Laconi Mare na San Pra ai Ignatius a Poi Nhtoi (May 11)

San Pra ai Ignatius gaw, Italy Mungdan, Sardinia Zinlawng na, Laconi mying ai shara kaw 1701 ning, December (17) ya shani shangai chyinghkai wa ai rai nga ai. Shan-nau ni marai (9) kaw na Manaw madaw rai nna, shan nu wa ni gaw, grai matsan ma ai. Kaji ai aten hta, shi gaw kanu kawa ni hte rau yi sun galaw nna, asak (20) ning du ai shaloi Capuchin Tawra Jau Jawng de shang mat wa wu ai.

1722 ning hta, shi gaw Tawra Jau Wuhpung a ga sadi hkam la nna, da da gawk kaw Brother (Prat tup Jau n tai ai sha Lay Brother) tai nna bungli galaw ai. Brother Ignatius gaw, Karai Kasang myit ra ai hpe hkan shatup ai majaw, shi a sak hkrung ten na hpang jahtum mali shi ning laman, grit htum ai amu rai nga ai, shara shagu pru pru shang shang rai shani tup garum hkan hpyi hkawm ai. Shana aten hta gaw, akyu hpyi nna aten shama ai.

Lam hkan na ma kaji ni gaw, shi a san seng san pra ai myit jasat hte shagrit shanem ai myit ni hpe mu nna shi hpe grai tsawra ma ai. Shanhte gaw, shi kaw na, Karai Kasang a lam, akyu hpyi ai lam ni hpe sharin la ma ai. Shi hte hkrum shaga lu ai hpang hkamja lam bai lu la ai ni mung grai law ma ai.

San Pra ai Ignatius gaw, 1781 ning, May shata (11) ya shani hta Madu kaw yup pyaw mat wa sai rai nga ai.

Shi n nga mat ai hpang, 1940 ning, June shata (16) ya shani hta dai aten na Wa Sarabyin Pisu (XII) kawn shi hpe A lu ai masha dang dat sai rai nga ai.

Dai hpang 1951 ning, May shata (31) shani hta gaw, Wa Sarabyin Pius (XII) sha, shi hpe San Pra ai masha dang dat let, shi a Poi Nhtoi hpe mung May shata (10) ya shani ngu masat shagrau dat ya sai rai nga ai.

Daini Nawku hpung gaw, Laconi Mare na San Pra ai Ignatius a Poi Nhtoi galaw nga ga ai aten hta, Kaning re ai magam bungli sha mi raitim, Karai Kasang WA hte arau hkawmsa shakut shaja lu na chyeju atsam ni hpe lak san hpyi la nga ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)