Karai Kasang a Kanu, Nu Maria a Poi Nhtoi (January 1)

Chyoipra ai Kahtawlik Nawku Hpung gaw, moi shawng kaw nna, Chyoi Pra ai Hkawnsek Nu Maria hpe, (Karai Kasang a Kanu) ngu nna hkungga shagrau hkrat wa sai rai nga ai. Raitimung, tsa ban (4) laman hta, Constantinople (ya prat na Turkey mungdan a mare daju Instanbu) mare kaw na, Saradaw kaba rai nga ai Nestorius gaw, Karai Kasang a Kanu hpe Greek ga hku nna shagrau ga rai nga ai, “Theotokos” ngu ai ga masat hpe n hkap la ai. Shi tsun sharin ai gaw, Nu Maria gaw, Masha atai sa la ai Yesu a Kanu she re; Karai Kasang a atai lu ai Yesu a Kanu n re, nga nna, ating anang ninghkap let sharin ya wu ai.

A.D 431 ning hta, Chyoipra ai Nawku Hpung gaw, Efesu mare kaw, Nawku Hpung a Zuhpawng kaba hpe galaw ma ai. Dai Zuhpawng kaw nna, Chyoi Pra ai Nu Maria gaw, Karai Kasang majing rai nga ai, Madu Yesu a Kanu majing rai nga ai majaw, shi hpe Karai Kasang a Kanu majing nan re, nga nna hkap la ai hte masat shagrau nna aja awa madi shadaw ya sai.

Ndai Efesu mare Zuphpawng a awng padang ninglaw masat masa hku nna, dai Zuphpawng kaw sa du dung lawm ai Saradaw ni hpe shawa Hpung Masha ni gaw, shanhte a kahpa ntsa kaw hpai nhtawm, mare shinggyup let shagrau ya lai wa ma ai. Wa Sarabyin Sixtus (III) mung, dai zuphpawng a masat masa shatai na matu, grai hkik hkam tsawm ai Santa Maria Maggiore mying ai Nawku Htingnu Kaba gaw gap shachyaw da ya ai hpe, daini du hkra sakse tai mu mada lu nga sai re.

Daini, Nawku hpung gaw, Karai Kasang a Kanu a Poi Nhtoi hpe galaw nga ai aten, anhte marai hkum shagu mung, daini tup hta, tinang myit ra ai hku n rai, Karai Kasang wa myit ra sharawng awng ai hte hkawm sa lu na chyeju hpe jaw ya rit ga matu, lak san akyu hpyi la nga ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)