A Lu ai Michael Rua a Poi Nhtoi (October 29) 29 October 2022

A Lu ai Michael Rua a Poi Nhtoi (October 29)

A Lu ai Jau Michael Rua gaw, 1837 ning, June shata (9) ya shani hta Italy Mungdan, Turin mare kaw shangai chying hkai wa ai rai nga ai. Shi gaw, San Pra ai Don Bosco de hpang da ai Salesian Sasana Magam Gun Wuhpung de, 1855 ning hta shawng nnan na Ga sadi hpe hkam la nu ai. Shi gaw, Sub-deacon sha naw rai nga ai aten kawn, Salesian magam gun wuhpung shang ni hpe wenyi lam matsun madun ya na lit hpe shatsam hkrum nu ai.

Michael Rua gaw, 1888 ning hta, San Pra ai Don Bosco a hkang galai tai wa sai. Shan lahkawng a myit mang yaw shada ai lam grai bung pre nga ai. San Pra ai Don Bosco a hkang galai tai wa ai shaloi, Don Bosco yaw shada tawn da ai lam ni yawng hpe hkrak hkan shatup galaw ya ai. Don Bosco a myit jasat kasi ningli ni hpe shi hkan dagraw galaw ai. Don Bosco gram lajang da ya ai wuhpung wuhpawng a hkan sa tara ni hpe shi matut shagrin ya sai.

Alu ai Michael Rua gaw, San Pra ai Don Bosco a hkang galai lit hpe (22) ning tup, gun hpai lai wa sai. Shi a magam rum manaw manang ni hpe, law law lang hkan gawan nna, hpaji jaw, n gun jaw lai wa sai. Shi a manang ni hpe wuhpung hku nna mung, langai ding hkrai hku nna mung, San Pra ai Don Bosco a kasi hte maren sak hkrung nga sa na matu, laika hte matsun ya ai.

Alu ai Michael Rua gaw, 1910 ning, April shata (6) ya shani hta, shi a daidaw buga mare rai nga ai, Turin mare kaw, Madu hta yup pyaw ban sa mat wa sai rai nga ai.

Shi n nga mat ai hpang, 1972 ning, October shata (29) ya shani, dai aten na Wa Sarabyin Pawlu (6) gaw, Shi hpe A Lu ai Masha hku nna shakawn shagrau dat let, Shi a Poi Nhtoi hpe mung, October shata (29) ya shani ngu masat dat ya sai rai nga ai.

Daini Nawku Hpung gaw, Alu ai Michael Rua a Poi Nhtoi hpe galaw nga ga ai aten hta, anhte mung, tinang a makau grup yin manaw manang ni hkan na, mai kaja ai kyang lai len, kasi ningli ni hpe hkan lang hkan sa lu nna, yawng a matu kasi madun lu ai ni byin tai nga ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)