Kasa Yaku Kaba a Poi Nhtoi (July 25) 25 July 2022

Kasa Yaku Kaba a Poi Nhtoi (July 25)

Kabu Gara Shiga ka ai Kasa Yawhan a kanau hpe Yaku Kaba ngu ai gaw shi hta grau kaji ai Kasa Yaku hte ginhka lu na matu rai nga ai. Kasa Yaku hte kahpu Yawhan gaw, Kawa Zebedi hte rau nga hkwi nga ai kaw nna shi a hpang hkan na matu, Madu Yesu shaga wu ai. (Mahte 4:19)

Madu Yesu gaw, shan nau hpe Boanerges, shing n rai “Muq gung ai kasha ni,” nga nna shamying ya ai. (Marku 3: 17)

Dai gaw, shan nau a myit kahtet ai myit jasat a majaw rai nga ai. Ga shadawn, kalang mi na Samaritan ni a mare langai mi kaw, Madu Yesu shang mayu timung, mare masha ni ahkang n jaw ma ai. Shaloi Yaku yan nau gaw, Madu hpe “Lamu na wan jahkrat nna dai mare hpe jahkru shamyit kau na matu” tsun ma ai. (Luka 9:54)

Chyoi Pra ai Wenyi yu hkrat wa ai Pentecost Nhtoi a shawng shan nau a sasana magam gun myit gaw ajet garai n rai shi nga ai. Dai majaw, shan nau a kanau gaw, Madu Yesu hte hkrum ai shaloi shan nau hpe Madu a hkra maga de langai, pai maga de langai shara jaw na matu hpyi shawn ai rai nga ai. (Mahte 20:22)

Kasa Yaku gaw, Kasa Petru yan Yawhan hte rau Tabaw Bum nsta kaw Madu Yesu Nsam Galai ai hpe mu lu ai shaman chyeju lu la ma ai. (Mahte 17: 1)

Kasa ni yawng a shawng e, makam masham a majaw sat kau hkrum ai shaman chyeju mung, Yaku hkam sha lai wa sai. Herod Agrippa (1) up hkang nga ai A.D (44) ning hta Yaku gaw rim hkrum ai hpang sat kau ai hpe hkrum lai wa sai. (Kasa 12: 2)

Yaku a nden ja ai myit hpe mu nna shi hpe mara tam ai wa gaw, myit malai lu ai hpang Madu Yesu hpe hkap la ai sha n-ga, Yaku hte rau baw htau sa kau hkrum nu ai. Hkai hkrat wa ai Maumwi hta Yaku gaw, dai ten e mungkan a jahtum ngu shadu ai Spain Mungdan du hkra Kabu Gara Shiga hkaw shabra lai wa sai rai nga ai. Kasa Yaku Kaba a hkum tsawp hpe Yerusalem mare kawn Spain Mungdan Santiago De Campostela Nawku Jawng de htawt la ma ai. Tsaban ka-ang ten kaw nna dai shara gaw, Makam Masham akyu hpyi bu hkawm ai shara hta mying kaba ai shara tai nga sai rai nga ai.

Kasa Yaku Kaba n nga mat ai hpang, Nawku hpung kaw nna, Shi a Poi Nhtoi hpe shaning shagu July (25) ya shani galaw ya nga ai rai nga ai.

Daini Nawku Hpung gaw, Kasa Yaku Kaba a Poi Nhtoi hpe galaw nga ai aten hta, Madu Yesu Sumsing Lamu de lung mat wa ai hpang, anhte Hkristan Hpung Masha ni hpe Madu Yesu a Kabu Gara Shiga hkaw matsun ginlen ya taw nga ai, Kasa ni a lam hpe bai myit dum sumru nna, anhte mung Madu Yesu a Kabu Gara Shiga hpe bai ginlen ya lu ai ni byin tai lu hkra shakut sa wa nga ga law. 

By;

Sister Rose Angeline Maran Nang Doi (SFX)

RVA-Kachin Service (Myitkyina)