Loyola Mare na San Pra ai Ignatius (July 31) 31 July 2023

Loyola Mare na San Pra ai Ignatius (July 31)

Jesuit magam gun wuhpung hpe de hpang da ai San Pra ai Ignatius gaw, 1491 ning hta Spain mungdan, Loyola mare kaw shangai chyinghkai wa ai rai nga ai. Shi gaw, hpyen du tai na grai sharawng ai; rai timung, 1521 ning na, Pamplona mare hpe zing la ai majan hta shi a lagaw motor hkra mat ai; dai aten hta shi a asak (30) ning sha naw rai nga ai.

Machyi mai wa ai shaloi, aten shama na matu manaw manang ni hpe sumtsaw sumra hte seng ai laika buk hpyi ai. Raitimung, shi a manaw manang ni gaw, sumtsaw sumra laika buk n mu tam ya ma ai. Shanhte mu tam ai Yesu a Labau hte Sanpra ai ni a Labau laika buk ni sa jaw ma ai. Laika dai ni hti hkrup nna: “Ndai ni mung ngai hte maren shinggyim masha hkrai rai ma ai; shanhte galaw lu ai hpe ngai hpa majaw n lu galaw na ta!” nga myit la ai.

Dai aten kaw nna, Hkristu a hpyenma tai na dawdan ai hpang Manresa mare na Jau Jawng de shang mat ai. Shi a makam masham mahkrum madup ni hte seng nna shi ka shalat da ai mying kaba ai laika gaw, Wenyi Shaman Shakyang Ladat ngu ai, “Spiritual Exercises” laika rai nga ai. Ndai laika buk hte seng nna Wa Sarabyin Pius (11) gaw: “Wenyi hpe hkye hkrang la ai lam de du shangun na matu, matsun ya ai myit su hpaji rawng htum hte shawa wuhpung hkan shatup lu ai wenyi hte seng ai hkansa tara laika rai nga ai” (The wisest and the most universal spiritual code of guiding the soul on the path of salvation) nga nna shagrau da ya nga ai.

San Pra ai Ignatius gaw, Palestine mung hte Roma mare de makam masham akyu hpyi hkrun lam sa ngut ai hpang, Fransik mungdan, Paris mare kaw Jau tai lu na hpaji wa sharin la ai. Dai mare kaw hpung magam gun wuhpung langai mi de hpang ai; dai wuhpung hpe Wa Sarabyin Pawlu (3) gaw 1540 ning hta madi shadaw ya nna Jesuit Jau Wuhpung “Society of Jesus” nga nna shingteng amying jaw ya wu ai. Shanhte laja lana nan hkan shatup ai lashum ga gaw, “Ad Majorem Dei Gloriam” Karai Kasang a Hpung Shingkang Grau Rawt Jat wa na matu, nga ai rai nga ai.

Jesuit Jau Wuhpung gaw, Wenyi lam, hpaji lam, hpyen ladat zawn re ai tara hkan sa shatup ai masing ntsa kaw npawt gaw de da ai wuhpung rai nga ai majaw, laika sharin jawng ni, matsan dum lama amu galaw ai shara ni hte maigan mung sasana magam gun ai lam ni hta mying kaba ma ai.

San Pra ai Ignatius gaw, shi a sak hkrung ten hpe Roma mare kaw nga jahtum kau da sai. Dai yang e, San Pra ai Philip Neri a manang tai lai wa ai. Hpung magam gun wuhpung nnan de nna n hkring n sa, laja lana shaman shalat ya ai hpang, 1556 ning, July (31) ya shani, Madu hta yup pyaw ban sa mat wa sai rai nga ai.

San Pra ai Ignatius n nga mat ai hpang, 1609 ning, July shata (27) ya shani gaw, dai aten na Wa Sarabyin Pawlu (5) kawn, Shi hpe A Lu ai Masha ngu masat shagrau dat ya sai rai nga ai.

Dai hpang, 1622 ning, March shata (12) ya shani hta gaw, dai aten na, Wa Sarabyin Gregory (15) kawn Shi hpe San Pra ai Masha hku nna dang dat let shi a poi nhtoi hpe mung, July shata (31) ngu masat dat sai rai nga ai.

Daini Nawku Hpung gaw, San Pra ai Ignatius a Poi Nhtoi hpe galaw nga ai aten hta, Anhte Hpung Masha ni mung, San Pra ai Ignatius zawn, Madu a Shaga Nsen hpe na lu ai hte rau myit ung ang ai lam n nga ai sha, shi Madu a Hpang de hkan sa lu ai ni byin tai lu hkra shakut sa wa ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)