A Lu ai Maria Domenica Brun Barbantini a Poi Nhtoi (May 22) 22 May 2023

A Lu ai Maria Domenica Brun Barbantini a Poi Nhtoi (May 22)

A Lu ai Maria Domenica Brun Barbantini gaw, Italy Mungdan, Lucca Mare kaw lai wa sai 1789 ning, January shata (17) ya shani shangai chyinghkai wa ai rai nga ai. Shi gaw, shi a asak (22) ning hta dinghku de ai hpang yawn hkyen lam mahkrum madup hpe (2) lang ting hkrum sha lai wa hpang, shi a sak hkrung prat hta galai shai ai lam ni byin wa sai rai nga ai. Dai lam gaw, Dinghku de ai hpang shata (5) ngu na hta shi a madu wa Salvatore Barbantini n nga mat wa sai; dai hpang shangai wa ai shi a kasha alat Lorenzo mung n nga mat wa sai rai nga ai. Ndai yawn hkyen ai mahkrum madup a majaw, shi a prat tup machyi ai ni hte matsan ai ni hpe galaw daw jau ai amu hte sak hkrung nga lai wa sai rai nga ai.

A Lu ai Maria Domenica Brun gaw, shi a manang marai (6) hte rau “Pious Unionof Charity” mying ai Yawn Hkyen Hkrum ai Nu Maria hpe shawng lam de tawn da nna “Matsan Dum Lama Magam Bungli Galaw ai Myitrum Wuhpung” hpe gaw de hpang dat sai rai nga ai. Dai Wuhpung gaw, Matsan ai ni, machyi makaw hkrum ai ni hpe garum madi shadaw ya na matu rai nga ai. Dai hpang 1829 ning hta gaw, A Lu ai Maria Domenica Brun  gaw, “Congregarion of the Sisters Ministers of the Sick @ Machyi ai Ni Hpe Yu Gawn ai Mama Wuhpung” mying ai, Machyi masha ni hpe shanhte a dum nta de nan sa nna lak san yu gawn lajang ai Mama Wuhpung hpe mung hpaw hpang dat ya sai rai nga ai. Dai Wuhpung gaw, “Yawn Hkyen hkrum ai Nu Maria hte San Pra ai Camillus de Lellis @ Our Laday of Sorrows and St. Camillus de Lellis” yan a lak san garum jaw ya ai hpe kam hpa shamyet shant nna galaw hpaw da ai rai nga ai.

Mama Maria Domenica Brun a makam masham kaba ai sakse, kasi kaja madun ya ai, matsan ai ni hpe alak mi rai nna tsawra matsan dum ai myit ni hpe mu nna amyu shayi sha ni law law shi a hpang hkan tai wa masai.

Dai ni na aten hta, “Sisters Ministers of the Sick of St. Camillus Mama Wuhpung hpe “Camillian Sisters” nga nna shamying da ma ai. Dai Mama Wuhpung gaw, machyi makaw hkrum ai ni hte matsan masha ni hpe hkum hkrang hte seng ai, wenyi hte seng ai lam hta dum nta, tsirung hte kaga shara ni hkan sa du nna garum ya nga ma ai. dai Camillian Mama shagu gaw, shawng nnan ga sadi la ai aten kaw nna Wudang Masat kap ai Shang-gan hpe bu hpun sumraw ra ma ai; shanhte hpe “Machyi Masha Yu Kawn ai Mama (Shing n-rai) Sister Minister of the Sick, nga nna shamying ma ai.

Dai zawn rai nna, Mama Maria Domenica Brun gaw, shi a sak hkrung prat ten shagu hta grai manu shadan nna nga lai wa sai rai nga ai.

A Lu ai Mama Maria Domenica Brun Barbantini gaw, 1868 ning, May shata (22) ya shani, shi a sak (79) ning hta, Madu kaw yup pyaw ban sa mat wa sai rai nga ai.

Shi n nga mat ai hpang, 1995 ning, May shata (7) ya shani, dai aten na, San Pra ai Wa Sarabyin Yawhan Pawlu (2) kawn shi hpe, A Lu ai Masha (Blessed) hku nna masat dat ya sai rai nga ai.

Daini Nawku Hpung gaw, A Lu ai Mama Maria Domenica Brun Barbantini a Poi Nhtoi hpe galaw nga ai aten hta, anhte Hpung Masha ni mung, tinang a sak prat hkrun lam tup hta Mama Maria Domenica zawn manu dan ai hte sak hkrung hkawmsa lu hkra shakut sa wa ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)