A-lu ai Mama Mary Fontanella a Poi Nhtoi (December 16) 16 December 2023

A-lu ai Mama Mary Fontanella a Poi Nhtoi (December 16)

A-lu ai Mary Fontanella hpe “Lamu Kasa ni a Mary” ngu nna mung shakawn shagrau nga ai re. Shi gaw, lai wa sai 1661 ning, January shata (7) ya shani, Italy Mungdan, Baldinero mare kaw shangai chyinghkai wa ai rai nga ai.

Shi a asak (12) ning du ai shaloi, Saluzza mare na Cistercian Mama Jawng de shang mat wa ai. Raitimung, kade nna yang, shi a kawa n nga mat ai majaw, kahpu kanau ni marai (11) hpe bau na matu, Mama jawng kaw nna bai pru mat ra wu ai.

Dai hpang (4) ning na ai shaloi, nta na ni pat hkum ai hpe n madat ai sha, Turin mare kaw na, San Pra ai Christina A Camelite Mama Wuhpung (Carmelite of St. Christina) de shang mat wa nu ai. A lu ai Mama Mary Fontanella gaw, nat satan e agung alau magup sumhpa jaw ngut ai hpang, mau hpa lamik kumla law law mung mu lu ai. Satan a agung alau ni hpe shi a makam masham myit, shagrit shanem myit hte shakut sharang ai myit hte dang kau lu wu ai.

A lu ai Mama Mary Fontanella gaw, Turin mare kaw na, Carmelite Mama Jawng kaw e 1691 ning hta Mama tai maw ai ni hpe yu shapan ya ai Mama (Mistress of Novices) lit magam gun hpai lai wa ai. 1694 ning hta gaw, Mama kaba lit magam hpe mung gun hpai lai wa sai rai nga ai. Shi a san pra ai myit jasat hpe mu mada nna masha law law Hkristian masha ni byin tai wa ma ai.

Mama Mary Fontanella gaw, 1717 ning, December shata (16) ya shani, shi a asak (56) ning hta, Madu Yesu hta yup pyaw ban sa mat wa sai rai nga ai.

Shi n nga mat ai hpang 1865 ning, May shata (14) ya shani hta, dai aten na Wa Sarabyin Pius (9) gaw, shi hpe A Lu ai Masha ngu nna shagrau dat ya let, Shi a Poi Nhtoi hpe mung, December shata (16) ya shanu ngu nna masat dat ya sai rai nga ai.

Daini Nawku hpung kaw nna, Alu ai Mama Mary Fontanella a Poi Nhtoi hpe galaw nga ga ai shaloi, anhte a myit masin hta mung, Mama Mary Fontanella zawn, Karai Kasang Wa shaga la ai hte rau, shi a hpang de hkang sa lu ai ni byin tai lu hkra shakut nga ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)

#RVA_Kachin_Service

#Feastday_December16

#Blessed_Mary_Fontanella