Kasa Petru hte Pawlu Yan a Poi Nhtoi (June 29) 29 June 2023

Kasa Petru hte Pawlu Yan a Poi Nhtoi (June 29)

Kasa Petru gaw, Kasa ni yawng a Ningbaw “Prince of the Apostles” rai nga ai. Shi gaw, Galile Mung na nga hkwi sha ai wa rai nga ai. Madu Yesu, shi hpe shaga la ai hte rau, shi lu malu yawng tawn kau da nhtawm, madu Yesu a hpang de hkan nang mat wa ai. (Marku 1:17)

Madu Yesu gaw, Filipi Ginwang, Caesarea Mare kaw na Simon nga ai shi a mying hpe Petru (Lunghkung) nga nna galai shamying ya kau ai. Madu gaw, “Nang Petru rai ndai; dai Lung hkrung ntsa Nye a Nawku Hpung hpe ngai gaw de da na; dai Nawku Hpung hpe Nga-rai chyinghka ni n dang lu na.” (Mahte 16:18) nga nna matsun da sai rai nga ai.

Shi gaw, Madu Yesu hte aten tup rau nga ai wa mung rai nga ai; raitimung, Madu Yesu hpe masum lang ting nyet kau ai agung alau mung hkrum lai wa ai. Madu Yesu gaw, Petru shi hpe teng sha tsawra ai kun, nga nna masum lang san wu ai. (Yawhan 21:15)

Madu Yesu sumsing lamu de lung mat wa ai hpang, Kasa Petru gaw, Yuda Iskarut a malai Mathias hpe lata masat ai lamang hpe woi awn galaw ai. Petru gaw, Madu Yesu hpe Mesia Hkye Madu re, nga nna n hkrit n tsang ai sha tsun shapraw ya ai. A.D (49) ning hta, Yerusalem Zuphpawng “Council of Jerusalem” galaw ngut ai hpang Kasa Petru gaw, Kabu Gara Shiga hkaw shabra na matu Roma mare de hkrun lam pru sa mat wa nu ai.

A.D (64) ning hta Nero Hkawhkam gaw, Nawku Hpung hpe laja lana sat zingri shamyit ai aten hta, Kasa Petru mung Vatican Kawng ntsa e nhtang chyaw rai jen noi sat kau hkrum lai wa sai rai nga ai.  

Kasa Pawlu gaw, “Tara Maigan ni a Kasa” (Apostle to the Gentiles) nga nna shamying hkrum ai Kasa rai nga ai. Shi gaw, Tarus mare na, Hparishe tara hpe ra n rawng hkra, hkrak rai shatup lai wa sai rai nga ai. Damasku mare de Hpung Masha ni hpe sat shamyit na ahkang sa hpyi na nga nna rawt sa wa yang lam kaw, madu Yesu hkum nan hte shaga lu ai hpang myit malai lu wa ai. (Kasa 9:18)

Dai hpang, Asia hte Greece Mugndan jut shara shagu de Kabu Gara Shiga hkaw shabra ai magrau grang dik ai share shagan kaba tai wa sai. Dai Mungdan hkan na masha law law hpe mung, Nawku Hpung de woi jashawn kau da sai. Dai Hpung Masha ni hpang de shi laika shgun ai hpe Kasa Pawlu a Shagun Laika ni “Letters of St. Paul” ngu shamying let Ga shaka Ningnan kaw shalawm da nga ai re. Kasa Pawlu hpang jahtum lang, Yerusalem de du ai shaloi, shi a myu rai nga ai Yuda amyu sha ni, shi hpe rim la kau ma ai. Kasa Pawlu gaw, Karai Kasang hpe n gawn n sawn ga tsun ai, nga nna shanhte mara tsun shagun ma ai. Kasa Pawlu gaw, Roma mare kaba kaw htawng rawng nga ai shaloi, “Ya ngai wa ra mat na sai; jahtum du hkra ngai kaja ai gasat gala lam galaw da se ai; makam masham hpe ngai jahtum du hkra manoi manat nga ni ai.” (2 Timo 4:6-7) nga nna ka da nga ai.

A.D (64) ning hta Ostiense Way ngu ai shara kaw, Kasa Pawlu a baw hpe kahtam daw nna sat kau ma ai.

Kasa Petru hte Pawlu a lupwa ntsa Hkawhkam Kaba Constantine gaw, grai hkik hkam dik ai Nawku Htingnu hpe gaw gap da ya sai. Dai Nawku Htingnu gaw, hpang de grai mying kaba dan hkung dik ai Kasa Petru hte Pawlu yan ai Nawku Htingnu tai wa sai rai nga ai.

Nawku Hpung gaw, Ndai Kasa Petru hte Pawlu yan hpe shakawn shagrau ai Poi Nhtoi hpe shaning shagu June Shata (29) ya shani galaw ya nga ai re. Raitimung, Jau n lu du ai shara hkan na Nawku Hpung Masha ni yawng, shan lahkawng a Poi Nhtoi hta sa du shang lawm lu hkra nga nna, June Shata (29) hte ni dik ai Laban shani hta ding yang galaw ya nga ai re.

Daini Nawku Hpung gaw, Kasa Petru hte Pawlu a Poi Nhtoi hpe galaw nga ga ai aten hta, anhte  hpung masha ni mung, Kasa Petru hte Pawlu a kasi hpe yu la nna, anhte a wenyi n gun atsam hpe shajat la nga ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)