Japan Majan ngut ai hpang Columban Jau ni, Sasana Magam lam ( Daw 1 ) 03 September, 2019

Japan Majan ngut ai hpang Columban Jau ni, Sasana Magam lam hta shachyen shaja sa wa ai lam   ( daw 1 )

            Nu wa hpu nau ni, hpyen majan a majaw hkrat sum mat wa ai lam ni law law nga ai raitim, sharin la lu ai lam ni mung law law rai nga ai. Wa Saradaw Usha gaw, byin mat wa ai lam ni ma hkra hpe gumhpawn yu nhtawm me, mai kaja ai hku mu mada, hkap la nga ai. Shingrai, shawng lam a matu, tau nau lajang sa wa ai shaloi, Wa saradaw gaw, na a prat hta, awng dang ai lam loi li mi sha nga ai rai tim, nang myit dik ra ndai, nang tsing magang shakrin nga yang, akyu loi mi sha pru ai zawn rai tim, myit dik nga u. Hpa majaw nga jang, hpang de bungli galaw ai ni, ja, kat, greng ai nsi nai si ni hpe shula lu nna, pyaw na mara ai, nga nna, shadum da nga ai. Matut nna Wa Saradaw gaw, shawng lam magam bungli matut manoi, shachyen shaja sa wa na matu, Columban Jau ni a gin jaw de, hpyi lajin dat ai hte maren, Jau nnan marai (12) tup mung, bai du jat wa sai. Ndai Jau ni hta na, Jau Daniel hkye-ya-no ngu ai wa gaw, (1946) ning, September shata hta, Yangon mare kaba de du shang wa nna, Myanmar mungdan a lamu ga hta, shawng na lagaw lahkam hpe jahkrat lu saga ai rai nga ai. Mungdan hte buga masha ni gaw, kabu gara shiga gat hkai na matu, anhte du sa wa ai Jau ni hpe hkap tau nga ma ai, nga nna, ka da nga mali ai re.

            Bai, gaw gap lam hte shawng lam magam bungli ni shachyen sa wa na matu, Jau ni hpe Wa Saradaw Usha gaw, Sasana shagu de magam gun na matu, lit magam ni hpe hpra hpra garan masat shatsam ya lai wa sai rai nga ai. Majan a shawng kaw nna du nga ai Jau ni yawng, tinang ang ai sasana shagu de, magam gun shakut nga lai wa masai re. Nnan du sa wa ai Jau nnan ni hpe amyu sha ga sharin la na matu, lawu de na hte maren masing jahkrat mat wa ai shaloi, Na-Hlaing mare kaw Sam ga, Tanghpre kaw Jau John Howe hte Jinghpaw ga ni hpe sharin la na matu, lajang mat wa sai. Shingrai, Columban Jau ni, Sasana magam shachyen shaja sa wa ai lam hta, buga masha ni a matu, wenyi lam yan sha nrai, hkum hkrang hkam ja lam a matu mung, gade shakut shaja lai wa sai lam ni hpe mung, bai nhtang sumru yu mai nga mali ai re. Wa saradaw Usha gaw, Jau ni tinang a sasana ginra shara du wa ai hte, shara shagu tsi jaw gawk ni hpe lawan ai hku hpaw sa wa na matu, n gun jaw matsun madun lai wa sai rai nga ai. Shingrai, shawng ningnan na, Columban Jau ni a tsi jaw gawk hpe lai wa sai (1938) ning hta, Na-Hlaing mare kaw hpaw hpang dat lu sai rai nga ai. Rai tim, dai aten na buga masha ni, Sin-na mungdan na tsi mawan ni hpe grai wa, kam hpa ai lam n nga ai majaw, awng dang ai lam nau wa, n nga  ai hpe maram yu lu ma ai. Mungkan majan prat hta e, buga masha ni a, mahkrum madup machye machyang ni, grau law htam wa ai hte, prat dep tsi mawan ni a mau hpa atsam ni hpe mung, mu lu wa ma ai. Ga shadawn, Galang gyi nna hte, Mak-sang ana ni hpe tsi shamai ya lu ai, hkali mak-hka-lawng, kan hkyeng ana hte wawk hkyek ana ni hpe shamai ya lu ai lam hpe mu chye wa ma ai.

            Mungkan majan ngut ai hpang, (1946) ning hta, Na-Hlaing tsi rung hpe matut nna, gaw gap sa wa sai. Dai aten hta Na-Hlaing kaw magam gun nga ai, Wa Jau Phoe:li hpe shama shatsang ai langai mi gaw, hkum hkrang lagaw lata bum ai htung ana byin nna, sa du tsi tsi ai Sam amyu sha ni rai nga ma ai. Ndai ana gaw, hpunau sam amyu sha ni kaw, grau law malawng byin ai lam chye lu ai. Hpa majaw nga jang, n gu ni hpe grai hpraw hkra, htu, gre jahpaw sha ai majaw, dai n gu tum hta kap ai Vitamin (B) dat, ngu ai krin mat wa nna, byin ai re lam chye la lu masai. Shingrai, buga masha ni a matu, hkum hkrang hkamja lam hpe jam jau jaw lu ai gaw, machyi makaw ana ahkya sha n re, aten ladaw katsi kahtet laja lana byin ai lam, Du hkra ladaw hta hkan nna, kawa ai, sai chyup ai hkrung kanu ni hte matse labye, du sat du myeng ni a majaw mung, hkum hkrang hpe du hkra machyi shangun lu nga ai lam ni hte seng nna, tsun shadum nhtawm, yu mada lai wa sai labau lam hpe madat la lu na ga ai. Ndai matse labye ni a jam jau jaw ai lam hte seng nna, kalang mi hta, Wa Jau Obrai a hpung masha, La Bau ngu ai wa, yi hkyen sa ai aten hta, nhtu garang dung nga yang, shingdu de nna, Magwi langai mi htim sa wa nhtawm me, shi a shinglam hte, pe (20) ram tsan ai shara de du hkra, magra dun mat wa ai da. Madu jan jahtau marawn dat ai hte, ga de bai jahkrat kau dat nhtawm me, lagaw hte bai gabye kau nu ai. Shingrai, La Bau a nta de Jau du ai ten, hkrit gajawng nga ai madu jan hte htingbu htingbyen ni, La Bau a makau kaw gumjaw nga ma ai. La Bau a lagaw hpyi gawng sumpum taw nga ai wun ma hpe tsup ni hte ahkyen hkayawp da ai hpe wa mu gajawng ma ai lam gam garan ya let, ngam nga ai daw hpe du na lamang hta bai hkap madat la nga ga.

Ka lajang ai;    Mama Rose Angeline Maran Nang Doi

                          RVC, Ginjaw Rung, Aung Nan

                          Myitkyina.