Lucca Mare na San Pra ai Richard a Poi Nhtoi (February 7)

San Pra ai Richard gaw, Sinna maga na, Saxon amyusha Hkawhkam kasha naw rai nga timung, shi a amyu masha ni gaw, shi hpe “Hkawhkam” nga nna shakawn ya hkrum wu ai. Shi gaw, tsa ban (8) daram hta shangai chyinghkai wa ai rai nga ai. Raitimung, naw kaji ai ten kaw nna, kanu yan kawa n nga mat ai majaw, ja hkrai hkrai ra mat nu ai. Shi a kahpu asak kaba wa ai hpang kanu yan kawa a Sali kumhtaw lu madu da tim, ahkun hkanse grai tsaw ai majaw, matsan prat de gayin shang wa shangun masai.

Dai majaw, Richard gaw, shi a kahpu a hkauhting hkauna hta magam bungli galaw lai wa ai. Richard gaw, dum nta sun wang hpe lu madu na masa lam nga ai raitim, Shi gaw, Nawku hpung hte sharin hkaja la ai prat hpe she madung ra sharawng wu ai. San Pra ai Richard gaw, San Pra ai Willibald, Winnebald hte Walburg ni a chyinghkai kawa mung rai nga ai. Shi a kasha Wunibald hte Benedictine Jau tai wa ai Willibald hpe makam masham myit jat ngang kang wa lu na matu, shi gaw, Roma mare de akyu hpyi hkrun lam lajang ya lai wa sai. Shan nau gaw, dai akyu hpyi hkrun lam hta yak hkak jam jau lam law law hkrum sha lai wa timung, Italy hte Fransik Mungdan (daini na Pyin Thit Mungdan) de sa dau kau da lai wa ma ai.

San Pra ai Richard gaw, A.D (722) ning hta, Italy mungdan a Lucca ngu ai shara hta Madu kaw yup pyaw wa sai rai nga ai. Richard n nga mat ai hpang, Shi a Lupwa na lak lai ai lamik kumla ni hpe tang mahkawng la nna, shi hpe “English Hkawhkam” ngu nna shaga shamying let hkungga shagrau lai wa ma ai. Dai hta n-ga, dai ten na masha ni mung, shi hpe san seng san pra ai wa nga nna, hkungga jaw lai wa ma ai.

San Pra ai Richard a kasha yan nau gaw, Germany Mungdan a lak san kam shamyet ai shan nau a kawa dim rai nga ai, San Pra ai Boniface kawn Fransik amyu sha ni hpe sharin shapan ai lam hta grai garum shing tau lai wa masai rai nga ai.

Bai nna, San Pra ai Richard a kasha Walburga gaw, Heidenhein mare na Mama jawng hta Mama Kaba magam lit gun hpai lai wa sai. Shi gaw, Fransik amyu sha du gyi salang ni a kashu kasha ni a matu, laika sharin jawng langai mi gaw gap da ya lai wa nu ai.

Daini Lucca Mare na, San Pra ai Richard a Poi Nhtoi hpe galaw nga ga ai aten hta e, anhte kun dinghku hta mung, tinang a dum nta masha ni makam masham lam hta grau nna ru jung ngang kang wa lu ai ni tai wa lu u ga matu hte tinang a dum nta masha ni hta na, Jau, Mama tai ai ni mung lawm wa u ga matu mung, lak san akyu hpyi la nga ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)