A-Lu ai Mary of the Incarnation a Poi Nhtoi (April 18)

A-Lu ai Mary of the Incarnation gaw, Sadi dung ai dinghku num, ma marai (6) a kanu rai nga ai. Hpang daw de, Shi gaw, Carmelite Mama tai nna nga mat wa ai. Shi gaw, Fransik Mungdan a mare daju, Paris kaw lai wa sai 1565 ning, February shata Praw (1) ya shani shangia chyinghkai wa ai rai nga ai. Barbe Aurillot mying hte Kashin Kamun Sacrametu hkam la nu ai. Shi a asak (16) ning hta Peter Acarie mying ai shabrang hte mayaw htinggaw de nna ma marai (6) shapran ma ai. Shi a shayi sha ni marai (3) gaw Carmelite Mama tai wa nna, Shadang sha langai mi gaw Jau tai wa sai rai nga ai.

Shi gaw, n rum ntau wa hte kashu kasha ni hpe galaw daw ai amu kade mi law timung, akyu hpyi ai lam hpe n hprai sha man man galaw shakut let nga lai wa sai. Avila mare na, San Pra ai Teresa ka da ai laika ni gaw, Shi a matu akyu pru ai laika buk ni byin tai wa sai. Shi gaw, San Pra ai Teresa hpe kalang mi shingran hta mu hkrum yu ga wu ai. Hkum ting magap let bu hpun taw ai Shi a Carmelite Mama hking hte Fransik Mungdan hta Kahtawlik Makam Masham hpe kasi la na matu, shabyin ya sai.

Shi a ningrum ningtau wa, n nga mat ai hpang, Shi a kasha ni hpe atsawm sha bau kaba lajang da ya ngut ai hpang Shi gaw, Carmelite Mama tai mat wa nu ai. 1615 ning  hta Mama tai Ga Sadi tawn nna Mary of Incarnation ngu shamying la wu ai. Shi a akyu hpyi shaja ai lam gaw, masha ni law law a matu kasi kaja tai mat wa sai. Shi hte arau asak hkrung nga ai San Pra ai Francis de Sales zawn re ai san pra ai amyu masha ni law law, A-Lu ai Mary of the Incarnation hpe grai shakawn shagrau ma ai.

A-Lu ai Mary of the Incarnation gaw, 1618 ning, April shata (18) ya shani, Madu kaw yup pyaw ban sa mat wa sai rai nga ai.

A-Lu ai Mary of the Incarnation n nga mat ai hpang, 1791 ning, April shata (24) ya shani hta, dai aten na, Sarabyin Pius (6) kawn, Shi hpe A Lu ai Masha ngu masat shagrau dat let, shi a Poi Nhtoi hpe mung, April shata (18) ya shani ngu masat dat ya sai rai nga ai.

Daini Nawku Hpung gaw, A-Lu ai Mary of the Incarnation a Poi hpe galaw nga ga ai aten hta, anhte hpung masha ni mung, tinang lu da sai Makam Masham hte Kabu Gara Shiga hpe, tinang dum nta masha ni hpe bai gam garan kachyan ya lu ai  ni byin tai lu hkra shakut sa wa ga ngu, n gun jaw dat lu  nngai law.

By;

Sister Rose Angeline Maran Nang Doi (SFX)

RVA-Kachin Service (Myitkyina)