ai. Htawm hpang de, shi mung sasana magam gun langai mi tai wa na lam hpe 1886 ning Hkrismat Nhtoi hta Madu Yesu hkum nan shi kaw dan pru nna tau hkrau lamik kumla madun ya sai. Dai shani kaw nna Teresa gaw, sasana magam gun mayu ai myit katu nga mat nu ai.

Dai majaw, asak (15) ning sha naw rai nga ai Teresa hpe Sarabyin hkum nan Mama magam gun tai na ahkaw ahkang jaw ya sai. Teresa gaw, Lisies mare kaw na Carmelite Mama jawng de shang mat ai. Shi gaw “Tsawra jang sha, tsawra ai bai hkrum na” (Love is repaid by love alone) nga ai ga malai hpe kam ai.

Mama Teresa gaw, alak mi re ai amu n re ai sha, shani shagu man man galaw ra ai yu maya amu bungli ni hpe grai tsawm grai hkrak hkra galaw ai myit jasat rawng ai. Shi gaw, ru yak jam jau jam hkau lam hpe akyu hpyi nna hkap la ai; Chyoi Pra ai Ja Chyum Mungga hti nna shalan shabran ai, myit ngwi simsa ai shaman chyeju ni hpe hkam sha lu ai. Shi hpe Mama tai na numsha ni hpe yu gawn ai lit shatsam ya ma ai. Dai numsha ma ni hpe shagrit shanem ai myit, madat mara ai myit a lam hpe n-gup a ga hte mung, kasi kamang madun nna mung sharin ya lai wa ai.

San Pra ai Mama Teresa gaw, “Wenyi Langai mi a Labau” (History of soul) nga nna shi a wenyi hte seng ai laika buk langai mi ka da nga ai. Dai laika buk kaw: “Ngai gaw, Madu Karai Kasang hpe kaji kajaw re ai kumhpaw kumhpa sha jaw lu ai kaji la ai Wenyi rai n ngai.” nga nna shi a lam ka da ai hpe mu lu nga ai.

Shi ra sharawng dik ai gaw: “Makam masham a matu nye a asak sumdam ap jaw kau na” ngu ai rai nga ai. Masha ni a wenyi hpe hkye la lu na matu hte Nawku hpung rawt jat galu kaba wa na matu, shi hkum hpe ap nawng kau na, nga nna myit da ting tawn wu ai. “Ngai gaw San Pra ai Agnes lu la ai kumla hpe du daw sai hkaw nna  n lu la jang mung, shawang tsawra myit hte rai timung, byin mai ai hku nna lu la mayu dik sai.” nga nna shi tsun yu ai.

San Pra ai Teresa gaw; “Nawku Hpung gaw, masha amyu baw shagu lawm nga ai hkum hkrang hte tsawra myit htoi tu hkrung nga ai salum hte gaw gap tawn ai lam, ngai chye na ai. Hpung masha ni shachyen galaw sa wa ai amu ni hpe tsawra myit e shadut ya jang sha awng dang lu ai. Ndai tsawra myit n chyi n tu mat jang gaw, Kabu Gara Shiga hkaw shabra ai amu n nga mat na: tinang a asak ap nawng kau na ni mung n nga mat na. Madu Yesu e, Na a Chyeju jaw e ngai mung Hkristian tai lu ni ai. Dai majaw, ngai gun hpai ra ai lit madung gaw, hpunau tsawra myit rai nga ai.” nga nna shi ka da nga ai.

San Pra ai Mama Teresa gaw, asak (24) ning sha naw rai yang, 1897 ning, September (30) ya shani hta Madu kaw yup pyaw ban sa wa sai rai nga ai. Nawku hpung gaw, 1927 ning hta San Pra ai Teresa hte San Pra ai Francis Xavier hte arau” Maigan Sasana Magam Gun Ni a Laksan Kam Shamyet lu ai San Pra Masha “Patron Saint of Foreign Missionaries” nga nna masat shagrau ya sai. Ndai zawn masat shagrau ai lam gaw, Kabu Gara Shiga hkaw shachyawm shabra ai shaloi akyu hpyi ai lam hte ta tut bungli hpe kapyawn nna galaw shakut gun hpai ra ai sak se tai na matu rai nga ai.

Mama Teresa n nga mat ai hpang, 1923 ning, April shata (29) ya shani hta, dai aten na, Wa Sarabyin Pius (XI) gaw, Shi hpe A Lu ai Masha hku masat dat sai rai nga ai.

Dai hpang, 1925, May shata (17) ya shani hta gaw, Wa Sarabyin Pius (XI) sha, shi hpe San Pra ai Masha dang dat let, Shi a Poi Nhtoi hpe mung, October shata praw (1) ya shani masat dat ya sai rai nga ai.

Daini Nawku hpung gaw, Madu Yesu a San Pra ai Teresa a Poi Nhtoi hpe galaw nga ga ai shaloi, anhte shani shagu yu maya magam bungli galaw taw ai raitim, Mama Teresa zawn, maga mi de sasana magam bungli galaw ai myit masa majing hte galaw lu hkra shakut nga ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)