Loyola mare na San Pra ai Ignatius (July 31)

Jesuit Hpung magam gun hpung hpe de hpang da ai San Pra ai Ignatius gaw, 1491 ning hta Spain mungdan, Loyola mre kaw shangai chyinghkai wa ai rai nga ai. Shi gaw, hpyen du tai nag rai sharawng ai; rai timung, 1521 ning na, Pamplona mare hpe mazing la ai majan hta shi a lagaw motor hkra mat ai; dai aten hta shi a asak (30) ning sha naw rai nga ai. Machyi mai wa ai shaloi, aten shama na matu manaw manang ni hpe sumtsaw sumra hte seng ai laika buk hpyi ai. Rai timung, shi a manaw manang ni gaw, sumtsaw sumra laika buk n mu tam ya ma ai. Shanhte mu tam ai Yesu a Labau hte Sanpra ai ni a Labau laika ni jaw ya ma ai. Laika dai ni hti hkrup nna: “Ndai ni mung ngai hte maren shinggyim masha hkrai rai ma ai; shanhte galaw lu ai hpe ngai hpa majaw n lu galaw na ta!” nga myit la ai. Dai aten kaw nna, Hkristu a hpyema tai na dawdan ai hpang Manresa mare na Jau jawng de shang mat ai. Shi a makam masham mahkrum madup ni hte seng nna shi ka shalat da ai mying kaba ai laika gaw, Wenyi Shaman Shakyang Ladat ngu ai, “Spiritual Exercises” laika rai nga ai. Ndai laika buk hte nna Wa Sarabyin Pius (XI) gaw: “Wenyi hpe hkye hkrang la ai lam de du shangun na matu, matsun ya ai myit su hpaji rawng htum hte shawa wuhpung hkan shatup lu ai wenyi hte seng ai hkansa tara laika rai nga ai” (The wisest and the most universal spiritual code of guiding the soul on the path of salvation) nga nna shagrau da ya nga ai.

Ignatius gaw, Palestine mung hte Roma mare de makam masham akyu hpyi hkrun lam sa ngut ai hpang, Fransik mungdan, Paris mare kaw Jau tai lu na hpaji wa sharin la ai. Dai mare kaw hpung magam gun wuhpung langai mi de hpang ai; dai wuhpung hpe Wa Sarabyin Pawlu (III) gaw 1540 ning hta madi shadaw ya nna Jesuit Jau Wuhpung “Society of Jesus” nga nna shingteng amying jaw ya wu ai. Shanhte laja lana nan hkan shatup ai lashum ga gaw, “Ad Majorem Dei Gloriam” Karai Kasang a Hpung Shingkang Grau Rawt Jaw wa na matu, nga ai rai nga ai.

Jesuit Wuhpung gaw, Wenyi lam, hpaji lam, hpyen ladat zawn re ai tara hkan sa shatup ai masing ntsa kaw npawt gaw de da ai wuhpung rai nga ai majaw, laika sharin jawng ni, matsan dum lama amu galaw ai shara ni hte maigan mung sasana magam gun ai lam ni hta mying kaba ma ai.

San Pra ai Ignatius gaw, shi a sak hkrung ten hpe Roma mare kaw nga shakre kau ai; dai yang San Pra ai Philip Neri a manang tai lai wa ai. Hpung magam gun wuhpung nnan de nna n hkring n sa, laja lana shaman shalat ya ai hpang, 1556 ning, July (31) ya shani, Madu hta yup pyaw ban sa mat wa sai rai nga ai. Shi hpe 1622 ning, March shata (12) ya shani hta San Pra ai masha hku nna dang dat let shi a poi nhtoi hpe gaw, July shata (31) ngu masat dat sai rai nga ai.

San Pra ai Ignatius a labau kadun hpe hti hkaja la nna, anhte hpung masha ni zawn, Madu Yesu hte San Pra ai masha ni zawn tinang a prat hpe akyu rawng manu dan hkra sak hkrung hkawmsa lu ai chyeju ni hpe hpyi la nga ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)