Huy Mare na San Pra ai Domitian a Poi Nhtoi (May 7) 07 May 2023

Huy Mare na San Pra ai Domitian a Poi Nhtoi (May 7)

San Pra ai Domitian gaw, tsa ban (6) hta san seng san pra rai amu galaw shaja nna sak hkrung nga lai wa sais asana magam gun langai mi rai nga ai. Matsan masha ni hpe galaw na matu grai shakut shaja ai, lusu ai ni n ju n dawng hkrum timung, shanhte kaw na garum la nhtawm, matsan masha ni hpe garum jaw ai. Grau nna hku wa kaba hkrum ai aten hta, lusu ai ni hte hku hkau lam galaw nhtawm matsan masha ni hpe garum jaw lai wa sai rai nga ai.

San Pra ai Domitian gaw, Fransik Mungdan, Gaul Ginwang kaw na rai nga ai. Shi Saradaw tai wa ai shaloi, Nethterlands Mungdan, Maastricht mare kaw lit shatsam ai hkrum sai. Meuse Hkyawk kaw na shi a amyu sha ni hpe Hkristian makam masham de lu jashawn la nu ai. Shi gaw, A.D 560 ning, May shata (7) ya shani hta Madu kaw yup pyaw ban sa mat wa sai rai nga ai. Shi a nrut nra ni hpe Belgium Mungdan, Huy mare kaw makoi mayang da let hkungga shagrau nga ai re.

Nawku hpung gaw, ndai zawn tara maigan ni hte Hpung htak ai ni law la ai aten hta byin mai ai ladat hte shkut lai wa sai re. Kaga Chyoi Pra ai masha ni zawn, Saradaw Domitian gaw, grai shakut shaja let, myit galu kaba hte masha ni a kraw kata na, makam masham myit ru jung ngang kang wa hkra dawk bang ya ai; tara maigan masha ni law law hpe makam masham de lu woi bang la ai; nawku jawng hte tsi gawk ni mung gap da ya lai wa sai rai nga ai.

Shi n nga mat ai hpang, Nawku Hpung gaw, shi hpe San Pra ai masha dang dat ya let, Shi a Poi Nhtoi hpe mung, May shata (7) ya shani masat shagrau dat ya sai rai nga ai.

Daini Nawku hpung gaw, Huy Mare na San Pra ai Domitian a Poi Nhtoi hpe galaw nga ga ai hte maren, anhte mung, San Pra ai Domitian zawn anhte a makau grup yin hkan shanu nga let, Makam Masham rai n lu la shi ai Hpunau ni a matu ninghtoi kaja ni tai lu hkra shakut nga ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)