Kasa Philip hte Yaku Yan a Poi Nhtoi (May 3)

Kasa Philip hte Yaku yan a masat dingsat nawku htingnu langai mi hpe Roma mare kaw gap da nga ai re. A.D 563 ning kaw nna, Kasa yan hpe arau hkungga jaw shagrau hkrat wa ai gaw, daini na aten du hkra rai nga ai.

Kasa Philip gaw, Galile Ginwang, Betsaida kahtawng masha rai nna, Kasa Yawhan a sape mung rai nga ai. Madu Yesu a hpang hkan tai mat ai shaloi, Mesiya Hkye La Madu hpe shi mu lu sai lam, Nathanael hpe wa tsun dan ai. Raitimung, Nathanael n kam nga ai. Dai majaw, Philip gaw Nathanael hpe “say u u” (Yawhan 1: 43-46) nga nna tsun ai. Shawa wuhpung kaba hpe Madu Yesu lusha daw sha ai mabyin hta, “Denari gumhpraw lahkawng tsa hte lusha mari timung, shawa masha shagu hkyep sha pyi gu hkra lu jaw sha na n rai nga ai.” nga nna, Philip gaw, Madu Yesu hpe htan ya ai. (Yawhan 6:7)

Hpang jahtum shana shata sha ten hta Philip gaw, “Kawa hpe madun dan rit.” nga nna Madu Yesu hpe hpyi nem wu ai. Shaloi Madu Yesu gaw, “Nde nlaw na hkra, Ngai nanhte hte rau nga nga sai; Philip e dai pyi nang Ngai hpe n chye wu ni? Ngai hpe mu yu ai wa gaw, nye a Wa hpe mung, mu sai re.” nga nna Madu Yesu bai htan ya ai. (Yawhan 14: 8-9)

Kasa Philip gaw, Asia Minor Ginwang, Phrygia, Hierapolis mayan Kabu Gara Shiga hpe hkaw shabra ya lai wa sai. Shi gaw, dai ginwang kaw nna Wudang hta jen noi sat kau ai hkrum wu ai.

Kasa Yaku Kaji (James) gaw, Alpheus a kasha rai nga ai. (Marku 3:18)

Bai nna shi gaw, Madu Yesu a lawu lahta kahpu kanau mung rai nga ai. (Mahte 13:55)

Hpang de, shi gaw Yerusalem mare kaw na Saradaw tai wa sai. Shi gaw, “Yaku a Shakum Laika” ni hpe mung ka da ya sai. Shi a san seng chyoi pra ai myit jasat ni a majaw shi hpe “Dingman Wa” nga nna shamying nga ai re.

Caesrea mare kaw na mungkan labau ka sara kaba Eusebius gaw, Kasa Yaku hte “Shi a lahput ni gaw, gawla-uk lahpun zawn nan ja mat nga ai; shi gaw, aten shagu hputdi let akyu hpyi ai wa ria nga ai.” ngu nna ka shalawm da ai. Kasa Yaku gaw, “Madu Yesu gaw, Messiah Hkye La Madu re.” nga nna hkaw shabra ai majaw, A.D (62) ning hta, Nawku Htingnu ntsa kaw nna ga de kabai jahkrat hkrum ai hpang, nlung hte kabai sat kau hkrum wu ai.

Daini, Nawku Hpung gaw, Kasa Philip hte Yaku yan a Poi Nhtoi hpe galaw nga ga ai hte Maren, anhte hpung masha ni mung, tinang lu da sai Hkristan Makam Masham hpe ta tut sak se hkam ai ni byin tai lu hkra shakut sa wa ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)