A-lu ai Apollinaris hte shi a Manang Ni a Poi Nhtoi (September 12) 12 September 2022

A-lu ai Apollinaris hte shi a Manang Ni a Poi Nhtoi (September 12)

1617 hte 1632 ning lapran Japan mungdan kaw Hkristian Hpung shang ni hpe laja lana zingri shamyit ai lam byin lai wa sai. Makam masham a majaw sat shamyit hkrum na Hkristian ni marai (200) kaw na, (6) gaw Japan Asuya ni kawn rim la hkrum ma ai.

Shanhte kaw na marai 18 gaw, Japan mung na shanhte wuhpung a ningbaw, Commisary Provincial rai nga ai Apollinaris Franco woi awn ai First Order Franciscan Wuhpung shang masha ni rai ma ai. Japan asuya gaw Hkristian tai jang sat kau na tara jahkrat tawn ai. A lu ai Apolinaris gaw shi makam masham hte Karai Kasang hpe shi tsawra ai lam, shawa a man e asan sha tsun ai majaw rim hkrum nu ai. Omura htawng kaw manga ning sharawng da hkrum ai; dai laman hta htawng masha ni hpe shi tara ga sharin ya nna Kashin Kamun hkam ya lai wa ai. Htawng kata e aten na na akyu hpyi nna, byin mai ai daram ruyak hkam sharang ai; shi a sumnung shingdi ai hte shagrit shanem ai myit jasat ni hpe mu nna, masha law law myit malai lu let, Hkrustian makam masham de bai gale shang wa ma ai. Shawng de Hkristian garai n tai ai ni law law mung Nawku Hpung de gale shang wa ma ai.

Japan uphkang aya lu ai ni gaw, A-lu ai Apollinaris hte shi a Franciscan Hpung magam gun manang ni hpe, 1622 ning September shata (12) ya shani wan nat sat kau ma ai.

1867 ning, July shata (27) ya shani hta gaw, A-lu ai Apollinaris hte shi a Franciscan Hpung magam gun manang ni hpe dai aten na, Wa Sarabyin Pius (9) kawn, A Lu ai Masha ni ngu masat shagrau dat ya nna, shanhte a Poi Nhtoi hpe mung, September shata (12) ya shani masat dat ya sai rai nga ai.

Daini Nawku hpung kaw nna, A-lu ai Apollinaris hte shi a Manang Ni a Poi Nhtoi hpe galaw nga ga ai aten hta, anhte a myit kraw kata hta mung, shagrit shanem ai myit masin hte tinang lu da ai makam masham nli tum hpe manaw manang ni hpe gam garan ya lu ai ni byin tai nga ga law.

By;

Sister Rose Angline Maran Nang Doi (SFX)

RVA-Kachin Service (Myitkyina)