Kanty Mare kaw na San Pra ai Yawhan a Poi Nhtoi (December 23) 23 December 2022

Kanty Mare kaw na San Pra ai Yawhan a Poi Nhtoi (December 23)

San Pra ai Yawhan gaw, lai wa sai 1390 ning, June shata (30) ya shani, Poland Mungdan, Kanty mare kaw shangai wa nna hpaji ninghkring tai wa sai rai nga ai.

Shi gaw, mungkan hpungtang hpaji hte wenyi hpaji hpe kapyawn nna, jangma ni hpe sharin ya chye ai. Makam masham hte seng nna, kam shamyet lu ai Jau langai mi mung rai nga ai. Jau Yawhan gaw, n teng n man ai lam ni hpe ning hkap chye na matu shi a jawngma ni hpe aten shagu shadum ya nga ai.

Bai nna, Jau Yawhan, shi ayan na shadum ya nga ai ga gaw, “Nanhte galaw shachyen sa wa ai lam shagu hta nanhte lang ra na lak nak ni gaw, myit galu ai, si mani ai ladat, hpu nau tsawra myit jasat ni rai nga ai. Tinang kam ai hku nna duk shamak rai galaw ai myit jasat ni gaw, nanhte a wenyi lam hta sha n-ga, manu dan akyu rawng ai lam shagu hpe jahten sharun kau ya ai baw re hpe galoi mung dum chye da nna hkan shatup mu.” ngu ai  matsun maroi ga rai nga ai.

Shi gaw, yak hkak ai lam shagu hpe hkam sharang ai myit hte nga lai wa ai. Shi a yupra gaw panep n lawm ai; shan mung n sha ai. Shi hkam ja lam hte seng nna hpaji sa jaw ai ni hpe, “Zaibru jang kaw sak hkrung nga lai wa sai anhte a jiwoi jiwa ni gaw lusha gam, jam jau jam hkau hkrum nga lai wa timung asak grau galu ma ai.” nga nna she bai nhtang htan ya lai wa ai.

Kalang mi hta, Jau Yawhan gaw shat sha nga yang, mawhpyi langai mi makau hku lai wa ai. Shaloi jang, shi sha nga ai lusha ni hpe mawhpyi wa hpe sa hpai jaw kau ai. Mawhpyi wa hpe shi a shat ban ting sa hpai jaw kau nna shi a shat sha gawk de bai shang wa ai shaloi gaw, shi a shat ban gaw mi na hte raw rai nga taw ai hpe wa mu wu ai. Dai mabyin a hpang gaw, dai Dakkasu kaw shani shagu mawhpyi langai sha na matu lusha lajang da da rai mat wa ai, nga ai.

Jau Yawhan hpe Olkusz mare kaw aten ram ram na hkra ginwang up Jau lit magam hpe shatsam da ma ai. Hpung masha ni gaw, Jau Yawhan a shakut sharang ai myit jasat ni hpe shakawn ma ai hte Jau hpe grai hkungga tsawra manu shadan lai wa ma ai.

San Pra ai Jau Yawhan gaw, 1473 ning, December shata (24) ya shani, Shi a asak (83) ning hta, Madu kaw yup pyaw ban sa mat wa sai rai nga ai.

Wa Jau Yawhan n nga mat ai hpang, 1676 ning, March shata (28) ya shani, dai aten na Wa Sarabyin Clement (10) kawn, Shi hpe A Lu ai Masha ngu masat shagrau dat ya sai rai nga ai.

Dai hpang, 1767 ning hta gaw, dai aten na Wa Sarabyin Clement (13) kawn, Shi hpe San Pra ai Masha dang dat let, Shi a Poi Nhtoi hpe mung, December shata (23) ya shani masat shagrau dat ya sai rai nga ai.

Dai hta n-ga, Shi hpe Wa Sarabyin Clement (13) gaw, “Wa Jau Yawhan gaw, sharin shaga ai hte maren hkan shatup ai kasi kamang sha n-ga, hpaji ning hkring ni kaw na malawm langai mi tai ging ai wa re.” nga nna shagrau dat ya sai rai nga ai.

Daini Nawku Hpung gaw, San Pra ai Wa Jau Yawhan a Poi Nhtoi hpe galaw nga ga ai aten hta, lahta de tsun lai wa sai, Wa Jau Yawhan a tsun sharin shaga matsun mungga hte maren, sak hkrung hkawmsa nga ga law.  

By;

Sister Rose Angeline Maran Nang Doi (SFX)

RVA-Kachin Service (Myitkyina)