Karai a San Pra ai Yawhan (Shnr) St. John of God a Poi Nhtoi (March 8) 08 March 2023

Karai a San Pra ai Yawhan (Shnr) St. John of God a Poi Nhtoi (March 8)

Karai a San Pra ai Yawhan @ St. John of God gaw, “Hospitaller Brothers” ngu ai Tsirung Brother Magam Gun Wuhpung hpe shawng de hpang da ai San Pra ai masha rai nga ai.

Shi gaw, 1495 ning, March shata (8) ya shani hta, Spain Mungdan kaw shangai chyinghkai wa ai rai nga ai. Shaning law law Spain hpyen la tai nna, n hkru n kaja ai baw sumhpa galaw lai wa ai, dai hpang shi gaw, kaja wa teng sha myit malai lu nna, Nawku makam masham de bai du wa ai. Shi a asak (40) ning du ai shaloi, Africa mungdan de sa mat wa ai. Dai hpang, Spain mungdan de bai du wa nna, Granad mare kaw, Chyoipra ai Sumla ni, Laika buk ni dut ai seng wa hpaw nu ai.

1538 ning na lani mi hta e, Avila mare kaw na, San Pra ai Yawhan tara hkaw ai hpe sa na hkrup ai, tara hkaw ai ga ni hpe na ai hpang shi gaw, n dum n dam rai byin wa ai majaw, shi hpe myit n gring mat sai ngu shadu nna mana htawng kaw sa bang kau ai hkrum nu ai.

Ndai mahkrum madup kaw nna shi akyu shapraw la lu sai. Dai gaw, “Matsan masha ni hte machyi makaw hkrum ai masha ni hpe matsan dum lama galaw lu ai amu hpe gun hpai na” nga nna myit daw dan la lu nu ai. Dai majaw, 1539 ning hta Granad mare kaw nta langai mi shap la ai; dai nta kaw “Hospitaller Brothers” ngu mying ai Magam Gun Wuhpung hpe de hpang nu ai. Shanhte gaw, tsirung amu hpe madung tawn ai Magam Gun Wuhpung rai nga ai.

Tuy Mare kaw na, Saradaw gaw, Brother John a shagrit shanem ai myit jasat ni a majaw, shi hpe e, “Karai a Yawhan” @ John of God, nga nna shamying ya sai. Brother John gaw, matsan ai ni hpe yu gawn ai kaw jai lang na matu garum alu hpyi hkawm ai shaloi, shi a n gup kaw nna, “Masha kaga a matu kaja ai amu galaw ya nna, tinang a matu kaja ai amu galaw la mu.” ngu nna alu jaw ai ni hpe bai matsun da ya ya rai wu ai.

Lani mi hta, shi a Saradaw gaw, “Na a tsirung gaw, mara galaw ai amyu shayi ni nga ai shara she rai nga ai.” ngu nna tsun wu ai. Shaloi Brother John gaw, “Wa Saradaw e, nye a tsirung kaw ngai hta lai nna, mara lu ai kadai nga ai mung ngai n chye n ngai.” ngu nna bai htan ya ai.

Brother John gaw, shi a asak (55) ning du ai shaloi, 1550 ning, March shata (8) ya shani hta hka kaw di hkrat ai masha langai mi hpe sa hkye la ai hpang shi mung nsa hti mat ai.

Shi n nga mat ai hpang, 1630 ning, September shata (21) ya shani, dai aten na Wa Sarabyin Urban (VIII) kawn, shi hpe a lu ai masha ngu masat dat sai rai nga ai.

Dai hpang, 1690 ning, October shata (16) ya shani gaw, dai aten na Wa Sarabyin Alexander (VIII) kawn, shi hpe San Pra ai masat dang dat let, shi a Poi Nhtoi hpe mung, March shata (8) ya shani ngu masat shagrau dat ya sai rai nga ai. 

Bai nna, Shi hpe 1886 ning hta Wa Sarabyin Leo (XIII) gaw, “Tsirung ni a alak mi rai kam shamyet mai ai San Pra ai John” nga nna masat shagrau dat nu ai.

Daini Nawku hpung gaw, Karai a San Pra ai Yawhan @ St. John of God a Poi Nhtoi hpe galaw nga ga ai aten hta, anhte myit masin hta mung, yak hkak jam jau nga ai ni a matu galoi mung myit ya lu ai ni byin tai wa lu hkra, akyu hpyi la nga ga law.

 

By;

Sister Rose Angeline Maran Nang Doi (SFX)

RVA-Kachin Service (Myitkyina)

 

Add new comment

6 + 0 =