Madu Yesu a A-Lu ai Maria Navarro a Poi Nhtoi (April 17) 17 April 2023

Madu Yesu a A-Lu ai Maria Navarro a Poi Nhtoi (April 17)

A-Lu ai Maia Navarro gaw, Spain Mungdan a Mare Daju Madrid kaw lai wa sai 1565 ning, January shata (17) ya shani shangai chyinghkai wa ai rai nga ai. Shi Kawa gaw, Ludovic Navarro Guevara rai nna, Kanu gaw, Joan Romero rai nga ai. Shi gaw, kahpu kanau ni marai (6) kaw na kana ba rai nhtawm, Shi a chyinghkai Kanu n nga mat ai hpang, shi a kanau ni hpe Kanu Kana lit magam la let woi lakawn lai wa sai rai nga ai.

A-Lu ai Maria Navarro gaw, shi a sak hkrung prat hkrun lam tup hta hpu nau ni hpe galaw daw ai amu magam gun hpai nna sak hkrung nga lai wa sai. Shi a asak (23) ning hta kawa gaw, kun dinghku de na matu lajang ya ai hpe n hkraw ai hte, dai hpang shi a prat tup dinghku n de ai sha, hkawn jet prat hte nga lai wa nu ai.

A-Lu ai Maria Navarro gaw, Merdedarian Jau ni a wenyi lam woi ya ai npu hta, Karai Kasang a matu, asak hkrung nga lai wa nu ai. Shi gaw, Chyoi Pra ai Hkum hpe alak mi rai nna hkungga shagrau nga lai wa ai. Ndai zawn makam masham ngang grin ai gaw, akyu hpyi shaja ai myit jasat, tsin yam hkam sharang ai hte hpunau ni hpe matsan dum lama garum jaw ai myit jasat rawng ai a majaw rai nga ai. Kaga masha ni a ntsa tawn da ai, tsawra myit hte galaw daw mayu ai myit gaw, hpa hte mung shadawn n lu nga ai.

A-Lu ai Maria Navarro gaw, lai wa sai 1614 ning hta Third Order of Mercy Mama Magam Gun Wuhpung kaw, Mama tai ga sadi hkam la sai. Shi a sak hkrung prat tup hta e, matsan mayan re ai ni hpe yu kawn garum jaw nna nga lai wa sai rai nga ai.

A-Lu ai Maia Navarro A Lu ai Mary Ann gaw, 1624 ning, April shata (17) ya shani, Shi a asak (59)  ning hta Madu kaw yup pyaw ban sa mat wa sai rai nga ai. Raitimung, Shi a hkum tsawp gaw hten mat ai lam n nga ai sha, Spain Mungdan, Madrid Mare kaw daini du hkra mazing da nga sai re.

A-Lu ai Maria Navarro n nga mat ai hpang, 1783 ning, May shata (25) ya shani hta, dai aten na, Sarabyin Pius (6) kawn, Shi hpe A Lu ai Masha ngu masat shagrau dat let, shi a Poi Nhtoi hpe mung, April shta (17) ya shani ngu masat dat ya sai rai nga ai.

Daini Nawku Hpung gaw, Madu Yesu a A-Lu ai Maria Navarro a Poi hpe galaw nga ga ai aten hta, anhte hpung masha ni marai hkum shagu mung, Karai Kasang Wa jaw da ya ai sak prat hkrun lam hta, Mama Maria Navarro zawn titnang a makau grup yin hkan na, ra kadawn nga ai, matsan mayan re ai ni hpe hpunau tsawra myit hte lakawn la let, hkawm sa nga ga ngu, n gun jaw gam garan ya dat lu n ngai law.

By;

Sister Rose Angeline Maran Nang Doi (SFX)

RVA-Kachin Service (Myitkyina)