June 23 San Pra ai Joseph Cafasso a Poi Nhtoi 23 June 2022

San Pra ai Joseph Cafasso a Poi Nhtoi (June 23)

San Pra ai Joseph Cafasso gaw, Italy Mungdan, Castelnuovo Mare kaw lai wa sai 1811 ning, January shata (15) ya shani shangai chyinghkai wa ai rai nna, San Pra ai Don Bosco hte mare langai mi kaw na sha rai nga ai. Shi Jau tai wa ai hpang, San Pra ai Don Bosco hpe grai garum lai wa sai. 1841 – 1860 ning laman, San Pra ai Don Bosco a wenyi lam woi tai ya lai wa sai.

San Pra ai Joseph Cafasso gaw, 1833 ning hta Jau tai wa nna, Turin mare kaw na Nawku Hpung hte seng ai Dakkasu “Ecclesiastical College of Turin” kaw shi a prat tup lit gun hpai lai wa sai. Akyang lailen hte seng ai hpaji “Moral Theology” hte Jau ni hpe shading sharai ai masing ni, mara raw ai lam hte seng ai hpaji ni hpe sharin ya lai wa sai. Shi gaw, matsan masha ni, grau nna htawng masha ni hte sat kau na matu dawdan hkrum tawn sai ni hpe yu gawn lai wa ai.

San Pra ai Jau Joseph Cafasso ka da ai “Jau ni a akyu hpyi myit sumru yu ai lam” (Meditations of Clergy Retreats) hta, Jau langai mi hta n nga n mai ai myit jasat ni gaw, myit galu ai, matsan mayan nga chye ai myit jasat, shagrit shanem sumnung shingdi ai myit, myit sumru yu chye ai myit, amu hte nawng magam hpe sharawng ai myit ni rai nga ai. Raitimung, mungkan a nhtoi tai, ginding aga a jum tai nna, Karai Kasang a magam gun majing ni a matu, ra kadawn dik ai gaw, wenyi ni hpe nhtoi jahtoi ya ai hte shachyoi shapra ya ai bungli ni rai nga ai. (To enlighten and sanctify souls) nga nna ka da ai hpe, shi a labau laika hta mu lu nga ai re.

San Pra ai Jau Joseph Cafasso gaw, 1860 ning, June shata (23) ya shani, Madu kaw yup pyaw ban sa mat wa sai rai nga ai. Shi a Hkum Tsawp Moi Mang makoi mayang lamang hta, San Pra ai Don Bosco gaw, “Wa Jau Joseph gaw, Jau ngu ai a kasi majing, Jau ni a Sara, ningtawn ai hpaji jaw ai wa, machyi ai ni hpe shalan shabran ya ai wa, si wa maw ai ni hpe n gun jaw chye ai wa hte masha yawng mayawng a jinghku wa re.” nga nna mungga htawn lai wa ai.

San Pra ai Jau Joseph Cafasso n nga mat ai hpang, 1925 ning, May shata praw (3) ya shani, dai aten na Wa Sarabyin Pius (11) kawn, Shi hpe A Lu ai Masha hku nna masat shagrau dat sai rai nga ai.

Dai hpang, 1947 ning, June shata (22) ya shani hta, dai aten na Wa Sarabyin Pius (12) kawn, Shi hpe San Pra ai Masha dang dat let, Shi a Poi Nhtoi hpe mung, June shata (23) ya shani ngu masat shagrau dat ya sai rai nga ai.

Daini Nawku Hpung gaw, San Pra ai Jau Joseph Cafasso a Poi Nhtoi hpe galaw nga ga ai aten hta, anhte Hkristan Hpung Masha ni mung, Madu Yesu a Hpang Hkan ni rai nga ga ai hte maren, tinang a manaw manang ni a matu, nhtoi tai, jum tai ya lu ai ni byin tai nga lu hkra shakut sa wa ga law.

 

By;

Sister Rose Angeline Maran Nang Doi (SFX)

RVA-Kachin Service (Myitkyina)

Add new comment

3 + 16 =