Kasa Pawlu Myit Malai Lu ai Nhtoi (January 25) 25 January 2023

Kasa Pawlu Myit Malai Lu ai Nhtoi (January 25)

San Pra ai Pawlu gaw, Yuda htung tara hpe hkrak hkan shatup ai Yuda hpung kanu kawa ni kaw na Turkey Mungdan, Tarsus mare kaw shangai wa ai rai nga ai.

Nawku hpung gaw, shi hpe “Tara Maigan ni a Kasa” (Apostle of the Gentiles) ngu nna shing teng amying jaw shagrau nga ai re. Shi gaw, Yuda amyu sha Lekmat (Citizenship) sha n-ga, Roma amyu sha Lekmat mung lu da ai wa rai nga ai. Yerusalem mare hta grai mying kaba dik ai Sara Kaba Gamaliel kaw laika hpaji sharin la nna, Hparishe ni a rit kawp tara hpe hkrak tup ra n rawng hkra rai hkan shatup ai Hparishe masha langai mi mung rai nga ai.

Yuda Hparishe ni a htung hpe hkrak tup rai hkan shatup ai wa re majaw, Hkristan Hpung hpe gaw, n teng n man ai hpung hku nna mu mada wu ai. Dai majaw, Pawlu gaw, San Pra ai Stephen hpe nlung hte kabai sat ai mabyin hta mung, Nawku Hpung hpe jahten shamyit hkawm ai magam hta mung, lawm nga ai hpe labau hta mu lu nga ai re.

Moi shawng de, daini na nhtoi hta e byin ai mabyin gaw; Damasku mare kaw Hkristan Hpung hpe sa rim na matu, Hparishe hkinjawng ni e, Pawlu hpe lit shatsam dat ma ai. Shani ka-ang ten, Damasku mare de shi du ni wa mahka e, htoi tu ai dik nhtoi shingkang langai mi gaw shi a makau kaw htoi tu kabrim wa ai. Shaloi shi gaw, ga ntsa de kadawng taleng taw mat sai. Shaloi shi na lu ai nsen gaw; “Pawlu e, Pawlu e, nang hpa majaw ngai hpe zingri nga nta?” ngu ai rai nga ai. Dai nsen na ai shaloi, Pawlu gaw, “Nang kadai wa rai a ta?” ngu nna san dat wu ai shaloi, “Ngai gaw, nang zingri hkawm ai Yesu rai nga nngai. Rawt u, mare de shang wa u; dai yang nang hpa galaw ra na lam matsun ya na rai nga ai.” (Kasa 9:4-6) nga ai n sen pru wa ai.

Shi hte rau nga ai ni gaw, nsen hpe gaw na lu nna, masha kadai hpe mung n mu lu ma ai majaw, shanhte yawng mau mat ma ai. Shaloi Pawlu gaw, ga kaw na rawt tsap dat ai shaloi, shi a myi n mu mat sai. Dai majaw, shi hpe kaga masha ni lata hte gin dun let mare de woi shang wa ma ai. Masum ya na ai hpang shi hkring sa nga ai nta de, Ananias mying ai masha langa mi du shang wa ai. Dai wa gaw; “Hpunau wa Pawlu e, na a myi bai mu lu na matu hte Chyoi Pra ai Wenyi hpe nang hkam lu u ga matu, Madu Yesu gaw, nang hpang de ngai hpe shangun dat ai re.” (Kasa 9:18) nga nna tsun pru ai. Dai shaloi jang, Pawlu gaw, Kashin kamun hpe hkam la nu ai.

Shi gaw, Shawlu kawn Pawlu ngu Kashin Kamun mying hkam la nna, Dai shani kawn, Madu a Kabau Gara Mungga hpe hkaw tsun sak se hkam hkawm ai, Kasa Kaba Langai mi byin tai wa sai rai nga ai.

A.D 65 ning ram hta, Makam Masham a majaw, Kasa Langai mi hku nna, sak kau hkrum lai wa sai lam labau hta mu lu nga ai.

Daini San Pra ai Kasa Pawlu Myit Malai  Lu ai Poi Nhtoi hpe Nawku hpung galaw ya nga ai aten, anhte a myit masin hta mung, Madu Yesu shi hkum nan byin shagun ai, hkawmsa shangun mayu ai magam lam ni hta kalang lata myit malai let hkan galaw shatup lu na atsam jaw ya rit ga matu, lak san akyu hpyi la nga ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)