Jau Ni A Prat Labau (Daw 2) 20 Nov, 2018

Jau ni a prat labau    ( daw 2 )

Nawku hpung a labau lam hpe hkap madat la na ten du sai hte rau, daini na lamang hta, lai sai ten Wunpawng Bro. ni kawn ka lajang da ai, Jau ni a prat labau ngu ai gin lam hte seng nna, ngam nga ai daw hpe matut gam garan ya mayu n’ngai.

Nu wa hpu nau ni, Chyoi pra ai Catholic Nawku hpung hta, moi Madu yesu a lak htak kawn nna, Kasa ni hpe nawku hpung hpe makawp maga na matu, lak san chye ju kumhpa, a’hkaw a’hkang ni jaw da sai rai nga ai. Ya daini du hkra, nawku hpung hpe woi awn nga ai, Wa sarabyin, Wa saradaw ni, Jau ni hku nna, lahpa galai up hkang nga ga ai re. Dai majaw, Nawku hpung a labau hta, grai nan, manu dan, tsawm htap ai, htuk manu ai, labau shang rai nga mali ai re. Karai kasang a chyeju kum hpa lak san hkam la lu ai ni sha n’dai Jau magam hpe gun hpai lu ai rai nga ai. Nang Jau gade mung tai mayu u, karai kasang n’lata la jang gaw, gara hku mung Jau magam hpe gun hpai lu na nrai nga ai.

 Nu wa ni, karai kasang gaw, shi hpan da ai marai hkum shagu hpe shi shara hte shi chyeju kumhpa jaw da chyalu rai nga ai. Daizawn  chyeju nga ai shara hta, a’gung a’lau gaw, n’sim n’sa nga ai hpe dum ra nga ai. Anhte nawku hpung masha n’kau gaw, Jau nga jang lam shagu hta grai nan hpring tsup ra ai, hpring tsup sai ngu hkap la da chye nga ai. Kaja wa mung, shakut ai hkrai gaw rai nga ai. Ratim, Shinggyim masha gaw, gawng kya chye ai hpe myit dum ra nga ga ai. Daizawn, gawng kya wa jang a’myu myu  nga nna mara shagun chye nga ai. Dai hpe myit dum nna, anhte nawku hpung masha ni, Jau ni hpe myit dum kyu hpyi ya nga ga.

          Jau prat magam bungli ni gaw a’hpa n’tang sha n’rai nga ai. Madu Yesu a hpang hkan ai, shi madu zawn shakut ai ni re majaw, anhte nawku hpung masha ni a matu n’nga n’mai nan rai nga ai. Hpa majaw, nga jang, wenyi makam masham hta ra a’hkyak dik Sakaramentu ni hpe jau ni sha jaw ya lu nga ai re. Ga shadawn, hkyak hkayk namman chya mayu ai ngu gaw, a’hkaw a’hkang lu ai, lak san shaman chyeju lu da ai Jau ni sha mai jaw ai rai nga ai. Grau nna, Chyoi pra hkum Sakaramentu hpe shabyin shatai ya na mung, Jau ni sha mai byin ai re. Myit dum lu ai langai mi, naw kaji nga ai ten, jau ni hte tsan ai buga kaw nga ai re majaw, Jau ni sha n’du dingsa chyoi pra hkum n’lu hkam ai hpe myit dum n’ngai. Mara  n’raw, chyoi pra hkum n’hkam ai shaning na wa jang, wenyi n’gun yawm ai zawn nga hkam sha lu ai. Dai gaw Jau ni hte tsan nna nga ra ai majaw, rai nga ai. Dai shaloi she aw…Jau ngu ai ni gade ram ra a’hkyak ai re hpe myit dum wa ai. 

           Nu wa ni, Jau ni gaw, shanhte ap nawng da sai prat hpe kaja wa nan sak jaw ap nawng nga ai ni rai nga ai. Gade mi ru yak jam jau hkrum tim, sagu hpung masha ni hpe lam wai ningshawng tai let, shakut dingyang rai nga ai. Anhte a jinghpaw mung Sasana de shawng nnan wenyi n’li gat hkai mat wa sai, Columban Jau ni a labau hpe gawn yu ai shaloi, Myusha n’bung, malu masha n’bung, mungdan n’bung, kanu kawa, kahpu kanau, dum n’ta hpe kau da rai, asak ap nawng let, shakut mat wa sai majaw, daini anhte makam masham hpe lu la saga ai re. Hkristu a n’htoi shingkang de wai ya sai rai nga ai. Madu karai kasang hpe tsawra kam hpa ai myit, karai kasang a kashu kasha ni yawng, hkye hkrang la ai hta shang lawm lu na matu, Wenyi kawa ni tai ya let, hkali hkawaw n’tsang, majan tsin yam ni hpe hkam sha let, shakut mat wa sai rai nga ai. Columban sasana jau ni gat hkai da ya sai n’li tum ni gaw, ya daini, anhte a wunpawng buga hta buga Sasana jau  ni lu la saga ai re. Maigan Sasana ni, lam amyu myu a majaw, daidaw buga de wa ra mat ai raitim, buga jau ni hku nna, matut lahpa galai gun hpai nga mali ai re.

Nu wa hpu nau ni, Sasana hkrun lam ngu ai gaw, n’loi la nga ai. ru yak jam jau amyu myu hpe hkam sharang let, Madu a magam hpe gun hpai ra ai rai nga ai. Daizawn, madu a magam hpe gun hpai nga ai ten, mayak mahkak, a’gung a’lau ni mung hkrum hkra chye nga ai. Anhte sagu hpung masha n’kau gaw, kalang lang n’chye na ai lam, yu shut ai lam ni byin wa ai ten hta, mara shagun chye ga ai. Masha gaw shut chye ai hpan re hpe malap mali byin chye nga ai re.  Daizawn, byin wa ai ten hta shada da kyu hpyi ya na n’mai malap nga ai. N’hkru n’kaja ai nat tsandan gaw, teng man ai, jaw ai, san seng ai hpe jahten sharun chye ai hpe dum ra ai. Wa Jau Marcian tsun ai hta, "Labau hpe bai gayin yu nna hpaji la ai lam gaw, ya du nga ai (presence time) aten hta kaja dik ai hku sak hkrung na hte du na ra ai (future time) aten ni a matu a tsawm sha hkyen lajang da lu ai lam re" nga nna tsun da ai. Dai majaw, shyinggyim masha yawng gaw shut chye ga ai ngu ai hpe myit dum ra ai.

San Pra ai Mohter Teresa tsun ai, "Shanhte hpe nang shatan taw nga yang, shanhte hpe garum la na ten ni nnga mat na ra ai" nga nna tsun da ai. Dai majaw ra rawng gawng kya ai hpe tsun nga na malai, garum madi shadaw, makawp maga ai gaw, mai kaja dik magam rai nga ai. Reng jang she yawng gaw prat n’nan de du shang lu na rai nga ai. Shing rai, anhte nang ngai yawng mung, wenyi kawa rai nga ai Wa Jau ni hpe makawp maga let, ra gadawn nga ai ni hpe garum madi shadaw lu hkra shakut ga. Sasana magam hta shakut nga ai Jau ni hpe n’gun la let, wenyi n’gun jat wa lu hkra shakut ga ngu n’gun jaw let, ngam nga ai daw hpe du na lamang hta bai hkap madat la nga ga.

Ka lajang ai;    Mama Rose Angeline Maran Nang Doi

                          RVC, Ginjaw Rung, Aung Nan

                          Myitkyina.