A Lu ai Ralph Milner hte Jau Roger Dickenson Yan a Poi Nhtoi (July 7) 07 July 2023

A Lu ai Ralph Milner hte Jau Roger Dickenson Yan a Poi Nhtoi (July 7)

A lu ai Ralph Milner hte Roger Dickenson yan gaw, England mungdan hta, Kahtawlik Hpung masha ni makam masham a majaw htawng sharawng hkrum, sat shamyit hkrum ai aten hta nga lai wa ma ai. A Lu ai Ralph Milner gaw, Hampshire ginwang Flacsted mare na laika n chye ai asak grai kaba sai yi sun galaw sha ai Protestant wa rai nga ai. Shi a htingbu Kahtawlik Hpung masha ni a kasi hpe mu lu ai majaw, Kahtawlik makam masham de gale shang wa ai wa mung rai nga ai.

Ralph Milner gaw, Chyoi Pra Hkum shawng hkam la ai shani nan rim la hkrum nna shaning law law htawng sharawng da hkrum wu ai. Shanhte htawng masha ni shinggan lu pru ai shaloi shi a manang htawng masha ni a matu madi shadaw garum arai hte wenyi garum lam ni hpyi ya ya rai wu ai. Dai hpang shi gaw, hpung kawan hkawm ai Jau ni hpe garum la ai hte arau hkan hkawm ai. Ndai Jau ni hte rau hkawm ai kaw nna, Wa Jau Roger Dickenson hte shi hkrum lu ai rai nga ai.

Wa Jau Dickenson gaw, 1583 ning hta Sasana magam gun hpang wa ai; Lincoln mare, Rheims Dakkasu kaw na Jau rai nga ai. Shi a makam masham majaw, kalang mi rim hkrum ai kaw nna lawt lu ai hpang bai rim hkrum ai shaloi Ralph Milner hte hkrum wu ai. Tara agyi wa gaw, Ralph Milner asak kaba sai majaw, matsan dum nna shalawt kau mayu ai rai timung, Karai Kasang jaw ai n gun atsam a majaw, Ralph Milner gaw Wa Jau Roger Dickenson hte rau makam masham hte seng nna hkam la na nga nna hpyi la ai.

Ndai Karai Kasang a Share Shagan yan gaw, England Mungdan, Winchester mare kaw, 1591 ning, July shata (7) ya shani zingri sat kau hkrum lai wa masai rai nga ai.

Shan hkawng n nga mat ai hpang, 1929 ning, December (15) ya shani, dai aten na Wa Sarabyin Pius (11) kawn, Shan hpe A Lu ai Masha hku nna shagrau dat let, Shan Lahkawng a Poi Nhtoi hpe mung, July shata (7) ya shani ngu masat dat ya sai rai nga ai.

Daini Nawku Hpung gaw, A Lu ai Ralph Milner hte Jau Roger Dickenson Yan a Poi Nhtoi hpe galaw nga ai aten hta, anhte Hpung Masha ni mung, tinang hkam la da sai Makam Masham a matu, kaning re ai aten hta raitim, gwi gwi sakse hkam lu ai, Hkristu a hpang hkan kaja ni tai lu hkra sak hkrung hkawmsa nga ga law.

By;

Sister Rose Angline Maran Nang Doi (SFX)

RVA-Kachin Service (Myitkyina)